ەنەرگەتيكا مينيسترلىگىنىڭ لاۋازىمدى تۇلعاسىنا قاتىستى رەزونانستىق گاز ءىسى بويىنشا ۇكىم شىعارىلدى, ول 115 مىڭنان 3 ملن تەڭگەگە دەيىن پارا الدى. بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگىنىڭ نۇر-سۇلتان قالاسى بويىنشا دەپارتامەنتىنىڭ باسشىسى شىڭعىس قابدوللا ايتتى, دەپ حابارلايدى Egemen.kz.
«وسى جىلدىڭ قازان ايىندا ەنەرگەتيكا مينيسترلىگىنىڭ لاۋازىمدى تۇلعاسى امانگەلدى ۇلىنا قاتىستى رەزونانستىق, گاز ءىسى بويىنشا ۇكىم شىعارىلدى, وعان الەۋمەتتىك گاز كولەمىن بولگەنى ءۇشىن ماڭعىستاۋ, پاۆلودار, باتىس قازاقستان وبلىستارىنىڭ گاز جەلىسى ۇيىمدارىنىڭ وكىلدەرىنەن 115 مىڭنان 3 ملن تەڭگەگە دەيىن جۇيەلى نەگىزدە پارا الۋ فاكتىسى بويىنشا 8 جىل مەرزىمگە باس بوستاندىعىنان ايىرۋ جازاسى تاعايىندالدى», دەپ حابارلادى قابدوللا بريفينگتە.
ول قوسىمشا جازا رەتىندە سوت پارا سوماسىن ءوندىرىپ العانىن قوستى.
دەپارتامەنت باسشىسىنىڭ ايتۋىنشا, سوت ونىڭ سىبايلاسى - ماڭعىستاۋ وبلىسىنىڭ گاز جەلىسى ۇيىمىنىڭ ديرەكتورىنا ءۇش جىل باس بوستاندىعىنان ايىرۋ جازاسىن تاعايىندادى.
سوت ۇكىمى زاڭدى كۇشىنە ەندى.