اقتاۋ قالاسىندا اشىلعان مۇناي-گاز كەنىشىنە ارنالعان زاۋىت – ەلىمىزدەگى ديامەترى 530 مم دەيىنگى كىشى بولات قۇبىرلارىن سىرتقى جانە ىشكى كورروزياعا قارسى قوسپامەن قاپتاپ قۇبىر ازىرلەيتىن العاشقى زاۋىت.
كاسىپورىن جىلىنا مۇناي جانە گاز ونەركاسىبىنە قاجەتتى 700 شاقىرىمعا جۋىق قۇبىر وندىرمەك. مۇندا سوڭعى ۇلگىدەگى تەحنولوگيالاردىڭ كومەگىمەن قۇبىرلارعا ىشكى جانە سىرتقى قاپتاما جۇمىستارى جۇرگىزىلەدى.
«جاڭا قۇبىر تەحنولوگيالارى» جشس ديرەكتورى مىرزاباي وڭداعاننىڭ ايتۋىنشا, ينۆەستيتسيالىق جوبانىڭ قۇنى – 5 ملرد تەڭگە. 200 جاڭا جۇمىس ورنى قۇرىلىپ, جۇمىسشىلار ارنايى دايارلىقتان وتكەن.
زاۋىتتىڭ اشىلۋ سالتاناتىندا ءوڭىر باسشىسى نۇرلان نوعاەۆ مۇنداي زاۋىتتاردىڭ اشىلۋى ءوڭىردىڭ الەۋمەتتىك-ەكونوميكالىق دامۋىنا تىڭ سەرپىن بەرەتىنىن اتاپ ءوتتى.
– ەلباسى باعدارلامالىق قۇجاتتاردا جەرگىلىكتى قامتۋدى دامىتۋدىڭ قاجەتتىلىگىن بىرنەشە رەت كورسەتتى. ەل پرەزيدەنتى دە بىزگە وسىنداي مىندەت قويىپ وتىر. ءبىز ءوڭىردىڭ مۇناي-گاز سالاسىنداعى جەرگىلىكتى قامتۋدىڭ ۇلەسىن ۇلعايتۋ ءۇشىن بار كۇش-جىگەرىمىزدى جۇمسايمىز, – دەدى وبلىس اكىمى.
وتاندىق ءونىم مەن وتاندىق ودىرىسكە قولداۋ كورسەتۋ ماڭىزدى ماسەلە دەسەك, اقتاۋدا اشىلعان زاۋىت ءۇشىن قۋانۋعا بولادى.