حالىقارالىق تۇركى اكادەمياسىنىڭ پرەزيدەنتى جانە «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى دارحان قىدىرالى «Yesti Podcast-تىڭ» كەزەكتى سانىندا قوناق بولدى, دەپ حابارلايدى Egemen.kz.
باعدارلاما بارىسىندا دارحان قۋاندىق ۇلى تاۋەلسىزدىك العاننان بەرگى تۇركى دۇنيەسىنىڭ بىرلىگى, قازىرگى قارىم-قاتىناسى, قاسيەتتى تۇركىستاننىڭ جاڭاشا جاڭعىرۋى جايىندا اڭگىمە ءوربىتتى.
حالىقارالىق تۇركى اكادەمياسىنىڭ قۇرىلۋىنا بىردەن ءبىر سەبەپكەر ەلباسى ەكەنىن ايتا كەتكەن ءجون. 2009 جىلى ەلباسىنىڭ باستاماسىمەن حالىقارالىق تۇركى اكادەمياسى قۇرىلىپ, 2010 جىلى اكادەميا ەلورداداعى بەيبىتشىلىك جانە كەلىسىم سارايىندا اشىلدى.
تۇركى اكادەمياسى 2014 جىلدان باستاپ حالىقارالىق ستاتۋس الدى, ول ءارى اكادەميالىق قۇرىلىم ياعني عىلىمي زەرتتەۋلەرمەن اينالىسادى, ءارى ديپلوماتيالىق قۇرىلىم.
ودان بولەك, اكادەميا باسشىسى وسى كۇنگە دەيىن تۇركى اكادەمياسى حالىقارالىق, يۋنەسكو كولەمىندەگى ءىس-شارالار وتكىزگەنىن تىلگە تيەك ەتتى.
«جالپى تۇركى ينتەگراتسياسىن ءتورت كەزەڭگە ءبولىپ قارايمىن:
ءبىرىنشىسى, تاۋەلسىزدىك العاننان كەيىنگى گۋمانيتارلىق مادەني كەزەڭ.
ەكىنشىسى, 1998 جىلى استانانىڭ قۇرىلۋىمەن بىرگە ەكونوميكالىق بايلانىس كەزەڭى.
ءۇشىنشى كەزەڭ بۇل - 2009 جىلى ناحچەۆاندا وتكەن تاريحي سامميت ارقىلى تۇركى اكادەمياسىنىڭ قۇرىلۋ كەزەڭى.
ودان كەيىنگى كەزەڭ 2019-2020 جىلدار ارالىعى, وسى ۋاقىتتاردىڭ ىشىندە قاراباح ازات ەتىلدى, سونىمەن قاتار تۇركىستان جاڭارۋ كەزەڭىنە ءوتتى, وزبەكستان تۇركى اكادەمياسىنا قوسىلدى. ياعني, بۇل ينتەگراتسيا حالىقارالىق دەڭگەيگە شىقتى», دەدى دارحان قىدىرالى.