سوڭعى 7 جىل باقىلاۋ تاريحىنداعى ەڭ جىلى كەزەڭ بولدى, ال الەمدىك مۇحيت دەڭگەيى جاڭا ماكسيمۋمعا دەيىن كوتەرىلدى. بۇل تۋرالى 31 قازاندا گلازگودا اشىلعان بۇۇ-نىڭ كليمات جونىندەگى كونفەرەنتسياسىنىڭ باستالۋىنا دايىندالعان دۇنيەجۇزىلىك مەتەورولوگيالىق ۇيىمنىڭ (دمۇ) جاڭا بايانداماسىندا ايتىلعان, دەپ حابارلايدى Egemen.kz.
دمۇ-نىڭ 2021 جىلعى الدىن الا ەسەبىندە بىرقاتار بۇۇ اگەنتتىكتەرىنىڭ, ۇلتتىق مەتەورولوگيالىق جانە گيدرولوگيالىق قىزمەتتەردىڭ دەرەكتەرى, سونداي-اق جەتەكشى عىلىمي ساراپشىلاردىڭ بولجامدارى جيناقتالعان.
«جاھاندىق كليماتتىڭ جاي-كۇيى تۋرالى دمۇ ەسەبى پلانەتانىڭ كوز الدىمىزدا وزگەرىپ جاتقانىن كورسەتەدى. ەكوجۇيەلەر بۇكىل الەم بويىنشا جويىلۋدا. عالىمدار ءوز سوزدەرىن ايتتى, ەندى كەزەك ساياسي كوشباسشىلاردا. كس-26 وزگەرىس كەزەڭى بولۋى كەرەك. ءبىز بولاشاعىمىزدى قورعاۋ جانە ادامزاتتى قۇتقارۋ ءۇشىن دەرەۋ ارەكەت ەتۋگە مىندەتتىمىز», دەپ مالىمدەدى بۇۇ باس حاتشىسى انتونيۋ گۋتەرريش بەينەحابارلامادا.
«باقىلاۋ تاريحىندا العاش رەت گرەنلانديا مۇز شىڭىندا قار ەمەس, جاڭبىر جاۋدى. مۇزدىڭ ەرۋى ناتيجەسىندە كانادالىق مۇزدىقتار باياۋ جوعالىپ جاتىر», دەدى دمۇ باس حاتشىسى پەتتەري تاالاس.
2021 جىلعى قاڭتار-قىركۇيەك ايلارىنداعى ورتاشا جاھاندىق تەمپەراتۋرا 1850–1900 جىلدارداعى ورتاشا ماننەن تسەلسي شكالاسى بويىنشا 1,09 گرادۋسقا جوعارى بولدى.