حالىقارالىق «ÁMEN» فەستيۆالىندە وزبەك رەجيسسەر-انيماتورى ازيزبەك مۋحامەدوۆتىڭ «دوم نا كولەساح» ءمۋلتفيلمى «ۇزدىك انيماتسيالىق فيلم» اتاندى, دەپ حابارلايدى Egemen.kz.
وزبەك رەجيسسەرى بايقاۋعا ەكى بىردەي جۇمىسىن ۇسىنعان. ولاردىڭ ءبىرى «ۆولشەبنىي تانبۋر» قىسقا مەتراجدى انيماتسيالىق ءفيلمى «ۇزدىك قويۋشى سۋرەتشى» اتالىمىندا توپ جارسا, «دوم نا كولەساح» تۋىندىسى فەستيۆالدىڭ «ۇزدىك انيماتسيالىق ءفيلمى» دەپ تانىلدى.
«امەن قايداروۆ اتىنداعى فەستيۆالگە قاتىسىپ, قازاق انيماتسياسىنداعى دوستارىممەن قاۋىشقانىما وتە قۋانىشتىمىن. تۋىندىلارىمىزدىڭ جوعارى باعالانىپ, ەڭبەگىمنىڭ ەلەنگەنى – ۇلكەن مارتەبە. كورەرمەندەرىمىز بەن فيلمدەردى جاساۋعا اتسالىسقان شىعارماشىلىق توپ بۇل جۇلدەلەردى ەرەكشە ىقىلاسپەن قابىل الاتىنىنا سەنىمدىمىن. «دوم نا كولەساح» ومىردە ءبارى بار, بىراق ارام نيەتتى ادامداردىڭ سوزىنە قۇلاق اسامىن دەپ وزگەنىڭ سوزىنە ىلەسىپ, ءوز ويىنان ايىرىلىپ قالعان جان تۋرالى شىعارما», دەپ اتاپ ءوتتى ازيزبەك مۋحامەدوۆ.
ودان بولەك تاعى توعىز اتالىم بويىنشا جەڭىمپازدار انىقتالدى. ەكى بىردەي قاتىسۋشىنىڭ جوباسى ۇزدىك سەريال اتاندى. تىنىشقالي تىلەگەنوۆتىڭ «بۇزىعىم» جانە بەكدوس سايات ۇلىنىڭ «سۋپەركولىك سامۇرىق» مۋلتحيكاياسى وزگە جۇمىستار اراسىنان وق بويى وزىق تۇردى. وزگە شەتەلدىك قاتىسۋشىلار اراسىنان تاجىكستان مەن باشقۇرتستان انيماتورلارىنىڭ جۇمىسى جوعارى باعاعا يە بولدى. باشقۇرت انيماتورى ريم شارافۋتدينوۆ «زولوتوي دۆورەتس» تۋىندىسىمەن ۇزدىك رەجيسسەرلىك جۇمىستى جەڭىپ الدى. وسى اتالىم بويىنشا ەكىنشى جەڭىمپاز – «La Gare» قىسقا مەتراجدى انيماتسيالىق ءفيلمىنىڭ رەجيسسەرى ايان ماروككانسكي. ال تاجىكستاندىق قاتىسۋشى لوليسانام ۋلۋگوۆا «حۋۆايدو» مۋلتفيلمىمەن ۇزدىك ستسەناري اۆتورى اتاندى.
بايقاۋ قورجىنىنا كەلىپ تۇسكەن ستۋدەنتتىك جۇمىستار ەكى اتالىم بويىنشا باعالاندى. مەيىرجان تولەپبايدىڭ «جانۇيا» ءمۋلتفيلمى ستۋدەنتتەر اراسىنداعى ۇزدىك جۇمىس بولسا, قازاق ۇلتتىق ونەر ۋنيۆەرسيتەتىنىڭ ستۋدەنتتەرى ماليكا ماقساتقىزى مەن قاجىبەك گۇلنۇردىڭ تۋىندىلارى «ۇزدىك ستۋدەنتتىك رەجيسسەرلىك جۇمىس» ماراپاتىن يەلەندى.
قازىلاردىڭ ارنايى سىيلىعىمەن رەجيسسەر نۇرگۇل داۋىتوۆا مەن سۇلتان قىدىرباەۆ ماراپاتتالدى. ال رەجيسسەر مەيىرجان تولەپباي «كورەرمەن كوزايىمى» اتالىمىنا يە بولدى. بايقاۋعا ۇسىنىلعان كوميكستەر اراسىندا ءمادي وتەگەنوۆتىڭ «باتىل ساقشىلار» جۇمىسى ۇزدىك دەپ تانىلدى.
فەستيۆالدىڭ ەڭ جاس قاتىسۋشىلارى تۇركىستان وقۋشىلار سارايىنىڭ انيماتسيا ۇيىرمەسىنىڭ تاربيەلەنۋشىلەرى كرەاتيۆتى قوزقاراسى ءۇشىن ماراپاتتالدى.
ادىلقازىلار القاسى بايقاۋعا كەلىپ تۇسكەن جۇمىستاردى ستسەناري, رەجيسسۋرا, انيماتسيا, كەيىپكەر, كوركەمدىك شەشىم بويىنشا باعالادى. ورتالىق ازياداعى ەڭ ءىرى انيماتسيالىق فەستيۆالدە ايگىلى شەتەل انيماتور-مۋلتيپليكاتورلارى مەن وتاندىق بىلىكتى ماماندار تورەلىك ەتتى. ولاردىڭ قاتارىندا الەمگە تانىمال سۋرەتشى-انيماتور, «نۋ, پوگودي!», «مۋلان», «كورول لەۆ», «فيكسيكي» سىندى «سويۋزمۋلتفيلم» مەن «Disney» ستۋديالارىنىڭ 40-تان اسا جوباسىنا قاتىسقان الەكساندر دوروگوۆ (اقش), قر مەملەكەتتىك سىيلىعىنىڭ يەگەرى روزا مۇقانوۆا, كينوتانۋشى, كينوسىنشى ءنازيرا مۇقىشەۆا, ۇلتتىق كينونى قولداۋ ورتالىعىنىڭ باس پروديۋسەرى اداي ابەلدينوۆ, انيماتسيا پروديۋسەرى جانە رەجيسسەر مۋساب گۇندۇز (تۇركيا), رەجيسسەر-ستسەناريست, قر مادەنيەت قايراتكەرى, رەجيسسەر-مۋلتيپليكاتور باتىرحان داۋرەنبەكوۆ, سونداي-اق حالىقارالىق كينوفەستيۆالدەردىڭ جۇلدەگەرى تۇردىبەك مايدان بار.
بايقاۋعا بارلىعى 57 ءوتىنىم كەلىپ ءتۇستى, ونىڭ 49-ى ىرىكتەۋدەن ءوتتى. حالىقارالىق «ÁMEN» انيماتسيالىق فيلمدەر فەستيۆالىنە وتاندىق جانە باۋىرلاس تۇركى ەلدەردىڭ, اتاپ ايتقاندا ازەربايجان, باشقۇرتستان (رف), قىرعىز رەسپۋبليكاسى, وزبەكستان, تاتارستان (رف), تاجىكستان مەن تۇركيانىڭ مۋلتيپليكاتورلارى قاتىستى.