تاريحي ەسكەرتكىشتەرگە قامقورلىق قاجەت

Nur Otan پارتياسى وبلىستىق فيليالى جا­نىن­داعى Miras قوعامدىق كەڭەسى وتىرىسىندا ماماندار وسى­لاي دەپ دابىل قاقتى. «تۇركىستان عاجايىپتارى» ەكس­پەديتسياسى اي بويى «ۇلتتىق مۇرا» پارتيالىق جوباسى اياسىندا وبلىستىڭ كيەلى, قاسيەتتى ورىندارىنا ساپارعا شىعىپ, 85 نىساننىڭ جاي-كۇيىن زەردەلەگەن. قوعامدىق كەڭەستە ەسەپ بەرگەن وبلىستىق مادەنيەت باسقار­ماسىنىڭ تاريحي-مادەني مۇرانى قورعاۋ, قالپىنا كەلتىرۋ جانە پايدالانۋ جونىندەگى ورتالىقتىڭ ديرەكتورى جاندوس قۇربان اۋدان, قالا­لاردا تاريحي ەسكەرتكىشتەر مەن ورىنداردى قورعاۋ باعىتىنداعى جۇمىستاردى كۇشەيتۋ كەرەكتىگىن ايتتى. «كەلەس اۋدانىنداعى القاكول كولىنە باراتىن 10 شاقىرىم جولعا اسفالت توسەۋ جانە «القاكول سۇلاما» قىرعىنىنىڭ 300 جىلدى­عىنا ارناپ مەموريال­دى كەشەن ورناتىپ, ناسي­حاتتاعان ءجون. سوزاق اۋدانىنداعى قوشقار اتا, مۇحاممەد حانافيا, بالىقشى اتا, حاقنازار حان كەسەنەلەرىنە, قازىعۇرت اۋدانىنداعى ىسقاق اتا, شىلتەن اتا كەسەنەلەرىنە, تولەبي اۋدا­نىن­داعى مانسۇر اتا كەسەنەسىنە, جىلاق اتا بۇلا­عىنا, سايرام اۋدانىنداعى ەر بەكىش اتا كەسەنەسىنە, تۇلكىباس اۋدانىنداعى قاراۇڭگىر تۇراعى, ءداۋ بابا كەسەنەسىنە باراتىن جولداردى رەتتەپ, مۇمكىندىگى بولسا اسفالت جابىن توسەۋ كەرەك», دەدى جاندوس قۇربان. سونداي-اق وبلىس اۋما­عىنداعى بارلىق تاريحي-مادەني, كيەلى جانە قاسيەتتى جەرلەرگە باراتىن جول بويلارىن­داعى سىلتەۋىش بەلگىلەردى جاڭارتۋ, جوق بولسا قويۋ, بارلىق تاريحي ورىنداردىڭ مەملەكەت قورعاۋىندا ەكەنىن كورسەتەتىن تاقتايشالاردى جاڭارتۋعا وبلىستىق بيۋدجەتتەن قارجى قاراۋ قاجەت. شىراقشىلاردىڭ, اۋىل اكىمدەرىنىڭ تاريحي-مادەني ەسكەرتكىشتەردى قورعاۋ بويىنشا بىلىكتىلىگىن ارتتىرۋ ءۇشىن تۇراقتى تۇردە سەمينارلار وتكىزۋ دە كۇن تارتىبىندەگى ماسەلە.

Miras قوعامدىق كەڭەسىنىڭ توراعاسى, جازۋشى مارحابات بايعۇت توراعالىق جاساعان جيىندا وڭىردە ۇلت­تىق سپورت تۇرلەرىن دامىتۋ باعى­تىنداعى جۇمىستار دا سارالاندى. «تاريحىن تانۋ – تاعىلىمدى ءىس» تاقىرىبىندا بايانداما جاساعان وبلىستىق دەنەشىنىقتىرۋ جانە سپورت باسقارماسى باسشىسىنىڭ ورىنباسارى ايتماحامەتالى بەرداشەۆ وبلىستا اسىق اتۋ, قازاق كۇرەسى, كوكپار, تەڭگە ءىلۋ, توعىزقۇمالاق, اۋدا­رىسپاق, بايگە, جامبى اتۋ, سايات, جەكپە-جەك سىندى ۇلتتىق سپورت تۇرلەرى دامىپ كەلە جات­قانىن ايتىپ ءوتتى. ۇلتتىق سپورت تۇرىمەن جالپى شۇ­عىلدانۋشىلار سانى 84 مىڭنان اسادى. ولار وبلىستاعى 1 826 ۇيىرمەگە قاتىسادى. وبلىس سپورت­شىلارى بيىلدىڭ 9 ايىندا ۇلتتىق سپورت تۇرلەرىنەن حالىقارالىق, رەسپۋبليكالىق جانە وبلىستىق جارىستارعا قاتىسىپ, 76 التىن, 65 كۇمىس, 25 قولا مەدالدى جەڭىپ العان. قوعام­دىق كەڭەس وتىرىسىندا ءوڭىردىڭ تۋريستىك الەۋە­تىن كوتەرۋ, تاريحي ەسكەرتكىشتەردى قورعاۋ, رۋحا­نياتقا, سپورتقا قولداۋ كورسەتۋ جانە ناسيحاتتاۋ پارتيانىڭ جول كارتاسىنىڭ باسىم باعىتتارىنا ەنگىزىلگەنى ايتىلدى. بۇل ورايدا ءاربىر باسقارما نەمەسە ورتالىق ءوز سالالارىنداعى ماسەلەلەردى جاسىرماي ايتىپ, جەرگىلىكتى اكىمدىكتەرگە ۇسى­نىستار بەرىپ, بەلسەندى جۇمىس جۇرگىزۋى ءتيىس.

جيىن سوڭىندا Nur Otan پارتياسى وبلىستىق فيليالى توراعاسىنىڭ ءبىرىنشى ورىنباسارى, فراكتسيا جەتەكشىسى بەيسەنباي تاجىباەۆ ءوڭىر تاريحىن, ولكە­تانۋدى زەردەلەۋدە تابىستى ەڭبەك ەتكەن «تۇركىستان عاجايىپتارى» ولكەتانۋ ەكسپەديتسياسى مۇشەلەرىن العىس حاتپەن ماراپاتتادى.