ۇقك شەكارا قىزمەتى اكادەمياسىنىڭ كينولوگيا جانە ات دايىندىعى كافەدراسىنىڭ اكىمشىلىك كورپۋسى ارنايى باعدارلاما اياسىندا (EXBS) كۇردەلى جوندەۋدەن وتكىزىلىپ, سالتاناتتى جاعدايدا شەكاراشىلارعا تاپسىرىلدى, دەپ حابارلادى قر ۇقك شق ءباسپاسوز قىزمەتى.
قۇرىلىس جۇمىستارى اقش-تىڭ قازاقستانداعى ەلشىلىگىنىڭ «ەكسپورتتىق باقىلاۋ جانە شەكارانىڭ قاۋىپسىزدىگى» باعدارلاماسى نەگىزىندە جۇرگىزىلدى, بارلىق تالاپتارعا جاۋاپ بەرەدى.
عيماراتتىڭ اشىلۋ سالتاناتىنا جوعارىدا اتالعان باعدارلامانىڭ كەڭەسشىسى كيرك برەدحام, «ارتەك كونستراكشن» جشس قۇرىلىس كومپانياسىنىڭ ديرەكتورى ەمراح سەيحۋن, مەنەدجەرى ەرحان اقسۋ جانە قۇرىلىس جۇمىستارىنىڭ باستىعى سەرىك قارباەۆ قاتىستى.
وسى ورايدا اتالعان كومپانيانىڭ ءبىزدىڭ ەلىمىزدە جۇمىس ىستەپ كەلە جاتقانىنا ءبىر جىل عانا بولعاندىعىن, دەگەنمەن, بۇعان دەيىن ولار اۋعانستان, تۇركيا جانە اقش سەكىلدى ەلدەردە اسكەري نىساندار سالىپ, وزدەرىن جاقسى جاعىنان كورسەتكەندەرىن اتاپ ءوتۋ كەرەك.
كافەدرا قۇرىلعان كەزدە, ياعني العاشقى جىلدارى ونىڭ وقۋ كورپۋستارى وفيتسەرلىك-وقىتۋشىلىق قۇرامنىڭ كۇشىمەن سوعىلدى. ارينە, ول كەزدىڭ جاعدايى دا باسقا بولاتىن. بۇگىنگى تاڭدا مۇندا جۇمىس ىستەۋگە قاجەتتى بارلىق جاعداي جاسالعان. جوندەۋ جۇمىستارىنىڭ بارلىعى ەۋروپالىق تالاپتارعا ساي كەلەدى. وتكەن جىلدىڭ تامىز ايىندا باستالعان جوندەۋ جۇمىستارى تولىق اياقتالىپ, مىنە, شەكارا ساقشىلارىنا ارنالعان العاشقى وقۋ ساباقتارى دا جۇرگىزىلگەلى وتىر.
– «ەكسپورتتىق باقىلاۋ جانە شەكارانىڭ قاۋىپسىزدىگى» باعدارلاماسى (EXBS) 2000 جىلدان باستاپ جۇمىس ىستەپ كەلەدى, ەڭ باستىسى جۇمىستىڭ ساپالىلىعىنا ءبىز كەپىلدىك بەرەمىز, – دەيدى باعدارلامانىڭ كەڭەسشىسى كيرك برەدحام.
اكادەميا باستىعىنىڭ وقۋ ىستەرى جونىندەگى ورىنباسارى, پولكوۆنيك پاۆەل پوليۆانوۆ پەن كافەدرا مەڭگەرۋشىسى ەركىن وڭباەۆ ءسوز كەزەگىندە قوناقتارعا العىستارىن ايتىپ, الداعى ۋاقىتتا دا بىرلەسە جۇمىس ىستەي بەرەتىندىكتەرىنە سەنىمدەرىن ءبىلدىردى.