قوستانايدا اۋدان, قالا اكىمدەرى, وبلىس اكىمىنىڭ ورىنباسارلارى ءۇشىن «قالالار مەن اۋداندار اكىمدەرىنىڭ الەۋمەتتىك سالاداعى جۇمىسىنىڭ نەگىزگى باعىتتارى» اتتى ارنايى ەكى كۇندىك سەمينار ءوتتى.
پارتاعا وتىرعان اكىمدەردىڭ الدىندا مەكتەپ وقۋشىسىنداي نەمەسە ستۋدەنتتەردەي قالامسابى مەن داپتەرى, ءتىپتى مەملەكەتتىك قىزمەتشىلەردى قايتا دايارلاۋ جانە ولاردىڭ بىلىكتىلىگىن ارتتىرۋ جونىندەگى وڭىرلىك ورتالىقتىڭ قازاقستان رەسپۋبليكاسى مەملەكەتتىك قىزمەت ىستەرى جونىندەگى اگەنتتىگى قوستاناي وبلىسى بويىنشا دەپارتامەنتىمەن بىرلەسىپ شىعارعان قۇقىقتىق اكتىلەر نورمالارىنىڭ جيناعى جانە «مەملەكەتتىك قىزمەتتەگى جانجالداردى رەتتەۋ» اتتى ادىستەمەلىك وقۋلىق جاتتى. اكىمدەر ەكى كۇن بويى وقۋ باعدارلاماسىندا بيۋدجەتتى قۇرۋ, سۋبسيديالارمەن جۇمىس جانە مەملەكەتتىك ساتىپ الۋدى دۇرىس وتكىزۋ, پىسىقتاۋ سياقتى تاقىرىپتاردى قامتىدى. سەميناردىڭ اشىلۋىنا وبلىس اكىمى نۇرالى سادۋاقاسوۆ قاتىسىپ, ارىپتەستەرىنە مۇنداي سەميناردىڭ بەرەرى مول ەكەندىگىن ايتتى.
– سەميناردى ەكى كۇن ەمەس, ودان دا ۇزاق وتكىزۋگە بولار ەدى. بىراق قىستاعى كوپ جۇمىستار, تىيىلماي تۇرعان بوران وعان مۇرشا بەرمەدى. دەگەنمەن, بۇل سەمينار اكىمدەر جۇمىسىندا كەزدەسەتىن كوپ جايلاردى پىسىقتاپ الۋعا كومەكتەسەدى دەپ ويلايمىن جانە بۇل الداعى ۋاقىتتا جالعاسىن تاباتىن بولادى, –دەدى نۇرالى مۇستافا ۇلى.
وبلىستا ءبىرىنشى ءوتىپ وتىرعان بۇل سەميناردا اكىمدەرگە باسقارمالار باسشىلارى, زاڭگەر ماماندار, قور جەتەكشىلەرى لەكتسيا وقىدى, ولار ينتەراكتيۆتى تاقتانى پايدالانا وتىرىپ, ءتيىستى تاقىرىبىن بۇگە-شىگەسىنە دەيىن ءتۇسىندىردى. اكىمدەردىڭ سۇراقتارىنا جاۋاپ بەردى.
ەكى كۇندىك سەمينار اكىمدەر ءۇشىن ناعىز پىكىر الماسۋ الاڭىنا اينالدى. ترەنينگ وتكىزىلدى. سەمينارعا قاتىسۋشىلار مودەراتورلار مەن سپيكەرلەرگە, ياعني ماماندارعا ويىنداعى وتكىر ماسەلەلەردىڭ بارلىعىن سۇراق تۇرىندە قويا الدى. مىسالى, قازىر شاعىن جانە ورتا بيزنەستى دامىتۋ – بارلىق وڭىردەگى ەڭ وتكىر ماسەلەلەردىڭ ءبىرى. وسى جونىندە دە سەميناردا قىزىقتى, تالاستى پىكىر الماسۋ بولدى. نەگىزى, سەميناردا تالقىلانعان, اكىمدەر وقىپ, پىسىقتاعان ماسەلەلەردىڭ بارلىعى دا ەلباسى نۇرسۇلتان نازارباەۆتىڭ بيىلعى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنان تۋىنداعان بولاتىن. اكىمدەر سەميناردا جولداۋدى تالقىلاۋعا دا ۋاقىت تاپتى.
سەمينار سوڭىندا وبلىس اكىمى سەمينارعا قاتىسقان اكىمدەرگە سەرتيفيكات جانە وسىعان دەيىن اۋداندىق, قالالىق اكىمدەر ورىنباسارلارى, ماماندار ءۇشىن تاجىريبە الماسۋ الاڭدارىن ۇيىمداستىرعان اۋدان, قالا اكىمدەرىنە العىس حات تاپسىردى.
ءنازيرا جارىمبەتوۆا,
«ەگەمەن قازاقستان».
قوستاناي.