قازاقستان رەسپۋبليكاسى قارۋلى كۇشتەرىنىڭ حالىقارالىق ىنتىماقتاستىق كەلىسىمشارتتارىن جۇزەگە اسىرۋ مەن ونى جەتىلدىرە ءتۇسۋ ەگەمەن ەلىمىز قارۋلى كۇشتەرىنىڭ الەۋەتىن كوتەرۋگە وزىندىك ۇلەس قوسىپ كەلەدى. اسىرەسە, اسكەري ءبىلىم بەرۋ سالاسىندا اتقارىلاتىن مىندەتتەر كوپ. ول مىندەتتەر زاماناۋي ءبىلىم بەرۋدىڭ حالىقارالىق ستاندارتقا ساي بولۋىن, وقىتۋدىڭ جاڭا تەحنولوگيالارىن, ادىستەرى مەن تاسىلدەرىن جاڭارتۋ مەن جەتىلدىرۋدى كوزدەيدى.
وسىنداي مىندەتتەردى جۇزەگە اسىرۋدىڭ ءبىر ايعاعى, 2014 جىلدىڭ 28-31 قاڭتارى ارالىعىندا قۇرلىق اسكەرلەرى اسكەري ينستيتۋتىنا ۇلىبريتانيانىڭ قازاقستانداعى اسكەري اتتاشەسى, پودپولكوۆنيك دەۆيد حارريسون مەن بريتانيا كەڭەسىنىڭ ورتالىق ازيا ايماعىنداعى وكىلى نيكولاس فلەتچەر كەلدى. بۇل ساپار ەكىجاقتى ىنتىماقتاستىق كەلىسىمشارت بويىنشا جوسپارلانعان باعدارلاما نەگىزىندە جۇزەگە استى.
ولاردىڭ كەلۋ ماقساتى قۇرلىق اسكەرلەرى اسكەري ينستيتۋتىنىڭ وقىتۋشىلارىنا كۋرسانتتاردى اعىلشىن تىلىندە وقىتۋ بارىسىندا ادىستەمەلىك ساباقتار وتكىزۋ, شەت ءتىلىن وقىتۋ ادىستەرى مەن تاسىلدەرى بويىنشا وي الماسۋ, اعىلشىن تىلىنەن ناتو “ستاناگ-6001” ستاندارتىنا ساي تەست تاپسىرمالارىن قۇراستىرۋ جانە ونى سىناقتان وتكىزۋ بولدى.
ۇلىبريتانيانىڭ اسكەري اتتاشەسى ينستيتۋت باستىعىنىڭ وقۋ جانە عىلىمي جۇمىستارى جونىندەگى ورىنباسارىنىڭ مىندەتىن ۋاقىتشا اتقارۋشى پولكوۆنيك ۆ.مامبەتاليەۆ مىرزا مەن ەۋروپا تىلدەرى كافەدراسىنىڭ باستىعى, كاپيتان ج.بيسەنباەۆا حانىممەن اعىلشىن ءتىلىنىڭ حالىقارالىق ستاندارتقا سايكەس تەست تۇرلەرىن, ءتىلدى جەتىلدىرۋ باعدارلامالارىن, وقۋلىقتار مازمۇنى مەن ينستيتۋتتاعى اعىلشىن ءتىلى وقىتۋشىلارىنىڭ وقۋ ۇدەرىستەرىنە قاجەتتى ادىستەمەلىك ماتەريالدار مازمۇنىن تالقىلادى.
سونداي-اق, جوسپارلانعان باعدارلاما بويىنشا ن.فلەتچەر ەكى كافەدرانىڭ اعىلشىن ءتىلى وقىتۋشىلارىمەن ءتورت كۇن ادىستەمەلىك سەمينار وتكىزدى. سەمينارلار بارىسىندا كۋرسانتتار اعىلشىن ءتىلىن ۇيرەنۋدە قولدانىلاتىن لەكسيكا-گرامماتيكالىق جاتتىعۋلار, اسكەري تەرمينولوگيانى ۇيرەتۋگە نەگىزدەلگەن ماتىندەر مەن جاتتىعۋلار جانە اسكەري تەحنيكالاردىڭ اعىلشىن تىلىندەگى اتاۋلارىن ۇيرەتۋ بويىنشا تاپسىرمالاردىڭ مازمۇنىنا وراي تاجىريبەلىك تۇرعىدا وي الماستى.
نۇرقانات سوپبەك,
لەيتەنانت, قۇرلىق اسكەرلەرى اسكەري ينستيتۋتى
ەۋروپا تىلدەرى كافەدراسىنىڭ وقىتۋشىسى.