جۇرگىزۋشى قر اقبك 608-بابىنىڭ 1-بولىگىمەن اكىمشىلىك جاۋاپكەرشىلىككە تارتىلدى, دەپ حابارلايدى Egemen.kz.
وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتى بويىنشا, «اۆتوبۋس» جەدەل الدىن الۋ ءىس-شاراسى بارىسىندا پاترۋلدىك پوليتسيا باتالونىنىڭ قىزمەتكەرلەرى مالايسارى باتىر - ەرماك كوشەلەرىنىڭ قيىلىسىندا «گاز-ا65R35» اۆتوكولىگىن توقتاتقان. اتالعان شاعىن اۆتوبۋس جولاۋشىلار تاسىمالىن جۇزەگە اسىرادى.
«قۇجاتتاردى تەكسەرۋ كەزىندە 48 جاستاعى جۇرگىزۋشى ءوزىن دۇرىس ۇستاماعان, قوزعالىسى كۇدىك تۋدىرعان. بىراق الكوگولگە ءتان ءيىس بولماعان, ال جۇرگىزۋشىنىڭ ءوزى ساۋ ەكەنىن ايتقان. الايدا مەديتسينالىق تەكسەرۋدەن ءوتۋ كەزىندە جۇرگىزۋشىنىڭ ەسىرتكىگە ماس بولعانى انىقتالدى. اۆتوكولىك ارنايى تۇراققا قويىلدى. ەندى وعان جەتى جىل بويى كولىك قۇرالدارىن جۇرگىزۋگە تىيىم سالىنادى», دەپ حابارلادى پاۆلودار قالاسى پوليتسيا باسقارماسى باستىعىنىڭ ءبىرىنشى ورىنباسارى نۇرعالي وماربەكوۆ.
ەسكە سالا كەتەيىك, قوعامدىق كولىكتى باسقاراتىن جۇرگىزۋشىلەر تاراپىنان بۇزۋشىلىقتاردى انىقتاۋعا باعىتتالعان «اۆتوبۋس» جەدەل الدىن الۋ ءىس-شاراسى 4-13 قازان ارالىعىندا وتكىزىلەدى.