كەشە ەڭبەك جانە حالىقتى الەۋمەتتىك قورعاۋ مينيسترلىگىندە پرەمەر-ءمينيستردىڭ ورىنباسارى گۇلشارا ابدىقالىقوۆانىڭ قاتىسۋىمەن كەڭەيتىلگەن القا وتىرىسى ءوتىپ, وندا مەملەكەت باسشىسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىن ىسكە اسىرۋ اياسىندا الەۋمەتتىك ەڭبەك سالاسىن دامىتۋداعى نەگىزگى مىندەتتەر تالقىلاندى. جيىندا نەگىزگى باياندامانى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا جاسادى.
«وتكەن جىلى الەۋمەتتىك دامىتۋدىڭ كوپتەگەن ارقاۋلىق كورسەتكىشتەرى بويىنشا وڭ ءناتيجەلەرگە قول جەتكىزىلىپ, حالىقتى جۇمىسپەن قامتۋ دەڭگەيى ارتتىرىلدى. بۇگىنگى تاڭدا 95 پايىز ەڭبەك ەتۋگە قابىلەتتى قازاقستاندىق ازاماتتىڭ جۇمىسى بار, «جۇمىسپەن قامتۋدىڭ جول كارتاسى-2020» باعدارلاماسىن ىسكە اسىرۋ جالعاستىرىلۋدا. وسىنىڭ اياسىندا 250 مىڭنان استام ادام جۇمىسقا ورنالاستى. جالاقى, الەۋمەتتىك تولەمدەر مەن جاردەماقىلاردى ارتتىرۋ بويىنشا دا جوسپارلى جۇمىستار جۇرگىزىلۋدە. ەكونوميكالىق قىزمەتتىڭ تۇرلەرى بويىنشا ورتاشا ايلىق جالاقى 108 640 تەڭگەنى قۇراپ, 2012 جىلعى دەڭگەيدەن 7,5 پايىزعا ارتتى», دەدى مينيستر ت.دۇيسەنوۆا.
4 ميلليونعا جۋىق ادام الەۋمەتتىك تولەم تۇرلەرىن السا, بالالى وتباسىلاردى قولداۋ بالا تۋ سانىنىڭ ارتۋىنا وڭ ىقپال ەتكەن. سوڭعى ون جىل ىشىندە بالا تۋ سانى ءبىر جارىم ەسەگە وسكەن. ەكى ءجۇز مىڭداي وتباسى 4 جانە ودان دا كوپ بالا تاربيەلەپ وتىر.
مۇمكىندىگى شەكتەۋلى جانداردىڭ تىنىس-تىرشىلىگى ءۇشىن لايىقتى ورتا قۇرۋ, وڭالتۋ جانە قاجەتتى جاعداي جاساۋ شارالارى قابىلدانۋدا. سونداي-اق, تابىسى از حالىقتى الەۋمەتتىك قولداۋ ماقساتىندا جۇمىسپەن قامتۋعا ىقپال ەتۋدە دە شارالار قابىلدانۋدا جانە الەۋمەتتىك جاردەماقىلار دا تولەنۋدە.
90 مىڭنان استام ادامعا تەگىن ارناۋلى الەۋمەتتىك قىزمەت كورسەتىلەدى. الەۋمەتتىك قامسىزداندىرۋ جۇيەسىن رەفورمالاۋ ناتيجەسىندە جۇمىس ىستەپ تۇرعان الەۋمەتتىك مەديتسينا مەكەمەلەرىنىڭ بالامالى نىسانىنا اينالعان 35 كۇندىز قابىلداۋ مەكەمەسى قۇرىلىپ, وندا 3 مىڭنان استام ادامعا قىزمەت كورسەتىلۋدە. 343 مۇگەدەك بالا پسيحونەۆرولوگيالىق ءمام-نەن وتباسىلارىنا ورالدى. بالالارىنا كۇندىز بولۋ بولىمشەلەرىندە قىزمەت كورسەتىلەتىن 410 اتا-انا جۇمىسقا ورنالاسىپ العان.
جۇمىس بەرۋشىلەردىڭ ەڭبەك جاعدايلارىن ۇنەمى جاقسارتىپ تۇرۋعا قىزىعۋشىلىعىن ارتتىرۋ ماقساتىندا زەينەتاقىمەن قامسىزداندىرۋ تۋرالى زاڭناماعا وزگەرىس ەنگىزىلگەن. وندىرىستىك وبەكتىلەردى اتتەستاتتاۋ ناتيجەلەرىمەن راستالعان زياندى (ەرەكشە زياندى) جانە قاۋىپتى ەڭبەك جاعدايلارى بولماعان جاعدايدا جۇمىس بەرۋشىلەر مىندەتتى كاسىپتىك زەينەتاقى جارنالارىن تولەۋدەن بوساتىلماق.
مينيستر ت.دۇيسەنوۆا وتىرىستا ەلباسىنىڭ بيىلعى جولداۋىنداعى تاپسىرمالارعا وراي بيىلعى جىلعا ارنالعان باستى مىندەتتەردى دە بەلگىلەدى. «جۇمىسپەن قامتۋدىڭ جول كارتاسى-2020»-نىڭ تيىمدىلىگىن ارتتىرۋ بويىنشا شىعىس قازاقستان, سولتۇستىك قازاقستان جانە پاۆلودار وبلىستارىندا باعدارلاماعا قاتىسۋعا ۇمىتكەرلەر اراسىندا كاسىبي باعدارلاۋدى ەنگىزۋ تەتىكتەرى سىنالماق. الماتى, اقمولا, شىعىس قازاقستان, پاۆلودار وبلىستارىندا قاناتقاقتى رەجىمدە تىرەك اۋىلداردى كەشەندى دامىتۋ تەتىكتەرى سىنالاتىن اۋىلدىق ەلدى مەكەندەر بەلگىلەنبەك. بۇرىنعى جەكە بيزنەسىن اشۋعا ازاماتتارعا قولداۋ كورسەتىلگەن كەزدەگى شارتتاردان ەرەكشەلىگى, مەملەكەتتىك قولداۋ شارالارى ازاماتتاردىڭ ناتيجەلى جۇمىسپەن قامتىلۋىن قامتاماسىز ەتۋ ءۇشىن دامۋ الەۋەتى جوعارى اۋىلداردى دامىتۋعا شوعىرلاندىرىلماق. سونىمەن قاتار, باعدارلامانى قارجىلاندىرۋدا جاڭا تاسىلدەر ەنگىزىلۋدە. كەلەسى جىلدان باستاپ بيۋدجەت قاراجاتى 80 پايىز حالىقتىڭ سانىنا تەپە-تەڭ تۇردە, 20 پايىز وتكەن كەزەڭدەگى جۇمىس ناتيجەسىنە بايلانىستى بولىنەتىن بولادى.
القا وتىرىسىن قورىتىندىلاعان پرەمەر-ءمينيستردىڭ ورىنباسارى گۇلشارا ابدىقالىقوۆا الدا ازاماتتىق قىزمەتشىلەردىڭ ەڭبەكاقىسىنىڭ جاڭا ۇلگىسىن ازىرلەپ, 2015 جىلعى 1 شىلدەدەن باستاپ ەنگىزۋ مىندەتى تۇرعانىن ايتتى. سونداي-اق, ول الەۋمەتتىك كومەك كورسەتۋ تارتىپتەرىن ودان ءارى جەتىلدىرۋ قاجەتتىگىن دە نازاردان تىس قالدىرمادى.
ءابدىراحمان قىدىربەك,
«ەگەمەن قازاقستان».