كەشە استانادا «قازترانسگاز» اق-تىڭ باس ديرەكتورى سەرىك سۇلتانعالي ءباسپاسوز ءماسليحاتىن وتكىزدى. ول كومپانيانىڭ وتكەن جىلى اتقارعان جۇمىستارىنىڭ قورىتىندىلارى تۋرالى بايانداپ, ەلىمىزدىڭ وڭتۇستىك وڭىرلەرىندە گازعا بايلانىستى تۋىنداعان ماسەلەلەردىڭ مانىسىنە توقتالدى.
«قازترانسگاز» اق-تىڭ كومپانيالار توبىنىڭ وتكەن جىلعى تابىسىنا توقتالار بولساق, باس ديرەكتوردىڭ ايتۋىنا قاراعاندا, جىل قوماقتى تابىسپەن قورىتىندىلانعان. ناقتى ساندارعا نازار سالساق, 2013 جىلعى تازا تابىس 51 ملرد. تەڭگەنى قۇراپتى. بۇل كورسەتكىش بۇرناعى جىلعىدان 80 پايىزعا جوعارى كورىنەدى. ماگيسترالدى گاز قۇبىرلارى ارقىلى ءونىمدى تاسىمالداۋ كولەمى 110,14 ملرد. تەكشە مەترگە جەتكىزىلىپ, 2012 جىلعى كورسەتكىشتەن 3,6 پايىزعا كوپ ايدالىپتى. ال كوگىلدىر وتىندى شەتەلدەرگە ەكسپورتتاۋ كولەمى ەكى ەسەگە دەيىن وسكەن.
مۇنىمەن قاتار, اتالعان كومپانيا وتكەن جىلى الەۋمەتتىك ەكونوميكالىق ءمانى بار بىرقاتار ءىرى جوبالاردى جۇزەگە ءساتتى اسىرىپتى. ماسەلەن, بىلتىرعى قىركۇيەك ايىندا «بەينەۋ-بوزاي-شىمكەنت» ماگيسترالدى گاز قۇبىرىنىڭ 1143 شاقىرىمدىق تەلىمىن پايدالانۋعا بەرگەنى ءمالىم. بۇيىرتسا, بۇل حالىق تۇرمىسىنىڭ كوتەرىلۋىنە ۇلكەن كومەك بولارى بەلگىلى. اقتوبە ءوڭىرىنىڭ كەن ورىندارىنان وسى قۇبىر ارقىلى ايدالاتىن بارلىق گازدى «قازترانسگاز» اق ەلىشىلىك تۇتىنۋعا, ەڭ الدىمەن وڭتۇستىك ولكەگە جەتكىزىپ تۇرادى. باس ديرەكتور وسى جوبانىڭ ناتيجەلى جۇزەگە اسىرىلۋىنىڭ ارقاسىندا الماتى مەن سول وبلىستىڭ جانە شىمكەنت, تاراز بەن زايسان, سونداي-اق قاسيەتتى تۇركىستان قالاسىنىڭ تۇرعىندارىن كوگىلدىر وتىنمەن قامتاماسىز ەتۋ ءۇشىن جەرگىلىكتى اكىمدىكتەرگە تولىق مۇمكىندىك جاسالعانىن تىلگە تيەك ەتتى.
وڭتۇستىك ايماقتاردا گازعا بايلانىستى ورناعان جاعداي جۋرناليستەردىڭ نازارىنان تىس قالمادى. «ول كەلەڭسىز جاعداي تۋىنداي سالىپ تولىق ءبىزدىڭ باقىلاۋىمىزدا بولدى. نەگىزگى سەبەپ, كورشى وزبەكستاندى قاھارلى قىستىڭ قۇرساپ الۋىنان بولدى. وزدەرىنە كوگىلدىر وتىنى جەتپەي جاتقان كورشى ەل بىزگە قاراي باعىتتالعان گاز اعىنىن توقتاتۋعا ءماجبۇر بولعان. بىراق بۇل ارادا ورىن العان جاعدايعا قازترانسگاز دا, كورشى ەل دە كىنالى ەمەس. كەلىسىم بويىنشا جەرگىلىكتى اكىمدىكتەر قوسىمشا وتىن قورىن ىسكە قوسۋى كەرەك ەدى. ولار وسى مىندەتىن دەر كەزىندە ورىندامادى. سونىڭ سالدارىنان جايسىز اقپاراتتار تاراپ كەتتى», دەپ جاۋاپ بەردى س.سۇلتانعالي. قازىرگى كەزدە كوگىلدىر وتىنعا قاتىستى تۋعان ماسەلەلەر تولىق شەشىمىن تاۋىپ, قالىپتى ءومىر قايتا ورالىپتى.
تىلشىلەردىڭ تاعى ءبىر سۇراعى استانانى جانە ونىڭ ماڭىنداعى ەلدى مەكەندەردى گازداندىرۋ جوباسىنىڭ جايى تۋرالى بولدى. باس ديرەكتوردىڭ ايتۋىنا قاراعاندا, وتكەن اپتادا ۇكىمەت باسشىسى سەرىك احمەتوۆتىڭ قاتىسۋىمەن بولعان وتىرىستا وسى ماسەلە كوتەرىلىپ, وتكىر قىرلارى تالقىلاۋعا ءتۇسىپتى. وتاندىق ساراپشى ماماندار بۇعان دەيىن قاراستىرىلىپ كەلگەن توبىل ارقىلى رەسەي گازىن ەلورداعا تارتۋ جوباسىن جارامسىز دەپ تاۋىپتى. سەبەبى, ول بىرىنشىدەن, تىم قىمبات بولسا, ەكىنشىدەن, استاناعا جوعارىدا ايتىلعان «بەينەۋ-بوزاي-شىمكەنت» ماگيسترالدى گاز قۇبىرىنان كوگىلدىر وتىن جەلىسىن تارتقان الدەقايدا ءتيىمدى كورىنەدى. بۇل جوبا ەكونوميكالىق تاۋەلسىزدىگىمىزدى نىقتاي تۇسەتىن كورىنەدى.
ىرگەسىنە گاز قۇبىرى كەلىپ توقتاعان وڭتۇستىك قالالارىندا گازداندىرۋ ءىسىنىڭ نەگە ىركىلىپ تۇرعانى تۋرالى سۇراق تا كولدەنەڭ تارتىلدى. وعان باس ديرەكتور «الدىڭا اكەلىپ اس قويدىم, ەكى قولىڭدى بوس قويدىم» دەپ جاۋاپ بەردى. ياعني, قازترانسگازدىڭ مىندەتى كوگىلدىر وتىندى قالا ىرگەسىنە جەتكىزىپ بەرۋ. ونى ءارى قاراي جەرگىلىكتى اكىمدەر تارتىپ الىپ كەتۋى كەرەك. باس ديرەكتور جۋرناليستەردىڭ بارلىق سۇراقتارىنا جاۋاپ بەرە كەلىپ, كومپانيا قاي كەزدە دە تەك حالىقتىق مۇددەگە قىزمەت ەتە بەرەتىنىن جەتكىزدى.
نۇرباي ەلمۇراتوۆ,
«ەگەمەن قازاقستان».