«Nur Otan» جانىنداعى وتباسى, ايەلدەر جانە بالالاردىڭ قۇقىقتارىن قورعاۋ ماسەلەلەرى جونىندەگى رەسپۋبليكالىق قوعامدىق كەڭەستە جوو, كوللەدجدەر, مەكتەپتەر مەن بالاباقشالاردا ينكليۋزيۆتى ءبىلىم بەرۋ ءۇشىن جاعداي جاساۋ جانە سايلاۋالدى ۋادەلەردى ورىنداۋدىڭ باسقا دا وزەكتى ماسەلەلەرى قارالدى, دەپ حابارلايدى Egemen.kz پارتيانىڭ ءباسپاسوز قىزمەتىنە سىلتەمە جاساپ.
وتىرىسقا قاتىسۋشىلار مەكتەپكە باراتىن ەرەكشە بالالاردى ادىستەمەلىك سۇيەمەلدەۋ ماسەلەلەرىن تالقىلادى. كەڭەس مۇشەسى, «بولاشاق» قورىنىڭ باسشىسى دينارا ءشايجۇنىسوۆانىڭ ايتۋىنشا, پەداگوگ-اسسيستەنتتەردىڭ شامادان تىس جۇكتەمەسى ءتۇيىندى ماسەلەلەردىڭ ءبىرى بولىپ وتىر.
«قازىرگى تاڭدا ولار ايىنا 90 مىڭ تەڭگە جالاقىعا جۇمىس ىستەپ, كەم دەگەندە 2 بالانى وقىتىپ, قولعابىس جاسايدى. ماماندار تۇراقتامايتىندىقتان, بالالار وقي الماي, قامقورلىقسىز قالادى. وسىنىڭ سالدارىنان كەيدە بالالار تولىقتاي ءبىر وقۋ جىلى بويى ءبىلىم الا الماعان جاعدايلار دا بار. ءبىزدىڭ جوبادا 300-گە جۋىق پەداگوگ-اسسيستەنت جۇمىس ىستەيدى. ولاردىڭ بارلىعى ەڭبەكاقىنىڭ ازدىعىنان جۇمىستان كەتكىسى كەلەدى», دەدى دينارا ءشايجۇنىسوۆا.
ءبىلىم جانە عىلىم مينيسترلىگىنىڭ اقپاراتىنا سەنسەك, ەلىمىزدە مىڭعا جۋىق پەداگوگ-اسسيستەنت جۇمىس ىستەيدى, قوسىمشا ءپان مۇعالىمدەرى ارنايى كۋرستاردان ءوتىپ جاتىر. ال جالاقىنىڭ تومەن بولۋى ولاردىڭ بىلىكتىلىك دەڭگەيىنە بايلانىستى كورىنەدى.
وتىرىس بارىسىندا كەڭەس مۇشەلەرى ينتەرناتتاردىڭ دا جاي-كۇيىن تالقىلادى. بۇگىندە ەلىمىزدە بارلىعى 577 ينتەرنات بار, ولاردا 147 مىڭنان استام بالا تۇرادى. بۇل – كورۋ, ەستۋ قابىلەتى بۇزىلعان بالالارعا ارنالعان ارنايى ينتەرناتتار, مەديتسينالىق-الەۋمەتتىك مەكەمەلەر جانە دارىندى بالالارعا ارنالعان ماماندانعان, سونداي-اق كوپبالالى جانە از قامتىلعان وتباسىلاردان شىققان بالالارعا ارنالعان ينتەرناتتار, مەكتەپ جانىنداعى ينتەرناتتار, مەكتەپ-ينتەرناتتار.
كەڭەس توراعاسى, ءماجىلىس دەپۋتاتى دينارا زاكيەۆانىڭ ايتۋىنشا, 2019 جىلدىڭ اقپان ايىندا كەڭەس كەيبىر ينتەرناتتاعى ادام شوشىرلىق جاعداي تۋرالى ماسەلە كوتەرگەن بولاتىن. «Nur Otan» ارالاسقاننان كەيىن عانا 19 ينتەرنات جوندەلىپ, كارىز جۇرگىزىلىپ, جيھاز بەن جابدىق جاڭارتىلعان. الايدا, بۇل ماسەلە بارلىق ينتەرناتتاعى بالالاردىڭ ءومىرىن تۇبەگەيلى وزگەرتۋ جانە جاقسارتۋ ءۇشىن ۇنەمى نازار اۋدارۋدى جانە جۇيەلى جۇمىستى تالاپ ەتەدى.
ء«تيىستى دەپۋتاتتىق ساۋال وسى جىلدىڭ اقپان ايىندا جولداندى. وسىعان قاراماستان, 2 جىل ىشىندە ءبىلىم مينيسترلىگى تاراپىنان ەشقانداي جۇيەلى ءىس-قيمىل اتقارىلمادى. ءبىلىم جانە عىلىم مينيسترلىگى ەلىمىزدەگى بالالاردىڭ قۇقىعىن قورعاۋعا جاۋاپتى ەكەنىن تۇسىنە مە؟ ءبىز وڭىرلىك كەڭەستەردەن ينتەرناتتار بويىنشا ءوز بەتىنشە جۇمىس جۇرگىزۋدى, ولاردىڭ ارقايسىنداعى جاعدايدى جاقسارتۋ ءۇشىن اكىمدىكتەرمەن بىرلەسىپ شەشىم قابىلداۋدى سۇرادىق. سودان كەيىن عانا قولىمىزعا قانداي ينتەرناتتا كۇردەلى نەمەسە اعىمداعى جوندەۋ جۇرگىزىلگەنى نەمەسە جۇرگىزىلەتىنى, نە قاجەت ەكەنى تۋرالى ناقتى اقپارات ءتيدى. بۇل باعىتتاعى جۇمىستاردى جالعاستىرامىز, ال وڭىرلىك كەڭەستەر ءاربىر ينتەرناتتاعى جاعدايدى جاقسارتۋ بويىنشا مىندەتتىڭ ورىندالۋىن باقىلاۋعا الادى. ءبىزدىڭ ماقساتىمىز – ەلىمىزدەگى بارلىق ينتەرناتتى بالالاردىڭ ءومىر سۇرۋىنە قولايلى ەتۋ», دەدى ول.
كەڭەس مۇشەلەرى 534 ينتەرناتتاعى جاعدايدى زەرتتەدى. دينارا زاكيەۆانىڭ ايتۋىنشا, بارلىق ينتەرناتتى كۇردەلى جانە اعىمداعى جوندەۋدەن وتكىزگەن جالعىز ايماق – پاۆلودار وبلىسى. سونداي-اق, بۇل ىستە قوستاناي وبلىسى دا الدا كەلەدى: وبلىستاعى 36 ينتەرناتتىڭ 29-ى جوندەلگەن. سوڭعى 3 جىلدا ينتەرناتتارى مۇلدەم جوندەۋ كورمەگەن قىزىلوردا مەن ماڭعىستاۋ وبلىستارىنداعى جاعداي بارىنەن ناشار.
«الماتى وبلىسىندا تەك 3 مەكەمەگە كۇردەلى جوندەۋ جۇرگىزىلسە, ال قالعان مەكەمەلەردە ءتىپتى جوسپارلانباعان. تۇركىستان وبلىسىندا تەك 1 مەكەمەدە كۇردەلى جوندەۋ جۇرگىزىلدى, بۇل – ءبىز بارىپ, ماسەلە كوتەرگەن ينتەرنات. بىراق وڭىردە بۇدان باسقا تاعى 40 ينتەرنات بار. قاراعاندىداعى №68 مەكتەپ-ينتەرناتىندا جاتاقحانا مەكتەپتىڭ ءبىرىنشى قاباتىندا ورنالاسقان, مۇندا ءبىر بولمەدە 15-تەن 25-كە دەيىن بالا تۇرادى. وسى جاعدايعا قاراعاندىداعى ارىپتەستەرىمنىڭ نازارىن اۋدارعىم كەلەدى», دەپ قوستى ول.
ينتەرنات مەكەمەلەرىندەگى جاعدايدى جاقسارتۋ ءۇشىن اقتوبە, قىزىلوردا, اقمولا جانە ماڭعىستاۋ وبلىستارىندا ءتيىستى جوسپار جوق.
ءبىلىم جانە عىلىم ۆيتسە-ءمينيسترى شولپان كارينوۆانىڭ ايتۋىنشا, بىرلەسكەن بۇيرىق جوباسى ازىرلەنگەن. وعان سايكەس بالالاردىڭ, ونىڭ ىشىندە اتا-اناسىنىڭ قامقورلىعىنسىز قالعان جەتىم بالالاردىڭ ءبىلىم الۋ, تاماقتانۋ, تاسىمالداۋ, دەمالۋ قۇقىعىن ساقتاۋ مونيتورينگى مەن باقىلاۋى جوسپارلى تۇردە جۇرگىزىلەتىن بولادى. بۇدان باسقا, اكىمشىلىك قۇقىق بۇزۋشىلىق تۋرالى كودەكسكە تەكسەرۋ قورىتىندىلارى بويىنشا شىعارىلعان نۇسقامالاردى ورىنداماعانى ءۇشىن اكىمشىلىك جاۋاپكەرشىلىككە تارتۋ قۇقىعىن بەرۋ بولىگىندە تۇزەتۋلەر ەنگىزىلەدى.
وتىرىس قورىتىندىسى بويىنشا كەڭەس ءبىلىم جانە عىلىم مينيسترلىگىنەن 2022 جىلى ينكليۋزيۆتى ءبىلىم بەرۋ ءۇشىن جاعداي جاساۋ جوسپارلانىپ وتىرعان مەكەمەلەردىڭ ءتىزىمىن, سونداي-اق انىقتالعان پروبلەمالاردى, ولاردى شەشۋ مەرزىمدەرى مەن جولدارىن كورسەتە وتىرىپ, ينتەرناتتىق مەكەمەلەر مونيتورينگىنىڭ ناتيجەلەرى بويىنشا ەسەپ بەرۋدى سۇرادى. سونىمەن قاتار, كەڭەس مۇشەلەرى ينتەرناتتىق مەكەمەلەر بويىنشا نورماتيۆتىك-قۇقىقتىق اكتىلەردى قايتا قاراۋدى ۇسىندى.