فرانتسيادا پاندەميا باستالعالى العاش رەت تۋريزمگە ارنالعان كورمە اشىلدى, دەپ حابارلايدى Egemen.kz.
حابار24 ارناسىنىڭ مالىمدەۋىنشە, بىلتىر الەمدىك تۋريزم سالاسى 1 تريليون دوللاردان اسا كىرىسىنەن ايىرىلىپ, اۋىر كەزەڭدى باستان كەشكەن. كوروناۆيرۋس ىندەتى فرانتسيانىڭ دا تۋريزم يندۋسترياسىن تۇرالاتىپ تاستادى.
پاندەمياعا دەيىن ەلدىڭ ىشكى جالپى ءونىمىنىڭ 7 پروتسەنتىن قۇراپ كەلگەن سالا ۇلكەن شىعىنعا باتتى. قازىرگە دەيىن كوپتەگەن مەملەكەتتىڭ تۋريستەرى ءۇشىن شەكارا ءالى جابىق. سوندىقتان بولسا كەرەك سوڭعى 2 جىلدا العاش رەت وتكىزىلىپ وتىرعان كورمەدە ويىن-ساۋىق پەن اسەم بەزەندىرۋلەر از.
ء«بىزدىڭ ەلدەردەگى ىندەتكە قارسى شارالار ۆيرۋسقا توسقاۋىل قويىپ, بۇرىنعى بايلانىسىمىز تەزدەتىپ قالپىنا كەلەدى دەپ ۇمىتتەنەمىن. قازاقستان مەن فرانتسيانىڭ ستراتەگيالىق سەرىكتەستىگى مىعىم. بىراق شەتەلدىك تۋريستەردى قابىلداۋدىڭ قاشان تولىق قالپىنا كەلەتىنى جايلى ايتۋ قيىن. ماسەلە كوپ ۇزاماي شەشىلەدى دەپ ويلايمىن», دەيدى فرانتسيا سىرتقى ىستەر مينيسترلىگى جانىنداعى تۋريزم جونىندەگى مەملەكەتتىك حاتشى جان-باتيست لەمۋان.
ال فرانتسياعا ساياحاتتاعىسى كەلەتىن وتانداستارىمىزعا ءبىراز توزىمدىلىك تانىتۋعا تۋرا كەلەدى. بۇل ەلگە ۆاكتسيناسىز كىرۋگە بولاتىن مەملەكەتتەر ءتىزىمى ءار 2 اپتا سايىن قاراستىرىلادى. فرانتسۋزدار بولسا ءبىزدىڭ ەلگە وزگە ەۋروپالىقتار سياقتى ەش كەدەرگىسىز ساياحاتتاي الادى. قازىر ەلدە ازياعا بارعىسى كەلەتىندەردىڭ قاراسى كوبەيگەن.
ء«بىز ازياعا ساياحاتتاعىسى كەلەتىن ازاماتتاردان ءبىراز شىدامدىلىق تانىتۋدى سۇرايمىز. قازىر بىرقاتار مەملەكەت شەكاراسىن اشىپ, شەتەلدىكتەردى قابىلداي باستادى. يوردانيا, يزرايل, ورتالىق ازيا مەن موڭعولياعا تۋريستەر ەش كەدەرگىسىز بارا الادى. بۇل باعىتتاردىڭ بارىنە كەپىلدىك بەرەمىز. بىراق ازياداعى ءىرى باعىتتاردىڭ اشىلۋىن ءالى كۇتە تۇرۋعا تۋرا كەلەدى», دەيدى «Asia» كومپانياسىنىڭ ساتۋ بويىنشا ديرەكتورى ميشەل تيسسە.
سوڭعى ونجىلدىقتا الەمدە تۋريزم قارقىندى دامىپ, شەتەلگە ساياحات جاساۋشىلار ارتقان ەدى. بىراق بىلتىر ىندەتتەن جاھاندىق تۋريزم كىرىسى 74 پايىزعا تومەندەدى. ساراپشىلار سالانىڭ قالپىنا كەلۋى ۇزاققا سوزىلاتىنىن ايتادى. دۇنيەجۇزىلىك تۋريزم ۇيىمىنىڭ مالىمەتىنشە, بۇل سالا الدىمەن تاياۋ شىعىس پەن افريكادا جاندانىپ, امەريكا, ەۋروپا جانە ازيا باعىتتارى تەك 2024 جىلى قالپىنا كەلۋى مۇمكىن.