پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ باستاعان جۇمىس توبى الماتىدا بولدى.
ۆيتسە-پرەمەر بىرقاتار ءوندىرىس ورىندارىن ارالاپ, وڭىردە ۇدەمەلى يندۋستريالىق-يننوۆاتسيالىق دامۋ باعدارلاماسىن جۇزەگە اسىرۋ جانە الماتى قالاسىندا يننوۆاتسيالىق كلاستەردى قالىپتاستىرۋ ماسەلەلەرى بويىنشا كەڭەس وتكىزدى.
جۇمىس توبىنىڭ ساپارى ينفەكتسياعا قارسى پرەپاراتتاردىڭ عىلىمي ورتالىعى قىزمەتىمەن تانىسۋدان باستالدى. ورتالىق وتكەن جىلى قۇرت اۋرۋىنا قارسى جاڭا دارىلىك ءونىمنىڭ كلينيكالىق سىناۋلارىنىڭ ءۇشىنشى كەزەڭىن باستاعان بولاتىن. يندۋستريا جانە جاڭا تەحنولوگيالار مينيسترى ارالاعان ەكىنشى نىسان «نوبەل» فارماتسەۆتيكالىق فابريكاسى بولدى. 2011 جىلى يندۋستريالاندىرۋ كارتاسى اياسىندا كومپانيا فارماتسەۆتيكالىق ءوندىرىسىن حالىقارالىق ستاندارتتارعا سايكەستەندىرىپ جاڭارتقان بولاتىن. سونىڭ ارقاسىندا ءوندىرىس قۋاتتىلىعى 50 پايىزعا ارتىپ, ءونىم تۇرلەرى كوبەيە تۇسكەن.
سونداي-اق, اسەت يسەكەشەۆ «راحات» كونديتەرلىك فابريكاسىنىڭ جۇمىسىمەن دە تانىستى. وتكەن جىلى كومپانيانىڭ باسشىلىعى اۋىسىپ, كاسىپورىننىڭ باسقارۋ تىزگىنى كورەيالىق ينۆەستورلارعا وتكەنى بەلگىلى. ۆيتسە-پرەمەر ءوندىرىس تەحنولوگياسىن ءوز كوزىمەن كورىپ, ەلىمىزدەگى بىردەن-ءبىر برەند ءونىم شىعارىپ وتىرعان كاسىپورىننىڭ جۇمىسىمەن ەتەنە تانىستى. «راحات» فابريكاسىنىڭ ونىمدەرى تمد كولەمىندە دە, الىس شەتەلدەردە دە, ماسەلەن, گەرمانيا, اۋعانستان سەكىلدى ەلدەردە دە تانىمالدىعى جانە وتىمدىلىگى جاعىنان الدىڭعى لەكتە.
بۇدان وزگە ۆيتسە-پرەمەر باستاعان توپ ءال-فارابي اتىنداعى قازاق ۇلتتىق ۋنيۆەرسيتەتىندە بولىپ, ول جەردە جاس عالىمدارمەن كەزدەستى. ءا.يسەكەشەۆ باسقوسۋ بارىسىندا يندۋستريا جانە جاڭا تەحنولوگيالار مينيسترلىگىنىڭ قاتىسۋىمەن وڭىرلەردە يننوۆاتسيالىق كلاستەردى قالىپتاستىرۋ ءىسى قولعا الىنعاندىعىن ايتىپ ءوتتى. تۇستەن كەيىن قالالىق اكىمدىكتە ءمينيستردىڭ قاتىسۋىمەن ۇدەمەلى يندۋستريالىق-يننوۆاتسيالىق دامۋ باعدارلاماسىن جۇزەگە اسىرۋ ماسەلەلەرى بويىنشا كەڭەيتىلگەن كەڭەس ءوتتى.
الماتىلىق بيزنەس وكىلدەرى قاتىسقان كەڭەس ناتيجەسى بويىنشا قالا اكىمى احمەتجان ەسىموۆ پەن ۆيتسە-پرەمەر – يندۋستريا جانە جاڭا تەحنولوگيالار ءمينيسترى اسەت يسەكەشەۆ 2014 جىلعا ارنالعان كەلىسىلگەن ءىس-ارەكەتتەر جوسپارىنا جانە تۋريزم سالاسىنداعى ىنتىماقتاستىق تۋرالى مەموراندۋمعا قول قويدى.
قانات ەسكەندىر,
«ەگەمەن قازاقستان».
الماتى.