تاۋەلسىزدىكتىڭ 30 جىلدىعىنا وراي ەلورداداعى جالپى ورتا ءبىلىم بەرەتىن مەكەمەلەردىڭ «جاس سارباز» تاربيەلەنۋشىلەرى اراسىندا ءداستۇرلى «جاس سارباز – تاۋەلسىزدىك تىرەگى» كۇزگى اسكەري-پاتريوتتىق ويىندارى ءوتتى.
«جاس سارباز» جاسوسپىرىمدەر اسكەري-پاتريوتتىق قوزعالىسى رقب ەلوردالىق فيليالى ۇيىمداستىرعان بۇل ءىس-شارا نۇر-سۇلتان قالاسى اكىمدىگى, «استانا جاستارى» كمم, قارۋلى كۇشتەردىڭ ۇلتتىق اسكەري-پاتريوتتىق ورتالىعىنىڭ جانە نۇر-سۇلتان قالاسى قورعانىس ىستەرى دەپارتامەنتىنىڭ قولداۋىمەن جۇرگىزىلىپ وتىر. ادەتتەگىدەي اسكەري بولىمدەردىڭ بازاسىندا كەزەكتەسىپ جۇرگىزىلەتىن جارىستار بۇل جولى قالامىزداعى ۇلتتىق ۇلاننىڭ 5573 اسكەري ءبولىمىنىڭ اۋماعىندا بولدى.
ءىس-شارا بارىسىندا جاس ورەندەرگە ناعىز اسكەري ءومىردىڭ قىر-سىرلارى تانىستىرىلىپ, پاتريوتتىق تاربيەلەۋگە باعىتتالعان جارىستار ۇيىمداستىرىلدى.
3 كۇنگە سوزىلعان جيىندا تاربيەلەنۋشىلەر اسكەري-قولدانبالى سپورت تۇرلەرىنەن سايىسقا ءتۇستى. اتاپ ايتار بولساق, بەلتەمىرگە تارتىلۋ, اۆتوماتتى بولشەكتەۋ, حيميالىق قارۋدان قورعانىش كوستيۋمىن كيۋ, العاشقى مەديتسينالىق كومەك كورسەتۋ بويىنشا نورماتيۆتەردى ورىنداۋ, «Smart Sarbaz» روبوتتەحنيكا سايىسى. اسكەري ءبولىم ۇيىمداستىرۋىمەن اسكەري ءانسامبلى كونتسەرتى, اسكەري قارۋ-جاراقتار مەن تەحنيكانىڭ تۇرلەرى, ساربازداردىڭ تۇرمىس-تىرشىلىگى مەن ورىندايتىن تاپسىرمالارى, قولما-قول ۇرىس پەن جەكپە-جەك تاسىلدەرى كورسەتىلدى.
سايىستار بويىنشا جالپى كوماندالىق ەسەپ جاسالىپ, ۇزدىكتەر انىقتالدى. جەكەلەگەن سايىستار بويىنشا ۇزدىك كورسەتكىش كورسەتكەن «جاس سارباز» تاربيەلەنۋشىلەرى رەسپۋبليكالىق «ايبىن» اسكەري-پاتريوتتىق جيىنىندا نۇر-سۇلتان قالاسىنىڭ نامىسىن قورعايدى.