قازىرگى كەزدە قوعامدا قاۋىپتى قۇبىلىستار كوپ. وكىنىشكە قاراي, كەيدە ءتۇرلى جاعدايدا بالالار دا زارداپ شەگىپ جاتادى. باعا جەتپەس بايلىعىمىز بولعان بەيكۇنا جاندار ءۇشىن ءبىرىنشى كەزەكتە اتا-اناسى جاۋاپتى. الايدا بۇگىندە ولار دا جۇمىستا بولۋىنا بايلانىستى كوپ جاعدايدا بالالارىن ۇيدە جالعىز قالدىرۋعا ءماجبۇر.
ماسەلەن, كەيىنگى كەزدە جامبىل وبلىسىندا بالالاردىڭ بيىكتەن قۇلاۋ دەرەگى جيىلەگەن. ءتىپتى وتكەن جىلمەن سالىستىرعاندا وڭىردە بالالاردىڭ بيىكتەن قۇلاۋ وقيعاسى 4 پايىزعا وسكەن. وسى ورايدا, ماماندار اتا-انالارعا ەگەر بالا ۇيدە بولسا, تەرەزەنى اشىق قالدىرماۋ كەرەكتىگىن, ەگەر تەرەزەنىڭ ءتيىستى قورعانىشى بولماسا, جاي توردى سەنىمدى تىرەك رەتىندە پايدالانباۋ قاجەتتىگىن ەسكەرتۋدە. ەڭ باستىسى, بالالاردى قاراۋسىز قالدىرماۋ كەرەكتىگى ايتىلۋدا.
بالالارعا قاتىستى كەز كەلگەن ماسەلە قوعامداعى كۇردەلى ماسەلەلەردىڭ ءبىرى. مۇنداي جاعداي كوبىنەسە بالالاردىڭ قاراۋسىز قالعانىنان بولادى ەكەن. ال وبلىستىق توتەنشە جاعدايلار دەپارتامەنتى توتەنشە جاعدايلاردىڭ الدىن الۋ باسقارماسىنىڭ باستىعى, ازاماتتىق قورعاۋ پولكوۆنيگى تالعات ايتباەۆتىڭ ايتۋىنشا, وڭىردە جىل باسىنان بەرى 14 بالا كوپقاباتتى تۇرعىن ۇيلەردەن قۇلاعان. ولاردىڭ ىشىندە 2 جاستاعى سابيدەن باستاپ, 15 جاستاعى جەتكىنشەكتەر دە بار. اتالعان توتەنشە وقيعالار كەزىندە 2 بالا كوز جۇمعان. بۇل كورسەتكىشتىڭ وتكەن جىلدىڭ وسى كەزەڭىمەن سالىستىرعاندا 4 پايىزعا وسكەنىن اڭعارۋعا بولادى. ياعني بىلتىر 9 وقيعا تىركەلىپ, 6 جاستاعى ءبىر جەتكىنشەك مەرت بولعان.
«بالالاردىڭ تەرەزە الدىنا شىعىپ كەتۋىنە مۇمكىندىك تۋعىزاتىن جيھازداردى ول تۇستان قاشىققا قويعان ابزال. ءۇي ىشىندە قاۋىپسىزدىك ساباقتارىن وتكىزۋ دە ارتىق بولمايدى. اسىرەسە, ۇلكەندەرىمىزدىڭ كىشكەنتاي بۇلدىرشىندەرگە قامقور بولۋدى ۇيرەنگەنى ءجون. بالالار تەرەزەنى ءوز بەتتەرىنشە اشپاس ءۇشىن تەرەزەگە بلوكتاۋىش نەمەسە تۇتقاسىنا ق ۇلىپ ورناتۋ كەرەك», دەيدى ول.
ارينە, ادام شىعىنى, ونىڭ ىشىندە بالا ءولىمى اركىمگە دە وڭاي تيمەيتىنى انىق. دەگەنمەن, ءتيىستى ماماندار قاۋىپسىزدىك ماسەلەسىن قاپەردە ۇستاۋ كەرەكتىگىن ايتۋدا. بۇل رەتتە توتەنشە جاعدايلار دەپارتامەنتى مەن اۋماقتىق بولىمشەلەر قىزمەتكەرلەرى, جەرگىلىكتى پوليتسيا قىزمەتىنىڭ وكىلدەرى جانە ەرىكتىلەر بىرلەسىپ 21 307 تۇرعىن ۇيدە 53 مىڭنان استام ادامنىڭ قاتىسۋىمەن ءتۇسىندىرۋ جۇمىستارىن جۇرگىزگەن. الايدا قازىرگى كەزدە بالالاردىڭ بيىكتەن قۇلاۋ دەرەگى ازايماي وتىر. قايتا ۋاقىت وتكەن سايىن كورسەتكىشتەر ارتىپ, قاۋىپتى قۇبىلىستار ءجيى ورىن الۋدا. بۇل دا ءوز كەزەگىندە وزگە اتا-انالاردىڭ الاڭداۋشىلىعىن تۋدىرادى.