جىل باسىنان بەرى 720 قازاقستاندىق زارداپ شەككەندەرگە كومەك قورىنان تولەم العان. 2020 جىلمەن سالىستىرعاندا ولاردىڭ سانى ءۇش ەسەگە جۋىق ءوستى, دەپ جازادى Egemen.kz.
«2021 جىلدىڭ سەگىز ايىندا 720 قۇربانعا وتەماقى تولەندى. تولەمدەردىڭ جالپى سوماسى 93 ميلليون 723 مىڭ تەڭگەنى قۇرايدى. مىسالى, 2020 جىلى زارداپ شەككەندەردىڭ جالپى سانى 262 ادام بولعان», دەدى ءىىم تەرگەۋ باسقارماسى باسشىسى سانجار ءادىلوۆ ورتالىق كوممۋنيكاتسيالار قىزمەتىندە وتكەن بريفينگتە.
ول قور مەملەكەتتىك بيۋدجەتتەن قارجىلاندىرىلمايتىنىن, بىراق ونىڭ بەس قارجىلاندىرۋ كوزى بار ەكەنىن اتاپ ءوتتى. ولار:
- قىلمىستىق قۇقىق بۇزعانى ءۇشىن سوتتالعان ادامداردان سوت ءوندىرىپ العان ءماجبۇرلى تولەمدەر;
- پروتسەسسۋالدىق مىندەتتەردى ورىنداماعانى ءۇشىن سوت تاعايىنداعان اقشالاي ايىپپۇلدار;
- تۇزەۋ جۇمىستارىنان تۇسەتىن تۇسىمدەر;
- شاعىم تالاپ ەتۋ جولىمەن جينالعان اقشا;
- قازاقستان زاڭناماسىندا تىيىم سالىنباعان باسقا دا كوزدەر (دەمەۋشىلەر جانە قايىرىمدىلىق قىزمەتى).
وتەماقى زارداپ شەككەندەردىڭ ءۇش ساناتىنا بەرىلەدى.
ءبىرىنشى ساناتقا سەكسۋالدىق زورلىق-زومبىلىق قۇرباندارى جانە ادام ساۋداسى مەن ازاپتاۋعا بايلانىستى قىلمىستاردىڭ قۇربانى دەپ تانىلعان كامەلەتكە تولماعاندار كىرەدى. ولار ءۇشىن وتەماقى مولشەرى شامامەن 90 مىڭ تەڭگەنى قۇرايدى.
ەكىنشى ساناتقا اۋىر جاراقات العان نەمەسە ايتۆ جۇقتىرعان ادامدار جاتادى. وتەماقى مولشەرى - شامامەن 120 مىڭ تەڭگە.
ءۇشىنشى سانات - جابىرلەنۋشى قايتىس بولعان جاعدايدا ونىڭ قۇقىقتارى بەرىلگەن ادامدار. وتەماقى مولشەرى - شامامەن 150 مىڭ تەڭگە.