نەسىن جاسىرامىز, «ورالحاننىڭ ءبىر ءمۇسىنى وزىنە ۇقسامادى» دەپ زامانداستارىنىڭ كوڭىلدەرى تولمايتىن. ءساتسىز شىققان ەسكەرتكىشىنىڭ قاتارىندا وسكەمەندەگى ءبيۋستى دە بار ەدى. ول كەۋدە مۇسىندەگى ۇقساستىقتىڭ جوقتىعى ءوز الدىنا, ءمۇجىلىپ, توزىپ بارا جاتقان. مۇنى ەسكەرگەن قالا باسشىلىعى جازۋشىنىڭ تۋعان كۇنى قارساڭىندا قولادان قۇيىلعان ەسكەرتكىشىن تۇعىرعا قوندىردى.
ەسكەرتكىشتىڭ اشىلۋ سالتاناتىندا وبلىستىڭ زيالى قاۋىمى «مىنە, ءمۇسىن» دەسىپ جاتتى. راسىمەن, تۇعىرى بيىك ءمۇسىن ەڭسەلى ەكەن. ادەتتەگىدەي قاقيعان بيۋست ەمەس. قوزعالىس بار. كۇرتەسىن يىعىنا ءىلىپ, التايعا, شىڭعىستايىنا كوز تاستاپ تۇرعانداي.
كوپشىلىكتىڭ كوڭىلىنەن شىققان جاڭا ەسكەرتكىشتىڭ اۆتورلارى – بەلگىلى مۇسىنشىلەر نۇربول قاليەۆ پەن مەيرام بايمۇحانوۆ. قالامگەر بولمىسى مەن تۇلعاسىن سيپاتتايتىن ءمۇسىن قولادان قۇيىلعان. ەسكەرتكىشتىڭ تۇعىرى تۇتاس گرانيتتەن سوعىلعان, جالپى بيىكتىگى – 4, 8 مەتر.
– ءمۇسىن سوعۋدى وقۋشى كەزدەن باستاعام. وسى كۇنگە دەيىن وبلىس كولەمىندە ون شاقتى ءمۇسىنىم تۇعىرعا قوندى. ولاردىڭ قاتارىندا قۇنانباي, اباي, ورالحان, بايمۇرات باتىر قاتارلى تۇلعالاردىڭ ەسكەرتكىشتەرى بار. وسى ورالحان بوكەي ءبيۋستىن سوعۋعا جارتى جىل ۋاقىتىمىز كەتتى. ەسكەرتكىشتى جاساۋ بارىسىندا قالامگەردىڭ مىنەزىن, بولمىسىن, اسقاقتىعىن اشۋعا تىرىستىق. بۇرىنعى ورالحان بەتوننان سوعىلسا, بۇل جولعى ورالحان – قولادان. تۇعىرى تۇگەل گرانيتتەن جاسالعان, – دەيدى نۇربول قاليەۆ.
شاھار باسشىسى جاقسىلىق وماردىڭ ايتۋىنشا, جازۋشى ءمۇسىنى تۇرعان وتەپوۆ كوشەسىنە ورالحان بوكەيدىڭ ەسىمى بەرىلۋى مۇمكىن. ول جونىندە ونوماستيكا كوميسسياسىنا حالىقتان ۇسىنىس-پىكىرلەر ءتۇسىپ جاتىر. ەگەر بۇل كوشەگە جازۋشىنىڭ اتى بەرىلسە, شىعارماشىلىق ۇيلەسىم تابار ەدى. ويتكەنى ورالحان بوكەي اتىنداعى №44 مەكتەپ تە وسى كوشەدە ورنالاسقان.
ەسكەرتكىشتىڭ اشىلۋ سالتاناتىنا قاتىسقان زيالى قاۋىم وكىلدەرى دە ءمۇسىننىڭ بۇرىنعىدان مازمۇندى شىققانىن قۋانىپ قايتتى.
– ەلگە, جەرگە ەڭبەگى سىڭگەن تۇلعانى ۇرپاعى ۇمىتپاۋى ءۇشىن ەسكەرتكىش كەرەك-اق. ەكىنشىدەن, ءمۇسىنشىنىڭ شەبەرلىگى دە وسىندايدا تانىلادى. بۇگىن سالتاناتتى تۇردە اشىلىپ وتىرعان جازۋشىنىڭ كەۋدە ءمۇسىنى جاقسى شىققان, – دەدى جازۋشى الىبەك قاڭتارباەۆ.