قر اشم ۆەتەرينارلىق باقىلاۋ جانە قاداعالاۋ كوميتەتى توراعاسىنىڭ مىندەتىن اتقارۋشى باۋىرجان ابىزباەۆ باستاعان رەسپۋبليكالىق كوميسسيا سولتۇستىك قازاقستان وبلىسى ماعجان جۇماباەۆ اۋدانى لەبياجە اۋىلىنا بارىپ, قۇس تۇماۋىنىڭ تارالۋىنا جول بەرمەۋ ماقساتىندا جاسالىپ جاتقان كەشەندى شارالاردىڭ بارىسىن تەكسەردى, دەپ حابارلايدى Egemen.kz.
كوميسسيا تاراپىنان ەپيزووتيالىق جاعداي زەردەلەنىپ, سۋ ايدىنىنا مونيتورينگ جۇرگىزىلدى, اۋرۋدى جويۋ اۋقىمى انىقتالىپ, حالىق اراسىندا ءتۇسىندىرۋ جۇمىستارى جۇرگىزىلدى.
ينفەكتسيا وشاعىن دەر كەزىندە, جەدەل وقشاۋلاۋ جانە جويۋ ءۇشىن ەلدى مەكەننىڭ پەريمەترى بويىنشا جەرلەردى جىرتۋ جۇمىستارى جۇرگىزىلدى, كىرەتىن جانە شىعاتىن اۆتوكولىكتەردى دەزينفەكتسيالاۋ ءۇشىن دەزبارەر ورناتىلدى.
«ەپيزووتيالىق تىزبەكتى ءۇزۋ ماقساتىندا وشاقتاعى قۇستاردىڭ بارلىعىن جويۋ تۋرالى شەشىم قابىلداندى. الىنعان جانە جويىلعان قۇستىڭ يەلەرىنە وتەماقى تولىق كولەمدە تولەنەدى. رەسەيمەن شەكارالاس اۋماقتاردا جانۋارلاردى ۆاكتسيناتسيالاۋ ءۇشىن جوعارى پاتوگەندى قۇس تۇماۋىنا قارسى 112,2 مىڭ دوزا وتاندىق پرەپاراتتار بولىنەدى», دەلىنگەن اقپاراتتا.
ەپيزووتيالىق جاعداي تۇراقتى باقىلاۋدا, ينفەكتسيانىڭ وبلىستىڭ باسقا ەلدى مەكەندەرىنە تارالۋىنا جول بەرمەۋ ماقساتىندا ۆاكتسيناتسيا جۇرگىزۋ جانە ءتىرى قۇس پەن قۇس شارۋاشىلىعى ونىمدەرىنىڭ قوزعالىسىنا باقىلاۋ ورناتۋ شارالارى قابىلدانۋدا.