اسقار مامين وڭدەۋشى ونەركاسىپكە قاتىستى بىرقاتار تاپسىرمالار بەردى

«مەملەكەت باسشىسى قاسىم-جومارت كەمەل ۇلى توقاەۆ قازاقستان حالقىنا جولداۋىندا 2025 جىلعا قاراي وڭدەۋشى ونەركاسىپ ەكسپورتىن 1,5 ەسە, ەڭبەك ونىمدىلىگىن 30 پايىزعا ۇلعايتۋ مىندەتىن قويدى. سوندىقتان يندۋستريالاندىرۋ كارتاسىنىڭ جوبالارىن ۋاقتىلى ءارى ساپالى ىسكە اسىرۋ وسى مىندەتتەرگە قول جەتكىزۋدەگى باستى ەلەمەنت بولىپ وتىر.

بيىل 1,2 ترلن تەڭگەگە 128 جوبا ىسكە قوسىلادى دەپ جوسپارلاپ وتىرمىز. بۇل ءوندىرىس كولەمىن 1 ترلن تەڭگەگە, ەكسپورتتى 800 ملن دوللارعا ۇلعايتۋعا, 12 مىڭعا جۋىق جۇمىس ورىنىن قۇرۋعا مۇمكىندىك بەرەدى», دەدى ا. مامين ۇكىمەت وتىرىسىندا.

وسى ورايدا ۇكىمەت باسشىسى جوبالاردى ىسكە قوسۋ جاعىنان قاراعاندى, الماتى وبلىستارى مەن شىمكەنت قالاسىندا وڭ سەرپىن بايقالعانىن ايتتى.

«ال 7 وڭىردە جوبالاردى ۋاقىتىلى ىسكە اسىرۋ بويىنشا جۇمىستى جانداندىرۋ كەرەك. بۇل اقتوبە, اقمولا, قىزىلوردا, پاۆلودار, تۇركىستان وبلىستارى مەن نۇر-سۇلتان جانە الماتى قالالارى. وڭىرلەردىڭ اكىمدەرىنە ءار جوبانىڭ ىسكە اسىرىلۋىن جەكە باقىلاۋدا ۇستاۋدى تاپسىرامىن, جىل سوڭىنا دەيىن ولاردىڭ پايدالانۋعا بەرىلۋىن قامتاماسىز ەتىڭىزدەر», دەدى پرەمەر-مينيستر.

ونىڭ ايتۋىنشا, يندۋستريالاندىرۋ كارتاسىنا قوسۋ ءۇشىن جوبالاردى ساپالى ىرىكتەۋدىڭ ماڭىزى زور.

«ەكسپورتتىق الەۋەتكە, لوكاليزاتسيا مەن قايتا وڭدەۋدىڭ جوعارى دەڭگەيىنە, يمپورت الماستىرۋعا, شيكىزاتتىڭ قولجەتىمدىلىگىنە باسىمدىق بەرىلۋگە ءتيىس. يندۋستريا مينيسترلىگى وسى باعىتتار بويىنشا ينۆەستورلارمەن جۇمىستى كۇشەيتۋى قاجەت. جالپى مەملەكەت باسشىسىنىڭ وڭدەۋشى ونەركاسىپتىڭ ءوسۋىن قامتاماسىز ەتۋ جونىندەگى تاپسىرمالارى ساپالى ءارى بەلگىلەنگەن مەرزىمدە ورىندالۋعا ءتيىس», دەدى اسقار مامين.