مەملەكەت باسشىسى نۇرسۇلتان نازارباەۆ پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
ءا.يسەكەشەۆ مەملەكەت باسشىسىنا مينيسترلىكتىڭ 2013 جىلعى جۇمىس قورىتىندىلارى, سونىڭ ىشىندە ۇدەمەلى يندۋستريالىق-يننوۆاتسيالىق دامۋ باعدارلاماسىن ىسكە اسىرۋ جانە يندۋستريالاندىرۋ كارتاسىنىڭ جوبالارى, سونداي-اق, بيىلعى جىلعا ارنالعان جوسپارلار تۋرالى باياندادى.
اتاپ ايتقاندا, ءا.يسەكەشەۆ ونەركاسىپتىڭ ارقاۋلىق سالالارىنىڭ ءوسۋ قارقىنى, سالالىق باعدارلامالاردى جۇزەگە اسىرۋ جانە يندۋستريالاندىرۋ اياسىندا بيزنەستى قولداۋدىڭ نەگىزگى شارالارى جايلى حاباردار ەتتى.
قازاقستان پرەزيدەنتى ونەركاسىپتى, ەلەكتر ەنەرگەتيكاسىن, ارنايى ەكونوميكالىق ايماقتاردى ودان ءارى دامىتۋدى, سونداي-اق, شەتەلدىك ينۆەستيتسيالار تارتۋدى قامتاماسىز ەتۋ قاجەتتىگىنە نازار اۋداردى. نۇرسۇلتان نازارباەۆ ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ ەكىنشى بەسجىلدىعى جوباسىنىڭ يننوۆاتسيالىق قامتىلۋىن ەسكەرە وتىرىپ, ساپالى ازىرلەۋدىڭ ماڭىزدىلىعىن اتاپ ءوتتى.
كەزدەسۋ قورىتىندىسىندا مەملەكەت باسشىسى بىرقاتار ناقتى تاپسىرمالار بەردى.
سۋرەتتى تۇسىرگەندەر س.بوندارەنكو, ب.وتارباەۆ.