پاۆلوداردا №22 مەكتەپ ديرەكتورى 6-سىنىپ وقۋشىسىنا قاتىستى ارەكەتىنە بايلانىستى جازالاندى, دەپ حابارلايدى Egemen.kz پاۆلودار وبلىسى ءبىلىم باسقارماسىنىڭ رەسمي سايتىنا سىلتەمە جاساپ.
«مەكتەپ ديرەكتورىنا سوگىس جاريالاندى. وقۋشىنىڭ اتا-اناسىمەن بايلانىستىق, ولاردىڭ نارازىلىعى جوق. وقۋشى دا جاعدايدى ءتۇسىندى, جانجال تىيىلدى», دەپ مالىمدەدى باسقارما.
مەكتەپ ديرەكتورىنا 6-سىنىپ وقۋشىسىنىڭ وقۋ ورنىنا كيىنىپ كەلگەن كيىمى ۇناماعان, سول سەبەپتى وقۋشىنى جەتەكتەپ باسقا سىنىپتارعا كىرگىزگەن. ديرەكتوردىڭ بۇل ارەكەتىنەن كەيىن قىز جىلاپ قالعان. سوعان بايلانىستى وقۋشىنىڭ اكەسى الەۋمەتتىك جەلىدەگى پاراقشاسىندا پىكىر ءبىلدىردى.
«پاۆلوداردا №22 مەكتەپ ديرەكتورى مامبەتوۆا حانىم 6-سىنىپ وقۋشىسىن قولىنان جەتەكتەپ, الدىمەن 5-سىنىپقا, سودان كەيىن 11-سىنىپقا اپارىپ, بارلىعىنا ونىڭ تالاپقا ساي كيىنبەگەنىن كورسەتكەن. قىز جىلاپ, كۇيزەلىسكە ءتۇستى», دەپ جازدى Facebook قولدانۋشىسى قانات قازبەك.
ول مۇعالىم ءوز وكىلەتىن اسىرا پايدالانىپ, بالا قۇقىعىن بۇزدى دەپ سانايتىنىن جەتكىزدى.
جەلىدەگى بۇل جازباعا مەكتەپ ديرەكتورى مايرا مامبەتوۆا پىكىر ءبىلدىردى.
«وقۋشىعا دجينسى مەن فۋتبولكاعا قاتىستى اۋىزشا ەسكەرتۋ جاسالدى. مىسال رەتىندە كورشى كابينەتتە وقيتىن وقۋشىلاردىڭ كلاسسيكالىق ۇلگىدەگى كيىمى كورسەتىلدى. قىز رەنجىپ قالدى. وتباسىنان كەشىرىم سۇرالدى. قازىر قىز قالا سىرتىندا, كەلگەن سوڭ پسيحولوگيالىق كومەك كورسەتىلەدى», دەدى ول.
بۇعان دەيىن قازاقستاننىڭ ءبىلىم مينيسترلىگى وقۋ جىلىندا قازاقستاندىق وقۋشىلار مىندەتتى مەكتەپ فورماسىن كيۋدەن بوساتىلىپ, مەكتەپكە كلاسسيكالىق كيىممەن بارا الاتىنىن ايتقان.