ەلوردادا ءجىتى ريسپيراتورلىق ۆيرۋستىق ينفەكتسيامەن اۋىرعاندار سانى ارتتى. بۇل تۋرالى نۇر-سۇلتان قالالىق باس مەملەكەتتىك سانيتار دارىگەرىنىڭ ورىنباسارى جاننا پىراليەۆا ايتتى, دەپ حابارلايدى Egemen.kz.
«2021 جىلدىڭ باسىنان بەرى نۇر-سۇلتان قالاسى تۇرعىندارىنىڭ اراسىندا جرۆي-ءدىڭ 32,5 مىڭ جاعدايى تىركەلدى. 100 مىڭ تۇرعىنعا شاققانداعى كورسەتكىش – 2 814. بۇل وتكەن جىلعى كورسەتكىشتەن 43,3 پايىزعا جوعارى. بىلتىر 20 706 جاعداي تىركەلگەن بولاتىن», دەدى ول ەلوردا اكىمدىگىندە وتكەن بريفينگ بارىسىندا.
ونىڭ ايتۋىنشا, 14 جاسقا دەيىنگى بالالار اراسىندا جرۆي-ءدىڭ 15 635 جاعدايى تىركەلگەن. سوڭعى اپتانىڭ وزىندە 1 054 بالا اۋىرىپ قالعان. وتكەن اپتامەن سالىستىرعاندا بالالار اراسىندا جرۆي-مەن اۋىرۋ 32 پايىزعا ءوسىپ وتىر.
«جرۆي-مەن اۋرۋدىڭ اپتالىق كورسەتكىشى باقىلاۋ دەڭگەيىنەن اسىپ وتىرعان جوق. سوڭعى 2020-2021 جىلدارعى ەپيدەميولوگيالىق ماۋسىمدا جرۆي-ءدىڭ 25 252 جاعدايى تىركەلدى. ونىڭ ىشىندە 15 090 بالا اۋىردى», دەدى جاننا پىراليەۆا.