سولتۇستىك قازاقستان وبلىسىنداعى «قىزىلجار ارلاندارى» سپورت كلۋبىنىڭ مۇشەسى مۇحيت تۇرسىنوۆ رۋمىنيانىڭ كونستانتسا قالاسىندا حالىقارالىق ەتنيكالىق مادەنيەت فەستيۆالى اياسىندا قازاق كۇرەسىنەن وتكەن الەم كۋبوگىندا جەڭىسكە جەتتى, دەپ حابارلايدى Egemen.kz.
«Qazaq kuresi» قاۋىمداستىعىنىڭ مالىمەتىنشە, رۋمىنيانىڭ كونستانتسا قالاسىندا وتكەن الەم كۋبوگىنا 21 ەلدەن 128 بالۋان قاتىستى. جارىستى قازاقستان رەسپۋبليكاسىنىڭ «Qazaq kuresi» قاۋىمداستىعى, رۋمىنيا «Qazaq kuresi» قاۋىمداستىعى جانە رۋمىنيا سىرتقى ىستەر مينيسترلىگى ۇيىمداستىرعان. ەكى ەل بىرىگىپ وتكىزگەن بۇل سايىس - كوروناۆيرۋس پاندەمياسى باستالعالى بەرى قولعا الىنعان العاشقى ءىرى حالىقارالىق دودا.
«بۇل - الەم چەمپيوناتىنىڭ الدىنداعى دايىندىق جارىسى دەۋگە بولادى. جوعارى دەڭگەيدە ۇيىمداستىرىلدى. وعان حالىقارالىق مامانداردىڭ ءتول ونەرىمىزگە بەرگەن جوعارى باعالارى دالەل. جارىس بارىسىندا قازاقستاندىق بالۋان مۇحيت تۇرسىنوۆ 100 كگ سالماق دارەجەسىندە جەڭىمپاز اتاندى», دەلىنگەن حابارلامادا.
الەم كۋبوگى بارىسىندا ۇلتتىق ءداستۇر ناسيحاتتالىپ قانا قويماي, وزگە كۇرەس تۇرلەرىنەن دە فەستيۆالدەر ءوتتى. اتاپ ايتقاندا, قۇراش, ابا جانە قىرىم كۇرەستەرى بويىنشا سايىستار, ات جارىس, ساداق اتۋ, سەمسەرلەسۋ, نايزامەن ايقاسۋ سىندى كوشپەندىلەر ويىندارى ۇيىمداستىرىلدى.
سونداي-اق, توعىزقۇمالاق جانە مانگالا ويىندارىنىڭ تانىستىرىلىمى ۇيىمداستىرىلدى. قازاق كۇرەسىنەن الەم كۋبوگىندا توپ جارعان سپورتشىلار مەدالدارمەن جانە اقشالاي سىياقىمەن ماراپاتتالدى.