قازاقستان ەلشىسى بولات يمانباەۆ ارمەنيا سىرتقى ىستەر ءمينيسترى ارارات ميرزويانمەن كەزدەسۋ وتكىزدى, دەپ حابارلايدى Egemen.kz.
سۇحبات بارىسىندا قازاقستان-ارميان ىنتىماقتاستىعى جانە ەكى ەلدىڭ سىرتقى ساياسي ۆەدومستۆولارى اراسىنداعى ءوزارا ءىس-قيمىل ماسەلەلەرى تالقىلاندى.
مينيستر ەرەۆاننىڭ نۇر-سۇلتانمەن ديالوگتى بارلىق دەڭگەيلەردە, ەكىجاقتى فورماتپەن قوسا ورتاق ينتەگراتسيالىق بىرلەستىكتەر مەن حالىقارالىق ۇيىمدار شەڭبەرىندە دە جانداندىرۋعا مۇددەلى ەكەنىن مالىمدەدى. ا. ميرزويان زور الەۋەتى مەن ءوسۋ پەرسپەكتيۆاسى بار ساۋدا-ەكونوميكالىق ىنتىماقتاستىقتى تەرەڭدەتۋدىڭ ماڭىزدىلىعىن اتاپ ءوتتى.
تاراپتار ارمەنيا پرەزيدەنتى ارمەن ساركيسياننىڭ 2021 جىلى ماۋسىم ايىنداعى قازاقستانعا ساپارىنىڭ قورىتىندىلارىن, سونداي-اق 26 مامىرداعى ەكونوميكالىق ىنتىماقتاستىق جونىندەگى قازاقستان-ارميان ۇكىمەتارالىق كوميسسياسىنىڭ 8-ءشى وتىرىسىنىڭ جانە 20 ساۋىردەگى سىرتقى ىستەر مينيسترلىكتەرى اراسىنداعى ساياسي كونسۋلتاتسيالاردىڭ ۋاعدالاستىقتارىن ىسكە اسىرۋ ماسەلەلەرىن تالقىلادى.
ەلشى ارميان تاراپىن پرەزيدەنت قاسىم-جومارت توقاەۆتىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىنىڭ نەگىزگى قاعيدالارىمەن, سونىمەن قاتار مەملەكەتىمىزدىڭ الەۋمەتتىك-ەكونوميكالىق جاڭعىرۋىنىڭ وزەكتى باعدارلامالارى مەن حالىقارالىق باستامالارى تۋرالى حاباردار ەتتى.