دەنساۋلىق ساقتاۋ مينيسترلىگى قان تاپسىرعانى ءۇشىن دونورعا بەرىلەتىن تەگىن تاماقتىڭ اقشالاي بالاماسىنىڭ مولشەرىن ۇلعايتۋدى جوسپارلاپ وتىر, دەپ جازادى Egemen.kz.
«قاندى جانە (نەمەسە) ونىڭ كومپونەنتتەرىن دوناتسيالاۋدى وتەۋسىز نەگىزدە جۇزەگە اسىرعان دونورعا بەرىلەتىن تەگىن تاماقتىڭ اقشالاي بالاماسى ءتيىستى قارجى جىلىنا ارنالعان رەسپۋبليكالىق بيۋدجەت تۋرالى زاڭمەن بەلگىلەنگەن ايلىق ەسەپتىك كورسەتكىشتىڭ 1,5 مولشەرىن قۇرايدى», دەلىنگەن "اشىق نقا" پورتالىندا جاريالانعان بۇيرىق جوباسىندا.
بيىل 1 اەك 2917 تەڭگە ەكەنىن ەسكەرسەك, بۇل سوما 4375 تەڭگەگە جەتەدى.
ايتا كەتەرى, قازىر وتەۋسىز نەگىزدە قان تاپسىراتىن دونورعا بەرىلەتىن تەگىن تاماقتىڭ اقشالاي بالاماسى 0,25 اەك نەمەسە 729 تەڭگەنى قۇرايدى.
تۇسىندىرمە حاتتا ايتىلعانداي, رەسەيدە دونورعا 1200 رۋب ≈ 6800 تەڭگە, بەلارۋستە 31,55 بەل.رۋب ≈ 5 045 تەڭگە بەرىلەدى. ال گەرمانيادا تەگىن تاماقتان بولەك, 40 ەۋرو ≈ 20 200 تەڭگەگە دەيىن الۋعا بولادى.
«قازاق تاعامتانۋ اكادەمياسىنىڭ» ۇسىنىمدارىنا سايكەس, دونورلار قان تاپسىرعان كۇنى اقشالاي بالاماسى 1,5 اەك نەمەسە ازىق-ت ۇلىك جيىنتىعى 4790 ككال بولاتىن تاعام راتسيونىن الۋى كەرەك», دەلىنگەن قۇجاتتا.
جوبانى قوعامدىق تالقىلاۋ مەرزىمى 20 قىركۇيەككە دەيىن سوزىلادى.