ورال قالاسىنداعى №3 ورتا مەكتەپتە وقىس وقيعاعا قاتىستى جەكە تەرگەۋ جۇرگىزىلىپ جاتىر. سىنىپتاردىڭ بىرىندە كۆارتس شامى قوسۋلى بولعان, ناتيجەسىندە ون وقۋشى مەديتسينالىق مەكەمە كومەگىنە جۇگىنگەن. بالالاردىڭ كوزى كۇيىپ قالعان, دەپ جازادى Egemen.kz.
№3 ورتا مەكتەپ ديرەكتورى ليۋبوۆ يۋشينانىڭ ايتۋىنشا, 4 قىركۇيەكتە التىنشى سىنىپ وقۋشىلارى كۆارتس شامى قوسۋلى قالعان سىنىپتا ساباق وقىعان. بالالار كوزى اشىپ, اۋىرعانىن ايتىپ شاعىمدانعان.
«قازىرگى ۋاقىتتا بۇل وقيعا تەكسەرىلىپ جاتىر. بارلىق ءمان-جاي تەكسەرىلەدى. پەداگوگيكالىق ۇجىمنىڭ, مەديتسينا قىزمەتكەرلەرىنىڭ, مەكتەپ ديرەكتورىنىڭ ورىنباسارى مەن مەكتەپ ديرەكتورىنىڭ قىزمەتى تەكسەرىلەدى. وكىنىشكە قاراي, بەس مينۋت ىشىندە وقۋشىلار مۇعالىم نازارىنان تىس قالعان. ولار ءۇزىلىس كەزىندە شامدى وزدەرى قوسقان بولۋى مۇمكىن», دەدى ليۋبوۆ يۋشينا.
دەنساۋلىق ساقتاۋ باسقارماسى مەديتسينالىق كومەككە تەك 10 وقۋشى جۇگىنگەنىن ايتتى.«وبلىستىق كوپسالالى اۋرۋحانانىڭ پۋنكتىنە 8 اتا-انا جۇگىندى. جەدەل جاردەم جەلىسى بويىنشا ەكى قوڭىراۋ ءتۇستى. 10 وقۋشى زارداپ شەكتى. ولاردىڭ ءبارى تەكسەرىلدى. دياگنوز: ەلەكترووفتالميا, كوز قابىعىنىڭ جەڭىل دارەجەدە كۇيۋى. بالالارعا قاجەتتى مەديتسينالىق كومەك كورسەتىلدى», دەدى بقو دەنساۋلىق ساقتاۋ باسقارماسىنىڭ ءباسپاسوز حاتشىسى ايناگۇل ساقپوسىنوۆا.