جاساي بەرسىن ەلدىگىمىز ماڭگىلىك!
17 قاڭتاردا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ قازاقستان حالقىنا ءداستۇرلى جولداۋىن جاريا ەتكەنى بەلگىلى. وتانىمىزدىڭ 2050 جىلعا قاراي الەمدەگى اسا دامىعان 30 ەلدىڭ قاتارىنا ەنۋىن قامتاماسىز ەتۋدى كوزدەيتىن ۇزاقمەرزىمدى ستراتەگيانىڭ ۇستىمىزدەگى جىلعا ارنالعان باسىمدىقتارى بەلگىلەنگەن جولداۋدا بيلىكتىڭ زاڭنامالىق تەتىگىنە دە ەرەكشە نازار اۋدارىلعان بولاتىن. ەڭ باستىسى, بيىلعى جولداۋ ەلىمىزدىڭ
رۋحىن كوتەرەتىن, ۇلى ماقساتتارعا جەتكىزەتىن
«ماڭگىلىك ەل» ۇلتتىق يدەياسىنىڭ جاريالانۋىمەن دە قۇندى بولا تۇسكەن ەدى.
«پارلامەنت» بەتى بۇگىن ءبىر تاقىرىپقا – ەلباسى جولداۋىنا ارنالىپ وتىر. وندا ءسوز الاتىن دەپۋتاتتار پرەزيدەنت جولداۋىنىڭ بارلىق باعىتتارىنىڭ ماڭىزدىلىعى تۋرالى ايتا وتىرىپ, ەلباسى تاپسىرمالارىن قامتاماسىز ەتۋدە قارىمدىلىق كەرەك ەكەندىگىنە ەرەكشە نازار اۋدارادى.
جاساي بەرسىن ەلدىگىمىز ماڭگىلىك!
17 قاڭتاردا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ قازاقستان حالقىنا ءداستۇرلى جولداۋىن جاريا ەتكەنى بەلگىلى. وتانىمىزدىڭ 2050 جىلعا قاراي الەمدەگى اسا دامىعان 30 ەلدىڭ قاتارىنا ەنۋىن قامتاماسىز ەتۋدى كوزدەيتىن ۇزاقمەرزىمدى ستراتەگيانىڭ ۇستىمىزدەگى جىلعا ارنالعان باسىمدىقتارى بەلگىلەنگەن جولداۋدا بيلىكتىڭ زاڭنامالىق تەتىگىنە دە ەرەكشە نازار اۋدارىلعان بولاتىن. ەڭ باستىسى, بيىلعى جولداۋ ەلىمىزدىڭ
رۋحىن كوتەرەتىن, ۇلى ماقساتتارعا جەتكىزەتىن
«ماڭگىلىك ەل» ۇلتتىق يدەياسىنىڭ جاريالانۋىمەن دە قۇندى بولا تۇسكەن ەدى.
«پارلامەنت» بەتى بۇگىن ءبىر تاقىرىپقا – ەلباسى جولداۋىنا ارنالىپ وتىر. وندا ءسوز الاتىن دەپۋتاتتار پرەزيدەنت جولداۋىنىڭ بارلىق باعىتتارىنىڭ ماڭىزدىلىعى تۋرالى ايتا وتىرىپ, ەلباسى تاپسىرمالارىن قامتاماسىز ەتۋدە قارىمدىلىق كەرەك ەكەندىگىنە ەرەكشە نازار اۋدارادى.
ەرەن مۇمكىندىككە يە ەلمىز
ەلباسى ماڭگىلىك ەل ۇعىمىنىڭ تولىق ءمان-ماعىناسىن, مازمۇنىن اشىپ ايتىپ بەردى. بۇل ءاربىر وسى مەملەكەتتىڭ ازاماتى ءۇشىن ەڭ نەگىزگى قۇندىلىق دەپ بىلەمىن. ماقسات-مۇددەنى ماڭگىلىك ەلگە قىزمەتكە جۇمساپ, كەلەشەك ۇرپاق ءۇشىن, ولاردىڭ ۇرپاقتارىنا جەتەتىن ەل بولۋى جولىندا بۇگىن مەن كەلەر كۇنگە قالتقىسىز قىزمەت ەتۋ دەگەن ءسوز. دەمەك, ءبىز مەملەكەتىمىزدى, ەكونوميكامىزدى, رۋحاني بايلىعىمىزدى, حالقىمىزدىڭ ءومىر ءسۇرۋ دەڭگەيىن جانە ول دەڭگەيدىڭ ساپالىلىعىن, ياعني وسىنىڭ بارلىعىن كوتەرە ءتۇسۋىمىز كەرەك. ماسەلەن, ءاربىر وتباسى ءوزىنىڭ بالاسىنىڭ, نەمەرەسىنىڭ بولاشاعىن ويلاسا, ەلباسى ماڭگىلىك ەل ماقساتىن العا قويىپ وتىر. بۇل – شىن مانىندە ۇلى ماقسات. ەندى وسى يدەياعا بۇكىل قازاق بىرىكسە, مەنىڭ ويىمشا, بارلىق ارمانىمىزدى قولىمىزبەن ۇستايمىز.
ەلباسى قازاق تىلىنە قاتىستى وتە جاقسى ايتتى. الەۋمەتتىك ساۋالدامالار قورىتىندىسى بويىنشا ءبىر جىلدىڭ ىشىندە عانا وزگە ۇلت وكىلدەرى اراسىنان قازاق ءتىلىن بىلەمىن دەگەندەردىڭ سانى 10 پايىزعا وسكەن. قازاق ءتىلى ينتەرنەتكە كىردى, عىلىمنان, مەملەكەتتىك ورگانداردان ورىن الا باستادى, ال ەندى ونى ارى قاراي دامىتۋ قازاقتىڭ وزىنە, وزىمىزگە بايلانىستى. ءتىلدى دامىتۋعا زاڭ جۇزىندە بولسىن, قارجىلىق جاعىنان بولسىن مەملەكەتتىك قولداۋ بار. قىسقاسىن ايتقاندا, قازاقتىڭ ءوسىپ-وركەندەۋىنە, بيىك اسۋلاردى باعىندىرۋىنا, وزىق ەلدەردىڭ قاتارىنان ويىپ ورىن الۋىنا تولىق مۇمكىندىك بار.
كامال بۇرحانوۆ,
ءماجىلىس دەپۋتاتى.
ۇلتتىق ۇستىنىمىزعا اينالادى
مەملەكەت باسشىسىنىڭ جىل سايىنعى ءداستۇرلى جولداۋىن حالىق اسىعا كۇتەدى. ويتكەنى, ەلباسىنىڭ جولداۋلارىندا ەلىمىزدىڭ وسى جانە تاياۋ جىلدارداعى ساياسي, ەكونوميكالىق, الەۋمەتتىك جانە مادەني دامۋىنىڭ نەگىزگى باعىتتارى ايقىندالادى. بيىلعى جولداۋداعى ەلباسىنىڭ «ماڭگىلىك ەل» يدەياسى بۇكىل قازاقستاندىقتاردى باسەكەگە قابىلەتتى 30 ەلدىڭ قاتارىنا ەنۋىنە ۇيىتقى بولاتىن ءبىزدىڭ ۇلتتىق يدەيامىزعا اينالۋى ءتيىس.
جولداۋدا ەكونوميكامىزدىڭ ىرگەتاسى بولىپ تابىلاتىن شاعىن جانە ورتا بيزنەستىڭ ىشكى جالپى ونىمدەگى ۇلەسىن 20%-دان 2050 جىلعا قاراي 60 پايىزعا جەتكىزۋ مىندەتىنىڭ قويىلۋى, قوعامىمىزدا «مەن دەگەنى بار» ورتا تاپ قالىپتاستىرۋعا تولىق مۇمكىندىك بەرەدى. سونىمەن قاتار, مەملەكەت باسشىسى ەكونوميكانىڭ كۇرەتامىرى بولىپ تابىلاتىن ەنەرگەتيكا سالاسىن دامىتۋ ءۇشىن ەلىمىزدە اتوم ەلەكتر ستانساسىن سالۋ تۋرالى ۇكىمەتكە ناقتى تاپسىرما بەردى. قازاقستان – الەمدە ۋران ءوڭدىرۋشى الپاۋىت مەملەكەتتەردىڭ ءبىرى. ءبىز كوبىنەسە ۋراندى تولىق وڭدەۋدەن وتكىزبەي, سىرتقا ارزان باعامەن ەكسپورتتايمىز. الەمدەگى ەڭ ارزان, ەكولوگيالىق تازا, ءارى ءتيىمدى قۋات كوزى – اتوم ەنەرگياسى. سوندىقتان دا, ەلىمىزدەگى ءوندىرىلىپ جاتقان ۋراندى تەرەڭ وڭدەۋدەن وتكىزەتىندەي الەمنىڭ الدىڭعى قاتارلى تەحنولوگياسىن ەندىرە وتىرىپ, اتوم ەلەكتر ستانساسىن سالۋ ەلىمىز ءۇشىن اسا ءتيىمدى جوبا بولادى دەپ ەسەپتەيمىن. مۇنى بايبالام ساياساتقا اينالدىرۋدىڭ قاجەتى جوق.
ەۋروپا ەلدەرى, اقش, جاپونيا, قىتاي جانە ت.ب. مەملەكەتتەردەگى ەنەرگەتيكالىق رەسۋرستاردىڭ نەگىزگى بولىگىن وسى اتوم ەلەكتر ستانسالارى بەرىپ جاتقانىن كوپشىلىك ءبىلۋى ءتيىس. XXI عاسىر جاڭا يننوۆاتسيانىڭ, ونىڭ ىشىندە نانو-تەحنولوگيا مەن بيو-تەحنولوگيانىڭ, ەنەرگەتيكالىق رەسۋرستاردىڭ جاڭا تۇرلەرىنىڭ عاسىرى ەكەنىن مويىنداۋىمىز كەرەك. سول سەبەپتى, باسەكەگە قابىلەتتى بولۋ ءۇشىن قولدا بار مۇمكىندىكتەردى ۋىستان شىعارىپ الماۋ – ءبىزدىڭ ۇرپاقتىڭ باستى مىندەتى.
مۇرات باقتيار ۇلى,
سەنات دەپۋتاتى.
مەملەكەتتىك ءتىل مەرەيىمىزدى ءوسىرسىن
ەلباسى ءار جىلعى جولداۋلارىندا مەملەكەتتىك ءتىل تۋرالى ارنايى ايتىپ وتەدى. سەبەبى, ءبىز تۇتاس قوعام بولىپ, ۇلتىمىزعا قاراماي, مەملەكەتتىك ءتىلدى تولىق مەڭگەرمەيىنشە, مىقتى مەملەكەت قۇرا المايمىز. ەلباسى بۇعان دەيىن دە «مەملەكەتتىك ءتىل – حالىقتى بىرىكتىرۋشى باستى فاكتور» ەكەنىن شەگەلەپ بەرگەن ەدى. بۇل جولعى جولداۋىندا دا مەملەكەتتىك ءتىل تۋرالى ءوزىنىڭ وتە كەڭ كولەمدەگى ويىن جەرىنە جەتكىزىپ ايتتى. ونى ۇققان جان بۇل تۇرعىداعى كوزقاراسىن وزگەرتىپ, قازاق تىلىنە دەن قويارى انىق.
پرەزيدەنت جولداۋىنىڭ پارقىنا بارعان ادام, قازاق ءتىلى ماڭگىلىك ەلدىڭ ماڭگىلىك ءتىلى بولىپ بەكىتىلگەنىن ۇقتى. دەمەك, بۇگىنگى كۇننەن تىك كوتەرىلىپ, ۇكىمەتتەن باستاپ ەلىمىزدىڭ ءار ازاماتى مەملەكەتتىك ءتىلدىڭ ءوزىنىڭ زاڭدى ورنىندا قىزمەت ەتۋىنە اتسالىسۋى كەرەك. بىلە بىلگەنگە, بۇل ەلدىك شارانى قىسقا مەرزىمدە جۇزەگە اسىرىپ, ماڭگىلىك ەل مۇراتىنا اينالعان مەملەكەتتىك ءتىلدى زاڭدى ورنىندا پايدالانۋ ۇكىمەتتىڭ دە, باسقامىزدىڭ دا باستى مىندەتىمىز بولۋعا ءتيىس. ەلباسى قازاق ءتىلى تۋرالى وسىنى مەڭزەدى دەپ ۇقتىم.
كەيبىر ازاماتتارىمىز رەنجىسە دە ءسوزدىڭ شىنىن, ويدىڭ انىعىن اشىق ايتايىن. ءوزى تۇرىپ جاتقان ەلدىڭ مەملەكەتتىك ءتىلىن جەتىك بىلمەيتىن ادام وتانىنىڭ تولىققاندى پاتريوتى بولىپ سانالمايدى. ونىڭ جارقىن مىسالدارىن دۇنيەدەگى كەز كەلگەن ەلدەن كورۋگە بولادى. ءوزىمىز كوپ جاعدايدا ۇلگى الىپ ۇيرەنگەن رەسەيگە قارايىقشى. وندا, ءتىپتى, 5-6 ايعا ناپاقا ىزدەپ بارعان ميگرانتتارعا دا ورىس ءتىلىن ءبىلۋدى مىندەتتەپ جاتىر. ءبىز رەسەيدىڭ وسىنداي جاقسى قىرلارىن ۇيرەنىپ, ءوز ەلىمىزدە پايدالانۋىمىز كەرەك.
«قازاقستان حالقى اسسامبلەياسى» وسى ماسەلەنى, ياعني, مەملەكەتتىك ءتىلدى ءوز تۇعىرىنا قوندىرۋ ءىسىن ءجيى كوتەرە باستادى. بۇعان قوعام تاراپىنان قولداۋ بار. تەك ۇكىمەت پەن قوس پالاتا ءبىر پاتۋاعا كەلىپ, مەملەكەتتىك ءتىل تۋرالى پارمەندى زاڭ قابىلداسا بولعانى. سوندا عانا پرەزيدەنتتىڭ مەملەكەتتىك ءتىل تۋرالى 2025 جىلعا دەيىن جۇزەگە اسىرۋعا تاپسىرعان مىندەتتەرى تولىق ورىندالادى. ايتپەسە, بۇگىنگى كۇنگىدەي ۇزىن قۇرىق, كەڭ تۇساۋمەن سوزبۇيداعا سالىپ جۇرە بەرسەك, قالعان 5-10 جىل دا زاۋلاپ وتە شىعادى. سوندىقتان, ۇكىمەت پەن ارىپتەستەرىمە ايتار ءوتىنىشىم, مەملەكەتتىك ءتىل تۋرالى پارمەندى ءبىر زاڭدى ەرتەرەك دايىنداپ, مۇمكىندىگىنىڭ بارىنشا تەزىرەك قابىلداعان ءجون. سەبەبى, سوندا عانا ماڭگىلىك ەلدىڭ بولاشاعى ب ۇلىڭعىرلانباي, انىق كورىنەتىن بولادى.
روزاقۇل حالمۇرادوۆ,
ءماجىلىس دەپۋتاتى.
ءار جولىنىڭ تەرەڭ ءمانى بار
جولداۋ ەل ەرتەڭىنە نەمكەتتىلىكپەن قارامايتىن ءاربىر ازامات ءۇشىن ايرىقشا ماڭىزعا يە دەپ بىلەمىن, سەبەبى, وندا ايتىلعان ماسەلەنىڭ قاي-قايسىسى دا, ءتىپتى, ءبولىپ-جاراتىنى جوق, بارلىعى بىردەي وتە جوعارى مانگە يە. ءوزىم اگرارلىق كوميتەتتىڭ مۇشەسى بولعاندىقتان, كەيىن ماعان اگروونەركاسىپ كەشەنىن يننوۆاتسيالىق باعىتقا ءتۇسىرۋ, وتانىمىزدى ەت جانە ءسۇت ونىمدەرىن ەكسپورتتايتىن وڭىرلىك ءىرى ەلگە اينالدىرۋ, ەگىن شارۋاشىلىعىندا سۋدى كوپ قاجەت ەتەتىن تيىمدىلىگى تومەن داقىلدار كولەمىن قىسقارتۋ, ولاردى كوكونىسپەن, مايلى جانە ازىقتىق ونىمدەرمەن الماستىرۋ جولىنا بەت بۇرۋ بويىنشا ناقتى مىندەتتەردىڭ قويىلۋى ەرەكشە ورىندى. اۋىلدى, اۋىل شارۋاشىلىعىن كوتەرۋ ماقساتىنىڭ قويىلۋى ءتۇپ-تامىرى اۋىلدان شىعىپ ونگەن ءاربىر قازاق ءۇشىن وزەكتى. ويتكەنى, وندا ۇلتتىق سانا, رۋح, ءتىل تازالىعى, ءداستۇر مەن تانىمنىڭ قۇندىلىقتارى قاسيەتتەلىپ ساقتالعان. ەندەشە, اۋىلعا كوڭىل اۋدارۋدىڭ ارتىندا وزىندىك بەت-بەينە ساقتاۋدىڭ ۇلگىسى جاتىر.
استىق وسىرۋدەن, ونى ەكسپورتتاۋدان ءبىز الەمدەگى مىقتى مەملەكەتتەردىڭ قاتارىندامىز. بۇل جەردە ەلباسى قىتايدى مىسالعا الا وتىرىپ, جەردى ءتيىمدى پايدالانۋ جايىن ايتتى. ماسەلەن, وندا كولەمى بىردەي جەردەن ەكى فەرمەر ەكى ءتۇرلى, ءبىرى تومەن, ءبىرى ەكى ەسە جوعارى ءونىم الادى, سونداي كەزدە زاڭ بويىنشا جەر ءونىمدى تومەن العان ديقاننان الىنىپ, ءتيىمدى پايدالانۋشىعا بەرىلەدى. سوندىقتان وندا جاڭا تەحنولوگيالاردى ەنگىزىپ, ونىمدىلىكتى ۇزدىكسىز ارتتىرىپ, جۇمىسىن الەمدىك ستاندارتتار نەگىزىندە جۇرگىزەتىندەر ۇتىپ وتىرادى.
قازىر پارلامەنتتە جەر كودەكسى قارالىپ جاتىر, وعان كوپتەگەن ۇسىنىستار تۇسۋدە. بىزدە شىنىندا بالەنباي گەكتار جەردى الىپ, ونى يگەرمەي جاتقاندار جەتكىلىكتى. سوندىقتان جولداۋدا بۇل ماسەلەگە مەملەكەت باسشىسىنىڭ باسا ءمان بەرگەنى مەن ءۇشىن, جالپى ەل ءۇشىن وتە ماڭىزدى.
ۇلاسبەك سادىبەكوۆ,
ءماجىلىس دەپۋتاتى.
ءومىر – تۇنىپ تۇرعان كۇرەس
كۇنى كەشە جاريالانعان ەلباسى نۇرسۇلتان نازارباەۆتىڭ قازاقستان حالقىنا ارناعان جولداۋىن زيالى قاۋىممەن بىرگە تاۋەلسىزدىك سارايىنىڭ ۇلكەن, القالى زالىندا تىڭدادىم. جولداۋدىڭ ءون بويىندا پرەزيدەنت ەلىمىزدە جۇزەگە اسىرىلىپ كەلە جاتقان وڭ وزگەرىستەردى ايتىپ, الدا اتقارىلاتىن جۇمىستارعا جان-جاقتى توقتالدى.
مەملەكەت باسشىسىنىڭ قازاقستان حالقىنا ارناعان بيىلعى جولداۋى ەل تۇرعىندارىنىڭ الەۋمەتتىك-تۇرمىستىق جاعدايىن ايتارلىقتاي ارتتىرۋعا ارنالعان ماڭىزدى قۇجات بولىپ تابىلادى. نۇرسۇلتان ءابىش ۇلىنىڭ ەل تۇرعىندارىنىڭ الەۋمەتتىك احۋالىن جاقسارتۋعا قاتىستى ايتقاندارىنىڭ ءبارى بۇكىل ەل ازاماتتارىن قۋانتقانى انىق. اسىرەسە, جالاقىنىڭ, ستيپەنديانىڭ وسەتىندىگى كوڭىلدەن شىقتى. مەملەكەت باسشىسى ەكى قولعا ءبىر جۇمىس تابا الماي جۇرگەندەرگە باستى نازار اۋدارۋدى ۇسىندى. سونىمەن بىرگە, الەۋمەتتىك ءالسىز توپتارعا: مۇگەدەكتەر, جاردەماقىعا ءومىر ءسۇرىپ كەلە جاتقان جانە وزگە دە جاندارعا جۇمىس بەرۋ قاجەتتىگىنە توقتالدى.
بۇل ساۋالدار ءبىزدىڭ وڭىرلەرگە شىققان ساپارىمىزدا ۇدايى كوتەرىلەدى. ناقتى مىسال رەتىندە ايتار بولسام, قوستاناي وبلىسىنا بارعان ساپارىمدا مەنىڭ قابىلداۋىمدا بولعان ليساكوۆسك قالاسىنداعى جالپى نەگىزدەگى قارت ادامدار مەن مۇگەدەكتەرگە ارنالعان قارتتار ءۇيى قىزمەتكەرلەرىمەن كەزدەسۋىمدە وسىندا جۇمىس جاسايتىن الەۋمەتتىك قىزمەتكەرلەردىڭ ەڭبەكاقىسىنىڭ وتە از ەكەندىگى ايتىلىپ, ولار جالاقىسىن كوتەرۋدى ۇجىم بولىپ سۇراعان ەدى. استاناعا كەلگەن بويدا ساۋالدى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنە جولدادىم. وسى سالادا جۇمىس اتقارىپ جۇرگەن ازاماتتاردىڭ كوزگە كورىنبەس ەڭبەكتەرىن باعالاپ, جالاقىسىن كوتەرۋ ەلباسىمىزدىڭ كەزەكتى جولداۋىنان ورىن العانى مەنى قاتتى ءتانتى ەتتى.
بۇعان قوسا, ەلباسىمىزدىڭ 2010 جىلعى جولداۋىندا ايتىپ كەتكەن حالقىمىزدىڭ دەنساۋلىعىن ساقتاۋ, سپورت ويىندارىنا ۇلكەن ءمان بەرىپ, جاپپاي سپورتپەن شۇعىلدانۋعا شاقىرۋ ماقساتىندا «دەنەشىنىقتىرۋ جانە سپورت تۋرالى» زاڭعا وزگەرىستەر ەنگىزىپ, بىرقاتار شارالاردى جۇزەگە اسىرۋ قاجەتتىگى كورىنۋدە. مىنە, دەپۋتات رەتىندە بۇيىرتسا, وسى جولدا ەڭبەك ەتپەكپىن. ويتكەنى, بۇل جولداۋدا ايتىلعان «ماڭگىلىك ەلدە» تۇراتىن حالىق دەنساۋلىعىن كۇشەيتۋگە جانە جاستارمەن پاتريوتتىق جۇمىس جۇرگىزۋدى اناعۇرلىم جانداندىرا تۇسۋگە ىقپال ەتەتىنى انىق.
مەن 2006 جىلدان بەرى سپورتتىڭ «قويان-قولتىق جەكپە-جەك» فەدەراتسياسىنىڭ پرەزيدەنتىمىن. ءۇشسايىستان عانا سپورت شەبەرى ءنورماتيۆىن ورىنداعان ماعان سپورتتىڭ بۇل ءتۇرى ونشالىق تانىس ەمەس. الايدا, وسى فەدەراتسيانى باسقارعانىما قۋانىشتىمىن جانە بۇل ءىستى دەپۋتات بولعان سوڭ دا ودان ءارى جالعاستىرۋدامىن. ەرەكشەلىگى سول, بۇل – سپورتتىڭ ەڭ مىقتىلار اينالىساتىن ءتۇرى. سەبەبى, مۇندا سامبونىڭ, بوكستىڭ جانە 20-دان استام باسقا دا سپورت تۇرلەرىنىڭ ەلەمەنتتەرى بار. ال بۇل – كۇش قۇرىلىمدارى ءۇشىن ماماندار دايىنداۋدا جانە جاستارعا پاتريوتتىق تاربيە بەرۋدە تاپتىرمايتىن سپورتتىق دايىندىق ءتۇرى. اسىلىندە, دەنەشىنىقتىرۋ مەن سپورتتى جان-جاقتى ءارى ءتيىمدى دامىتۋ – ءبىزدىڭ مەملەكەتىمىزدىڭ الەۋمەتتىك-ەكونوميكالىق ساياساتىنىڭ ماڭىزدى ءارى قۇرامداس بولىگى.
مىسالى, اسكەرگە جاڭادان شاقىرىلعان جاستاردىڭ اراسىندا ونىڭ دەنە ءبىتىمى مەن رۋحاني كۇش-جىگەرىن قالىپتاستىرۋ, وسكەلەڭ جاس ۇرپاقتى سپورتپەن اينالىسۋعا بەيىمدەۋ – ازاماتتىق بورىشتى وتەۋدە بارىنشا كوكەيكەستى ماسەلە. جالپى العاندا, جاس جىگىت ءۇشىن ومىردەگى ەڭ كۇردەلى سىناق, بۇل – ازاماتتىق بورىشتى, ياعني اسكەري مىندەتتى وتەۋگە دايىندىق ەكەندىگى داۋسىز. مۇنىڭ ءبىر ەرەكشەلىگى, اسكەردە الۋان ءتۇرلى سپورت ۇيىرمەلەرىنە قاتىسۋ, سالاماتتى ءومىر سالتىن قالىپتاستىرۋدى ناسيحاتتاۋ, سان ءتۇرلى سپورتتىق-بۇقارالىق ءىس-شارالاردى ۇيىمداستىرۋ, ءبارى-ءبارى مەملەكەتتىك دەڭگەيدە ءجۇزەگە اسىرىلادى. سوندىقتان دا, جەرگىلىكتى جەرلەردەگى مەكتەپتەردە ءاربىر جاسوسپىرىمگە باستاپقى اسكەري دايىندىقتىڭ قىر-سىرىن ۇيرەتىپ قانا قويماي, ولاردىڭ بويىنا وتاندى قورعاي ءبىلۋ مەن اسكەري قىزمەتكە دايىن بولۋدىڭ العىشارتتارىن ءسىڭىرۋ قاجەت.
«جانى ساۋدىڭ – ءتانى ساۋ» دەگەن حالىق دانالىعى وسىندايدا ايتىلعان بولسا كەرەك. بۇل رەتتە ەلباسى قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان ءابىش ۇلى نازارباەۆتىڭ سپورتقا قاتىستى ايتقان مىنا ءبىر ناقىل ءسوزىن ەسكە العىم كەلىپ وتىر. «سپورت – ادام ءتانىن عانا ەمەس, جانىن دا شىنىقتىرادى. مەن جاس كەزىمدە سپورتتىڭ كلاسسيكالىق كۇرەس تۇرىمەن شۇعىلداندىم, ول ەسەيىپ ەلگە قىزمەت اتقارعان كەزەڭدەردە كوپ كومەگىن تيگىزدى. كۇرەس ادامنىڭ ەرىك-جىگەرىن نىعايتىپ, العا قويعان ماقساتقا جەتەلەيدى. ءومىر – تۇنىپ تۇرعان كۇرەس. سوندىقتان مەن بارلىق قازاقستاندىق جاستاردى سپورتپەن شۇعىلدانۋعا شاقىرامىن. قازاقستاندىق وسكەلەڭ ۇرپاقتىڭ دەنە قايراتى كۇشتى, تانىمدىق جاعىنان باي بولۋى كەرەك. بۇل ءاربىر ازاماتقا ۇلگى-ونەگە بولۋى ءتيىس دەپ ويلايمىن», دەگەن ەدى ەلباسى.
مىنە, وسىنداي ءىس-شارالاردى جۇزەگە اسىرعان جاعدايدا عانا جاستاردىڭ بويىنا وتانعا دەگەن سۇيىسپەنشىلىكتى دارىتا الامىز. بۇگىنگى كۇننىڭ باستى تالابى دا, مىنە, وسى!
اباي تاسبولاتوۆ,
ءماجىلىس دەپۋتاتى, حالىقارالىق ىستەر قورعانىس
جانە قاۋىپسىزدىك كوميتەتىنىڭ مۇشەسى.