بيىل نۇر-سۇلتان قالاسىندا 40 مىڭنان استام جاڭا وقۋشىنى قامتۋ ءۇشىن 15 مەكتەپ پايدالانۋعا بەرىلەدى, دەپ جازادى Egemen.kz.
«بيىل 15 مەكتەپ پايدالانۋعا بەرىلەدى, بۇل – 40 مىڭنان استام جاڭا وقۋشى ورنى. سالىستىرار بولساق, 2020 جىلدان ەكى ەسە, 2019 جىلدان ءتورت ەسە كوپ. قۇرىلىس كەزىندە مەكتەپتەردىڭ ماتەريالدىق-تەحنيكالىق جابدىقتالۋىن, ونىڭ ىشىندە ينكليۋزيا كابينەتتەرىن ەسكەرەمىز. سەبەبى, مۇمكىندىگى شەكتەۋلى جانداردىڭ بەيىمدەلۋى مەن الەۋمەتتەنۋى ءۇشىن بارلىق جاعداي جاساۋ قاجەت», دەدى ەلوردا اكىمى التاي كولگىنوۆ پرەزيدەنت جولداۋىن ىسكە اسىرۋ بويىنشا قالا اكتيۆىمەن ونلاين-كەزدەسۋدە.
اكىمنىڭ مالىمدەۋىنشە, پەداگوگتار مەن وقۋشىلارعا قوسىمشا قولداۋ شارالارى كورسەتىلەدى. 2024 جىلعا دەيىنگى جالاقى جىل سايىن 25%-عا وسەدى. مۇعالىمدەردىڭ كاسىبي دامۋى ءۇشىن جاعداي جاسالادى. كادر تارتۋ ءۇشىن جىل سايىن ءبىلىم گرانتتارى بولىنەدى جانە ت.ب.
ال الەۋمەتتىك از قامتىلعان وتباسىلاردان شىققان بالالارعا كومەك كورسەتۋ ءۇشىن جالپىعا مىندەتتى وقۋ اياسىندا ەلوردا اكىمدىگى بيىل 800 ملن تەڭگە بولەدى.
«ماڭىزدى باعىتتاردىڭ ءبىرى بالالار مەن جاسوسپىرىمدەر سپورتىن قولداۋ بولىپ سانالادى. قازىر قالادا 8 مىڭنان استام بالانى قامتيتىن 11 بالالار مەن جاسوسپىرىمدەر سپورت مەكتەبى جۇمىس ىستەيدى. قوسىمشا قارجىلاندىرۋ باعىتى ەسەبىنەن بالالاردى قامتۋ ۇلەسىن 50%-دان استامعا ۇلعايتۋدى جوسپارلاپ وتىرمىز. سونداي-اق اۋلا كلۋبتارىنىڭ سانىن ارتتىرىپ جاتىرمىز», دەپ اتاپ ءوتتى التاي كولگىنوۆ.