كۇن وتكەن سايىن سوچي وليمپياداسى مارەدەن شىعاتىن شاق جاقىنداپ كەلەدى. ول جاقىنداعان سايىن كاۆكاز تاۋىنىڭ تەرىستىك-باتىسىنداعى وسى قالاعا الەم جانارىنىڭ قادالۋى جيىلەي باستادى. ال قادالعان سايىن سول الامانداعى احۋال جايى ءسوز بولماي قالمايدى. ءبىزدىڭ Sports.kz اگەنتتىگىندەگى ارىپتەستەرىمىز سوندىقتان قازاقستاننىڭ قىسقى سپورت تۇرلەرى بويىنشا ارعى-بەرگى تاريحىنداعى ەڭ اتاعى مول ساڭلاعى, بۇرىنعى بەلگىلى شاڭعىشى ۆلاديمير سميرنوۆقا حابارلاسىپتى.
دۇنيە دوداسىنىڭ ءدۇبىرى
ءححىى قىسقى وليمپيادانىڭ باستالۋىنا 13 كۇن قالدى
كۇن وتكەن سايىن سوچي وليمپياداسى مارەدەن شىعاتىن شاق جاقىنداپ كەلەدى. ول جاقىنداعان سايىن كاۆكاز تاۋىنىڭ تەرىستىك-باتىسىنداعى وسى قالاعا الەم جانارىنىڭ قادالۋى جيىلەي باستادى. ال قادالعان سايىن سول الامانداعى احۋال جايى ءسوز بولماي قالمايدى. ءبىزدىڭ Sports.kz اگەنتتىگىندەگى ارىپتەستەرىمىز سوندىقتان قازاقستاننىڭ قىسقى سپورت تۇرلەرى بويىنشا ارعى-بەرگى تاريحىنداعى ەڭ اتاعى مول ساڭلاعى, بۇرىنعى بەلگىلى شاڭعىشى ۆلاديمير سميرنوۆقا حابارلاسىپتى.
– ۆلاديمير ميحايلوۆيچ, جاعدايىڭىز قالاي؟
تىلشىلەردىڭ سوناۋ شۆەتسياعا سوعىلعان قوڭىراۋى تاڭەرتەڭ جۇمىسىنا كەتكەلى جاتقان ليللەحاممەر وليمپياداسىنىڭ چەمپيونىن ۇيىندە ۇستاپتى.
– ءبارى دە جاقسى. قازىر تمد ەلدەرى بويىنشا جۇمىس جاسايتىن «سكانيا» فيرماسى وكىلدىگىندەمىن. بۇدان بىرەر كۇن بۇرىن استانادان ورالدىم. الەمنىڭ جاسوسپىرىمدەر اراسىنداعى 2015 جىلعى چەمپيوناتىن الماتىدا وتكىزۋ ماسەلەسى شەشىلدى. ەندى ەرلەر اراسىنداعى 2019 جىلعى الەم چەمپيوناتىن دا قازاقستاندا وتكىزۋ قۇقىعىن جەڭىپ الۋعا كۇش سالىپ جاتىرمىز...
– قازاقستاندىقتاردىڭ سوچي وليمپياداسىنداعى ءمۇمكىندىكتەرىن قالاي باعالايسىز؟
– مەنىڭ ءوزىم دە بارشا قازاقستاندىقتار سياقتى وليمپيادا باستالار ءساتتى ايرىقشا ءبىر تولقۋ ۇستىندە كۇتىپ ءجۇرمىن. جانە بۇل جاي كۇتۋ عانا ەمەس. جاسىراتىنى جوق, ءوز سپورتشىلارىمىزدان ەرلىككە پارا-پار جارق ەتە قالاتىن قيمىلدار شىعار دەگەن ۇمىتتەمىن. مۇندا مەن, ەڭ الدىمەن, كىمدى ويىما الىپ تۇرمىن؟ ءبارىن دە. وليمپياداعا قاتىساتىن كەز كەلگەن اتلەتتەن ەرەكشە ەرلىك كۇتەمىن. قالاي دەگەندە دە, سولاي بولۋى ءۇشىن جان-تانىممەن جانكۇيەرلىك ەتەمىن. قاتتىراق كوڭىل بولەتىندەرىم – كونكي, شاڭعى, فريستايل, شورت-ترەك, مانەرلەپ سىرعاناۋ... مۇندايدا تابىستى الدىن الا جوسپارلاپ قويۋعا بولمايدى. سوندا دا بولسا, ءۇمىتسىز ەمەسپىز. ەگەر مەنىڭ ناقتى كىمدەرگە كوبىرەك كوز قادايتىنىمدى بىلگىلەرىڭىز كەلسە, ايتايىن, ولار وزدەرىڭىزگە دە ايان بولسا كەرەك: كونكيشى دەنيس كۋزينگە سەنەمىن, شاڭعىشى الەكسەي پولتورانينگە ءۇمىت ارتامىن. ولاردىڭ «التىن» الاتىندارىنا دا سەنگىم كەلەدى. سەبەبى, بۇل قىرانداردىڭ سوڭعى كەزدەرگى ناتيجەلەرى كوڭىلىمىزدى قوپاڭداتىپ قويدى.
– الەكسەي ميحايلوۆيچ, ەل پرەزيدەنتى 2022 جىلعى قىسقى وليمپيا- لىق ويىنداردى وزىمىزدە وتكىزۋ جولىنداعى كۇرەسىمىزگە قولداۋ كورسەتىپ وتىر. قازاقستاندا قىسقى وليمپيادانى ءوتكىزۋ جونىندەگى يدەيانى ەرەكشە جاقتاۋشى رەتىندە ءسىز بۇل باستاماعا نە قوسا الار ەدىڭىز؟
– مەن جەكە تۇلعا رەتىندە قازاقستاننىڭ وليمپيادانى وتكىزۋ جونىندەگى تاپسىرىس پروتسەسىنە ءالى قوسىلعان جوقپىن. بىراق بارىنشا ۇلكەن جاۋاپكەرشىلىكپەن بايانداي الامىن, وسىناۋ قۇرمەتتى اتاققا قول جەتكىزۋ جولىنداعى كۇرەسكە قولىمنان كەلەتىن بارلىق كومەگىمدى قوسامىن. ازىرگە بۇل ماسەلەنىڭ ۇڭعىل-شۇڭعىلىن قاراۋ قولعا الىنعان جوق. دەگەنمەن, الەمنىڭ باستى الامانىن الۋعا بارلىق مۇمكىندىك بار. شىنىندا, ءبىزدىڭ مۇمكىندىگىمىز وتە جوعارى. سەبەبى, بۇل كەزگە دەيىن قازاقستان الەمدىك دەڭگەيدە جارىستار وتكىزۋدە ايتارلىقتاي تاجىريبە جيناپ ۇلگەردى. ونىڭ سىرتىندا ەلىمىزدىڭ حالىقارالىق اۋقىمداعى بەدەلى دە ءبىرشاما بيىك. بۇل اقيقاتىندا دا ايرىقشا ماڭىزدى تاريحي شاق. ونى ەندى ءوزىمىزدىڭ پايدامىزعا بۇرا ءبىلۋىمىز كەرەك. دەمەك, تارازى باسىن اۋدارىپ جىبەرەتىندەي جاقسى تۇجىرىمداما كەرەك. ەڭ باستىسى, كۇللى قازاقستاندىقتاردىڭ وليمپيالىق ويىنداردى ءوز ەلدەرىندە وتكىزۋگە دەگەن ىنتاسى مەن ىقىلاسى بولۋى ءتيىس.
– سوچيدە قازاقستاننىڭ وليمپيالىق ويىنداردى وتكىزۋگە دەگەن شىنايى پەيىلىن كورسەتۋىنە مۇمكىندىك بولا ما؟
– وليمپيالىق سوچيدەگى قازاقستان ءۇيى كەلۋشىلەر مەن سپورت فۋنكتسيونەرلەرىنە ءبىزدىڭ ەل تۋرالى اڭگىمە ايتىپ, سىر شەرتىپ تۇرۋدىڭ بىردەن-ءبىر لايىقتى ارناسى بولماق. وسىندا ەلىمىزدىڭ ءار سالاداعى تابىستارى, الەم ينستيتۋتتارىنىڭ ءبىز جونىندە بەرگەن باعالارى, جاقىن كەلەشەكتەگى ماقساتتارىمىز بەن مىندەتتەرىمىز تۋرالى اڭگىمەنى جالعاستىرا ءبىلۋىمىز كەرەك. ويىندار كەزىندە بەلگىلى سپورت تۇلعالارىمەن جەكە كەزدەسۋدىڭ دە كوپ نارسەگە مۇرىندىق بولىپ كەتەتىنى بار. ءبىر سوزبەن ايتقاندا, ءسوچيدى 2022 جىلى قازاقستاندا دا سونداي ويىندار وتكىزۋگە مۇمكىندىك بار ەكەنىن بىلدىرۋگە پايدالانىپ قالۋىمىز كەرەك. ال ەڭ ۇلكەن سەرپىندى, ارينە, سپورتشىلارىمىزدىڭ سونداعى ناقتىلى تابىستارى بەرەدى.
دامير قوجامقۇل.