قازاقستاندا العاش رەت ۇستەل تەننيسىنەن «2021 ITTF Kazakhstan International Open» حالىقارالىق ءتۋرنيرى وتەدى, دەپ حابارلايدى Egemen.kz.
15-19 قىركۇيەك ارالىعىنا جوسپارلانعان جارىس قاراعاندى قالاسىنداعى جاڭا «Saryarka» ۇستەل تەننيس ورتالىعىندا ۇيىمداستىرىلادى.
بايراقتى باسەكەگە اۆستريا, ساۋد ارابياسى, ءۇندىستان, بەلارۋس, رەسەي, وزبەكستان, قىرعىزستان, موڭعوليا مەن قازاقستاننان 70-تەن استام سپورتشى قاتىسادى. جۇلدە قورى 30 مىڭ اقش دوللارىن قۇرايتىن بۇل بەدەلدى جارىس ITTF حالىقارالىق ۇستەل تەننيسى فەدەراتسياسىنىڭ تمد ەلدەرىندەگى بيىلعى جالعىز رەيتينگتىك تۋرنير سانالادى.
فەدەراتسيا اتاپ وتكەندەي, قاراعاندىداعىداي ۇستەل تەننيسىنىڭ ورتالىقتارى ەلىمىزدىڭ باسقا جەتى وبلىسىندا سالىنۋدا. جالپى اۋدانى 4000 شارشى مەتردەن اساتىن «Saryarka» ورتالىعىنىڭ قۇرامىندا 18 تەننيس ۇستەلى بار ويىن بولمەسى جانە حالىقارالىق ۇستەل تەننيسى فەدەراتسياسىنىڭ بارلىق تەحنيكالىق تالاپتارىنا سايكەس كەلەتىن 9 تەننيس ۇستەلى بار جاتتىعۋ زالى بار.
ەكى وليمپيادا ويىندارىنىڭ قاتىسۋشىسى جانە ۇلتتىق قۇرامانىڭ كوشباسشىسى كيريلل گەراسيمەنكو تۋرنيرگە قازاقستان قۇراماسىنىڭ قۇرامىندا قاتىسادى. ءتۋرنيردى Qazsport تەلەارناسى مەن حالىقارالىق ITTF فەدەراتسياسىنىڭ رەسمي سايتى تىكەلەي كورسەتەدى.