قىركۇيەكتىڭ العاشقى كۇنى ءبىلىم وشاقتارىندا كوپتەن كۇتكەن العاشقى قوڭىراۋ سوعىلىپ, وقۋشىلار التىن ۇيا – مەكتەبىنە ورالدى. ساعىندىرىپ جەتكەن بۇل ءبىلىم كۇنىنىڭ بۇرىنعىدان ءجونى بولەك. ويتكەنى ادەتتەگىدەي اراعا ءۇش اي ەمەس, ءبىر جارىم جىلداي ۋاقىت سالىپ, ۇستازدار مەن وقۋشىلار قاۋىمى مەكتەبىندە قايتا قاۋىشىپ وتىر.
پاندەميانىڭ كەسىرىنەن ءماجبۇر بولعان قاشىقتان وقىتۋ بىلىم بەرۋ سالاسىنىڭ بەرەكەسىن قاشىرىپ, وقۋشىلاردىڭ ءبىلىم ساپاسىنا ايتارلىقتاي تەرىس ىقپالىن تيگىزگەنى بەلگىلى. سوندىقتان سالاداعى ولقىلىقتاردىڭ ورنىن تولتىرۋ ءۇشىن وقۋ ورداسىنداعى داستۇرلى وقىتۋعا ورالۋ وسى جىلدىڭ باستى مىندەتى بولدى. بۇل رەتتە بىلىم وشاقتارىنىڭ ىندەت وشاعىنا اينالماۋىنا باسا ءمان بەرىلەدى. ياعني كوروناۆيرۋس ينفەكتسياسىنىڭ قاۋپى سەيىلمەگەن قازىرگى كەزدە بىلىم بەرۋ ۇيىمدارى ءۇشىن ارنايى سانيتارلىق تالاپتاردى ساقتاۋ جۇمىستارى ۇيىمداستىرىلدى.
سونداي-اق وفلاين وقىتۋعا ورالعان جاڭا وقۋ جىلىندا داستۇرلى وقۋلىعىمىز – «الىپپەمىزدىڭ» ورالعانى باستى جاڭالىق بولدى. وقىرمانداردىڭ ەسىندە بولسا, وسىدان بەس جىل بۇرىن باس باسىلىمدا «الىپپە» نەدەن جازىقتى بولدى؟» اتتى ماقالا جارىقكورىپ, Egemen Qazaqstan گازەتى اتالعان وقۋلىققا العاش رەت اراشا تۇسكەن ەدى. وسىلايشا, وقۋ باعدارلاماسىنان شىعىپ قالعان«الىپپە» بيىلدان باستاپ جاڭا ۇلگىدە 1-سىنىپ وقۋشىلارىنا تاپسىرىلدى. ۇلت ۇستازى احمەت بايتۇرسىن ۇلىنىڭ ادىستەمەسى نەگىزىندە ازىرلەنگەن باس كىتاپ ءبىلىم ساپاسىنىڭ كوتەرىلۋىنە باستايدى دەپ ۇمىتتەنەمىز.