تۇڭعىش رەت توپتىق كەزەڭدە وينايدى

وسىلايشا, وڭتۇستىكاستانا­لىق ۇجىم ءوز تاريحىندا تۇڭعىش رەت ەۋرو­دودا باسەكەسىنىڭ توپتىق كەزە­ڭىندە ويناۋ­عا مۇمكىندىك ال­دى. سونداي-اق «قاي­رات» قازاق فۋت­بولى تاريحىندا كونفە­رەنتسيا ليگا­سىنىڭ توپتىق ساتىسىنا شىق­قان ءبىرىنشى كلۋب بولدى. ال جال­پى قازاقستاندىق كوماندالار اراسىندا ەۋروكۋبوكتىڭ كۇزگى ماۋسىمىنا جولداما العان ءۇش كوماندانىڭ قاتارىنا قوسىلدى. ەستەرىڭىزدە بولسا, بۇعان دەيىن قارا­عاندىنىڭ «شاحتەرى» (ەۋرو­پا ليگاسى, 2013/2014 جىلعى ماۋسىم) مەن ەلوردانىڭ «استانا» كلۋبى (چەمپيوندار ليگاسى – 2015/2016 جىل, ەۋروپا ليگاسى – 2016/2017, 2017/2018, 2018/2019 جانە 2019/2020 جىلدارى) توپتىق كەزەڭدە ونەر كورسەتكەن بولاتىن. سونىمەن قا­تار «استانا» ەۋروپا ليگاسىنىڭ 2018/2017 جىل­عى ماۋسىمىندا ءتۋرنيردىڭ 1/16 كە­زەڭىنە دەيىن جەتكەن ءبىرىنشى قازاق­ستاندىق كوماندا اتانعان ەدى. ەندى مىنە, سول جەتىستىكتى الما­تىلىق كلۋبتىڭ قاي­تالاۋىنا زور مۇمكىندىك تۋىپ تۇر.

«قايراتتىڭ» بيىلعى ەۋرو­كۋبوك ويىندارىندا ءجۇرىپ وت­كەن جولىنا زەر سالار بولساق, الما­تىلىق كلۋب ءۇشىن ىرىكتەۋ كەزەڭى وڭايعا سوقتى دەپ ايتا المايمىز. «وتكەلدەن وتەردە ات اۋىستىرمايدى» دەسە دە, «قايرات» ىرىكتەۋ كەزەڭى اياقتالعانعا دەيىن ءۇش باپكەر اۋىستىرىپ ۇلگەردى. چەمپيوندار ليگاسىنىڭ ىرىكتەۋ كەزەڭى باستالار تۇستا فۋتبولشىلاردىڭ قىر-سىرىن جاقسى بىلەتىن, بىرنەشە جىلدان بەرى كلۋبتا جۇمىس ىستەپ كەلە جاتقان باس باپكەر الەكسەي شپيلەۆسكي قىزمەتىنەن كەتىپ, ونىڭ ورنىنا «قايرات-جاستار» كومانداسىنىڭ جاتتىقتىرۋشىسى كيريلل كەكەر تاعايىندالدى. «قايرات» سەكىلدى ءىرى كلۋبتاردى جاتتىقتىرىپ كورمەگەن, ۆاگنەر لاۆ سەكىلدى جۇلدىز فۋتبولشىلارمەن قويان-قولتىق ارالاسىپ جۇمىس ىستەيتىندەي تاجىريبەسى جوق جاس مامان وسىلايشا «قايراتتى» چەمپيوندار ليگاسى دەيتىن ماڭىزدى جارىسقا دايىندادى. كوپشىلىك كۇتكەندەي «قايرات» ء«ا» دەگەننەن ءتۋرنيردى ءساتتى باستاعانىمەن, كەيىنگى كە­زەڭدە دەڭگەيى بەلگىلى بولا باس­تادى. ەكىنشى ىرىكتەۋ كەزەڭىندە سەر­بيانىڭ «تسرۆەنا زۆەزدا» كلۋبىنان ەكى ويىن قورىتىندىسى بويىنشا 6:2 (2:1, 5:0) ەسەبىمەن وڭباي جەڭىلىپ, ەۋروپا ليگاسىنا ءتۇسىپ قالدى. كيريلل كەكەر شاكىرتتەرى بۇل اينالىمدا دا وزدەرىنىڭ ويىنىن كورسەتە المادى. دەڭگەي جاعىنان الدەقايدا تومەن بولعان ارمەنيانىڭ «الاشكەرت» ۇجىمىمەن كەزدەسىپ, بۇل ويىندا دا 3:2 (0:0, 3:2) ناتيجەسىمەن قارسىلاستارىنا جول بەردى.

ءسويتىپ «قايرات» ءۇشىنشى دارە­جەلى كون­فەرەنتسيا ليگاسىنا جول الدى. «الاش­كەرتتەن» جەڭىلگەن سوڭ كيريلل كەكەر ءوز قىز­مەتىنەن كەتكەنىن مالىمدەپ, ونىڭ ورنىنا تاعى­ دا جاس بالالاردى باپتايتىن ارتەم گاۆريلەنكو باس باپكەردىڭ مىندەتىن اتقا­رۋشى بو­لىپ تاعا­يىندالدى. ابىروي بول­عان­دا گاۆريلەنكو توپ­تىق كە­زەڭگە جولداما بەرەت­ىن سوڭعى ويىن­دا سۇرىنگەن جوق. قايتا جىگىت­­تەرگە جىگەر بەرىپ, كوماندانى تۇڭعىش رەت ەۋرو­كۋبوكتىڭ توپ­تىق كەزەڭىنە الىپ شىق­تى. پلەي-وفف كەزەڭىندە «قايرات» ەكى ويىن قورى­تىندىسى بويىنشا ليۋكسەمبۋرگتىڭ «فولا» كومانداسىنان با­سىم ءتۇستى. سىرت الاڭدا وتكەن العاشقى ويىندا الما­تىلىقتار 4:1 ەسەبىمەن جە­ڭىسكە جەتىپ, توپ­تىق كەزەڭنىڭ ماسە­لەسىن سول كەزدە-اق شەشىپ قويىپ ەدى.

الماتىدا وتەتىن ماتچ الدىن­دا «قاي­رات­تىڭ» بۇرىنعى بەلدى ويىنشىسى, تاجىريبەلى مامان قۇربان بەردىەۆ كلۋبتىڭ جاڭا باس باپكەرى بولىپ شىعا كەلدى. ءسويتىپ ىرىكتەۋ كەزەڭنىڭ سوڭعى ويىنىن ءۇشىنشى باپكەرمەن بىرگە وينا­عان الاڭ يەلەرى بۇل ماتچتا دا ءوز مىقتىلىعىن دالەلدەپ, 3:1 ەسەبىمەن جەڭىسكە جەتتى. ويىن­­نىڭ 13-مينۋتىندا ارتۋر شۋ­شەناچەۆ قاقپا­شى­مەن جەكە-دارا شىعىپ, ءوز مۇمكىندىگىن گولعا اينالدىردى. 28-مينۋتتا ۆاگنەر لاۆ قاقپا­نىڭ وڭ بۇرىشىن ءدال كوزدەپ, ەسەپتى ەسەلەدى. ال 36-مينۋتتا ارتۋر شۋشەناچەۆ كومانداسىنىڭ ءۇشىنشى گولىن سوقتى. بىراق كەزدەسۋدىڭ 44-مي­نۋتىندا مۋستافيچ ايىپ الا­ڭىنىڭ سىرتىنان تاماشا سوققى جاساپ, جۇبانىش گولىن سوقتى. وسىلايشا, «قايرات» ەكى ويىننىڭ ناتيجەسى بويىنشا 7:2 ەسەبىمەن جەڭىسكە جەتتى.

وكىنىشكە قاراي, كونفەرەنتسيا ليگاسىنىڭ پلەي-وفف كەزەڭىندە ويناعان قاراعاندىنىڭ «شاحتە­رى» توپتىق كەزەڭگە شىعا المادى. تەل-ءاۆيۆتىڭ «ماككابيىمەن» كە­­زدەسكەن جەر­لەستەرىمىز ەكى ويىن­نىڭ قورىتىندىسى بويىن­شا 4:1 ەسەبىمەن جەڭىلىپ, ەۋروكۋبوك ويىن­دارىن وسى جەردەن اياقتاۋعا ءماج­بۇر بولدى. «شاحتەر» ەلوردادا وتكەن ءبىرىنشى ويىندا قارسى­لاستارىنا 2:1 ەسەبىمەن جول بەرسە, ءبىر اپتادان كەيىن تەل-اۆيۆتەگى كەزدەسۋدە 2:0 ناتيجەسىمەن جە­ڭىل­دى. الاڭ يەلەرىنەن گولداردى ءبى­رىنشى تايمدا يدان ناحمياس (18-مينۋت) جانە دان گلازەر (40) سالدى. «شاحتەر» بۇعان دەيىنگى ىرىكتەۋ كەزەڭىندە رۋمىنيانىڭ «ستياۋا» كلۋبىنان (0:1, 2:1, پەنالتي بويىنشا – 5:3) جانە ۋكراينانىڭ «كولوس» ۇجىمىنان (0:0, 0:0, پەنالتي بويىنشا – 3:1) باسىم تۇسكەن بولاتىن.

وسىلايشا بيىلعى ەۋروكۋبوك ويىندارىنا قازاقستاننىڭ ءتورت كومانداسى قاتىسىپ, تەك ءبىر عانا كلۋبىمىزعا توپتىق كەزەڭدە ويناۋ باقىتى بۇيىردى. ارينە, بۇل قازاقستان ءۇشىن جامان ناتيجە ەمەس. بىراق جوق دەگەندە ەكى كلۋ­بىمىزدىڭ توپتىق كەزەڭدە ونەر كورسەتۋگە مۇمكىندىگى دە, الە­ۋەتى دە جەتەر ەدى. وكىنىشكە قا­راي, ەلوردانىڭ «استاناسى» كون­فەرەنتسيا ليگاسىنىڭ ءۇشىن­شى كەزەڭىندە ءوز الاڭىندا فين­ليانديالىق كوماندانى 3:1 ەسە­بى­مەن جە­ڭىپ جاتىپ, ماتچ سوڭىن­دا 4:3 ناتي­جەسىمەن جەڭى­لىپ, جان­كۇ­يەرلەرىن جەرگە قاراتسا, قوس­تاناي­دىڭ «توبىلى» جاس بالا­لاردان قۇرالعان سلوۆا­كيانىڭ «جي­لي­ناسىنان» ماسقارا بولىپ جەڭىلدى – 0:6.

كۇزگى ماۋسىمدى جاڭا بەلەس­پەن, جاڭا باس باپكەرمەن باس­تاعالى تۇرعان الماتىنىڭ «قاي­راتى» ەندى الداعى ءۇش اي بويى قازاقستاندىق فۋتبول جانكۇيەر­لەرىنە ناعىز مەرەكەلىك كوڭىل كۇي سىيلادى دەگەن ءۇمىت بار.

27 تامىزدا وتكەن كونفەرەنتسيا ليگاسى­نىڭ توپتىق كەزەڭىنە جەرەبە تارتۋ ءراسىمىنىڭ ناتي­جەسى بويىنشا «قايرات» شۆەيتساريا­نىڭ «با­زەل», ازەربايجاننىڭ «كا­راباح» جانە كيپردىڭ «ومونيا» كلۋبتارىمەن ن توبىندا وينايتىن بولدى.

ايتا كەتەيىك, ءار توپتان ءبىرىن­شى جانە ەكىنشى ورىن العان كوماندالار جارىستى كوكتەمگى ماۋسىمدا ودان ءارى جالعاستىرۋعا مۇم­كىندىك الادى. توپتىڭ جەڭىم­پازى 1/8 كەزەڭگە جولداما السا, ەكىنشى ورىنداعى كوماندا ەۋروپا لي­گاسىنىڭ توپتىق كەزەڭىندە ءۇشىنشى ورىن العان كلۋبپەن جولىعادى.