ۆەتنامدا كوروناۆيرۋسقا قاتىستى رەكوردتىق كورسەتكىش تىركەلدى. كوسوۆادا «دەلتا» شتامىن جۇقتىرعاندار سانى كوبەيىپ جاتىر, دەپ حابارلايدى Egemen.kz COVID-19 تارالۋىنا جول بەرمەۋ جونىندەگى ۆەدومستۆوارالىق كوميسسياعا سىلتەمە جاساپ.
ۆەتنامدا تاۋلىگىنە 13 مىڭعا جۋىق جاعداي تىركەلدى. بۇعان دەيىنگى ەڭ جوعارى كورسەتكىش 25 تامىزدا 12 096 ۆيرۋس جۇقتىرۋ جاعدايى انىقتالعان.
ناۋقاستاردىڭ بارلىعى دەرلىك ىندەتتى ەل ىشىندە جۇقتىرعان. وڭىرلەر بويىنشا: حوشيميندە 5 383 جاعداي, بينزونگ پروۆينتسياسىندا 4 187, دونگناي پروۆينتسياسىندا 996 جاعداي تىركەلدى. وسىلايشا, ۆەتنامداعى سىرقاتتانعانداردىڭ جالپى سانى 410 366 ادامعا دەيىن ءوسىپ, كوز جۇمعاندار سانى 10 053 ادامدى قۇرادى.
كوسوۆو ۇلتتىق دەنساۋلىق ساقتاۋ ينستيتۋتى COVID-19 جاعدايلارى تۋرالى كۇندەلىكتى ستاتيستيكانى جاريالاپ وتىرادى. پتر سىناقتارىنىڭ 12 564 ۇلگىسىنەن 2 098 كوروناۆيرۋس تاسىمالداۋشىسى انىقتالدى, ولاردىڭ كوپشىلىگى «دەلتا» شتامىن جۇقتىرعان.
كوسوۆو ۇكىمەتىنىڭ وكىلى بەسنيك بيسليمي ەلگە كوروناۆيرۋستىق ۆاكتسينانىڭ 650 000 دوزاسى كەلەتىنىن ايتتى. گەرمانيا 150 000 دوزا جونەلتسە, قالعان جارتى ميلليون دوزا اقش-تان جولدانباق.