نۇر-سۇلتاندا قولىنا پىشاق ۇستاعان ەر ادام ءدارىحانانى توناپ, كومپيۋتەرلىك كلۋبقا باردى, دەپ حابارلايدى Egemen.kz نۇر-سۇلتان قالاسى پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
«ساعات 22.30-دا 102-ارناعا توناۋ فاكتىسى بويىنشا حابارلاما كەلىپ ءتۇستى. قوڭىراۋ شالۋشىنىڭ ايتۋىنشا, بەلگىسىز بىرەۋ ب. مومىش ۇلى داڭعىلىندا ورنالاسقان ءدارىحانانىڭ قىزمەتكەرىن پىشاقپەن قورقىتىپ, كاسساسىنان 30 مىڭ تەڭگە ۇرلاپ كەتكەن. كۇدىكتىنى ۇستاۋعا پوليتسيانىڭ جەكە قۇرامى باعىتتالدى», دەلىنگەن حابارلامادا.
تەرگەۋ بارىسىندا كەشكى ساعات ون شاماسىندا دارىحاناعا مەديتسينالىق ماسكاداعى بەلگىسىز ەر ادام كەلىپ, ءدارى-دارمەكتىڭ بار-جوعىن سۇراعانى انىقتالدى.
«23 جاستاعى فارماتسەۆت ءدارى-دارمەكتى ىزدەۋگە جونەلگەن كەزدە, ەر ادام ارتىنان جۇگىرىپ, ونى ۇستاپ الىپ, موينىنا پىشاق سالىپ, كاسسادان اقشا تالاپ ەتۋىن باستادى. ناتيجەسىندە اقشانى ۇرلاپ العان كۇدىكتى بەلگىسىز باعىتقا قاشىپ كەتكەن. جەدەل ۋاكىلدەر ءدارىحانادان جۇگىرىپ كەلە جاتقان جىگىتتى بايقاعان كۋاگەرلەردى تەرگەدى. كوشەلەردە ورنالاسقان بەينەباقىلاۋ كامەرالارى بويىنشا كۇدىكتىنىڭ قاي جەرگە قاشقانى انىقتالدى», دەپ حابارلادى پوليتسيادان.
كومپيۋتەرلىك كلۋبتاردىڭ ءبىرىن تەكسەرۋ كەزىندە كۇدىكتىگە ۇقساس 26 جاستاعى جىگىت ۇستالدى. جەكە تەكسەرۋ كەزىندە سۋىق قارۋ مەن ۇرلانعان اقشا تابىلدى. ول كىناسىن تولىق مويىندادى.
اتالعان دەرەك بويىنشا قىلمىستىق ءىس قوزعالىپ, قىلمىسكەر ۋۇي-عا قاماۋعا الىندى.