بۇعان دەيىن فۋتبولدان ايەلدەر اراسىنداعى ۇلتتىق قۇرامانىڭ ەكس-كاپيتانى حاليدا پوپال سپورت ۇيىمدارىنا جۇگىنىپ, سپورتشىلاردىڭ قاۋىپسىزدىگىن قامتاماسىز ەتۋدى سۇراعان, دەپ جازادى Egemen.kz.
ۆۆس تاراتقان مالىمەت بويىنشا, حالىقارالىق فۋتبول قاۋىمداستىقتارى فەدەراتسياسى (فيفا) بىرنەشە ەلدىڭ ۇكىمەتىنە فۋتبولشىلاردى اۋعانستاننان شۇعىل تۇردە شىعارۋ تۋرالى حات جولدادى.
حالىقارالىق كاسىبي فۋتبولشىلار قاۋىمداستىعى فەدەراتسياسى (FIFPro) دا اۋعان سپورتشىلارىنا كومەكتەسۋگە شاقىردى.
«سوڭعى بىرنەشە كۇندە FIFPro اۋعانستانداعى سپورتشىلاردى ەۆاكۋاتسيالاۋ جوسپارىن ازىرلەۋ ءۇشىن بىرنەشە ەلدىڭ ۇكىمەتىمەن بايلانىستا بولدى. بۇل قۇتقارۋ ميسسياسىنىڭ ماقساتى – كوپتەگەن ادامنىڭ قاۋىپسىزدىگىن ساقتاۋ», دەپ جازعان قاۋىمداستىق Twitter-دە.
FIFPro سونىمەن قاتار جاس اۋعان فۋتبولشىسى, 16 جاسقا دەيىنگى ۇلتتىق قۇرامانىڭ بۇرىنعى ويىنشىسى زاكي ءانۆاريدىڭ كابۋل اۋەجايىندا قايتىس بولۋىنا بايلانىستى كوڭىل ايتتى. ول اۋعانستاننان قاشىپ بارا جاتىپ, ۇشاقتىڭ دوڭگەلەگىندە وتتەگى جەتىسپەۋشىلىگىنەن كوز جۇمدى.
بۇعان دەيىن فۋتبولدان ايەلدەر اراسىنداعى ۇلتتىق قۇرامانىڭ ەكس-كاپيتانى حاليدا پوپال سپورت ۇيىمدارىنان سپورتشىلاردىڭ قاۋىپسىزدىگىن قامتاماسىز ەتۋدى وتىنگەن. ول تاليبان بيلىگىندە قالعان ادامداردىڭ تاعدىرى ءۇشىن الاڭدايتىنىن ءبىلدىردى.
«مەن اۋعانستانداعى فۋتبولشىلاردان ءتۇرلى حابارلاما الامىن. ولار قاراۋسىز قالعاندارىن, ۇيىنەن شىعا المايتىنىن, قورقاتىنىن ايتادى. بۇل قورقىنىشتى ءتۇس سياقتى. ءبىز ايەلدەر مەن قىزداردى باتىل بولۋعا, الەۋمەتتىك جەلىلەرىن جابۋعا شاقىرامىز. وتە اۋىر. ءبىز ايەلدەردىڭ قۇقىعىن قاتتى قورعادىق, بىراق قازىر ولاردىڭ ومىرىنە ۇلكەن قاۋىپ ءتونىپ تۇر», دەدى حاليدا پوپال.
تالىپتەر بيلىك باسىنا كەلگەلى ايەلدەردىڭ «شاريعات زاڭىنا سايكەس» جۇمىس ىستەي الاتىنىن مالىمدەگەن.