اسقار مامين رف ۇكىمەتىنىڭ توراعاسى ميحايل ميشۋستينمەن كەزدەستى

كەلىسسوز بارىسىندا قوس تاراپ ساۋدا-ەكونوميكا, ونەركاسىپتىك كووپەراتسيا, كولىك-لوگيستيكا, ەنەرگەتيكا جانە باسقا دا سالالارداعى ىنتىماقتاستىقتى ودان ءارى ارتتىرۋ ماسەلەلەرىن تالقىلادى.

وسى جىلى ەلدەر اراسىنداعى ساۋدا-ەكونوميكالىق ىنتىماقتاستىق سەرپىنى بىرتىندەپ قالپىنا كەلتىرىلۋدە. بيىلعى قاڭتار-ماۋسىم ايلارىندا ەكىجاقتى تاۋار اينالىمى $10,7 ملرد قۇرادى, بۇل 2020 جىلدىڭ سايكەس كەزەڭىندەگى كورسەتكىشتەن 27%-عا جوعارى. قازىرگى ديناميكا ساقتالعان جاعدايدا, ەكى ەل اراسىنداعى ساۋدا كولەمى بيىل $23 ملرد-تان اسادى دەپ كۇتىلۋدە.

قازاقستاندا رەسەيدىڭ قاتىسۋىمەن 7791 كاسىپورىن جانە 3325 قازاقستان-رەسەي بىرلەسكەن كاسىپورىندارى جۇمىس ىستەيدى. رەسەيلىك كومپانيالار قر ەكونوميكاسىنا سالىنعان قاراجات كولەمى بويىنشا باستى ينۆەستورلاردىڭ بەستىگىنە كىرەدى. سوڭعى 10 جىلدا رەسەي قازاقستانعا شامامەن $12,6 ملرد ينۆەستيتسيا سالدى. رەسەيلىك كومپانيالاردىڭ ينۆەستيتسيالىق پورتفەلى ءاربىر سالادا كەزدەسەدى. جالپى سوماسى $5,3 ملرد قۇرايتىن, ونەركاسىپتىك كووپەراتسيا, ساۋدا, قۇرىلىس يندۋسترياسى, فارماتسەۆتيكا, مۇناي-حيميا جانە جەڭىل ونەركاسىپ سالالارىنداعى 30 بىرلەسكەن ءىرى جوبا ىسكە اسىرۋ جانە پىسىقتاۋ ساتىسىندا تۇر.

اعىمداعى جىلدىڭ 6 ايىندا قازاقستان مەن رەسەي ارقىلى ورتالىق ازيا, ەۋروپا, قيىر شىعىس باعىتتارىندا بارلىعى 406,5 مىڭ جفە تاسىمالداندى, بۇل 2020 جىلدىڭ سايكەس كەزەڭىندەگىدەن 48%-عا ارتىق. قازاقستان اۋماعى ارقىلى كونتەينەرلىك تاسىمالدار كولەمى 326,2 مىڭ جفە (+58%) قۇرادى.

كەلىسسوز قورىتىندىسى بويىنشا ەكى ەلدىڭ ۇكىمەت باسشىلارىنىڭ قاتىسۋىمەن كەلەسى قۇجاتتارعا قول قويىلدى:

شىعىس تارۋتين (قازاقستان رەسپۋبليكاسى), تارۋتين (رەسەي فەدەراتسياسى) كەن ورىندارىندا مىس (مىس-التىن) كەندەرىن ءوندىرۋ كەزىندە شەكارا ماڭىنداعى اۋماقتا شارۋاشىلىق قىزمەتتى جۇزەگە اسىرۋ ەرەكشەلىكتەرى تۋرالى ۇكىمەتارالىق كەلىسىم; احفو مەن تاتارستان رەسپۋبليكاسى اراسىنداعى ىنتىماقتاستىق جونىندەگى ءىس-شارالار جوسپارى; قر ستراتەگيالىق جوسپارلاۋ جانە رەفورمالار جونىندەگى اگەنتتىگى, احقو, «سكولكوۆو» ماسكەۋ باسقارۋ مەكتەبى اراسىنداعى تۇراقتى دامۋ ستراتەگيالارى جونىندەگى ىنتىماقتاستىق تۋرالى مەموراندۋم; «باشقۇرت سودا كومپانياسى» اق مەن «كاۋستيك» اق اراسىنداعى ىنتىماقتاستىق تۋرالى باس كەلىسىم; قاعازسىز تەحنولوگيا بويىنشا «رتج» ااق جانە «قتج» ۇك» اق/ «قتج-جت» جشس قاتىسۋىمەن جۇكتەر مەن ۆاگونداردى تاسىمالداۋعا كوشۋدى جانداندىرۋ جونىندەگى جول كارتاسى; «قتج» ۇك» اق مەن «رتج» ااق اراسىنداعى تەمىر جول كولىگىمەن اگروونەركاسىپتىك ونىمدەردى تاسىمالداۋدى ۇيىمداستىرۋ سالاسىنداعى ىنتىماقتاستىق تۋرالى مەموراندۋم.

قر پرەمەر-ءمينيسترى ا. مامين مەن رف ۇكىمەتىنىڭ توراعاسى م. ميشۋستين قازاقستان ۇكىمەتىنىڭ تسيفرلىق كەڭسەسىنىڭ جۇمىسىمەن, حالىق پەن كاسىپكەرلىك سۋبەكتىلەرىنە مەملەكەتتىك قىزمەتتەردى تسيفرلاندىرۋ سالاسىندا ىسكە اسىرىلىپ جاتقان جوبالارمەن, سونداي-اق احقو قىزمەتىمەن تانىستى.