جىل باسىنان بەرى پاۆلودارلىق پوليتسەيلەر يەسىز جايىلىپ جۇرگەن 4936 باس مالدى انىقتادى. جانۋارلار ايىپپۇل تۇراعىنا ايدالسا, ولاردىڭ يەلەرى جاۋاپكەرشىلىككە تارتىلدى, دەپ حابارلايدى Egemen.kz پاۆلودار وبلىستىق پد ءباسپاسوز قىزمەتىنىڭ Instagram پاراقشاسىنا سىلتەمە جاساپ.
باقىلاۋسىز جايىلىپ جۇرگەن مال ۇرىلار ءۇشىن - وڭاي ولجا, ال جۇرگىزۋشىلەر ءۇشىن - قايعىلى جول-كولىك وقيعاسى بولۋى مۇمكىن.
تەرەڭكول اۋدانىنداعى «ومبى-مايقاپشاعاي» اۆتوجولىنىڭ 324 شاقىرىمىندا پاترۋلدىك پوليتسيا قىزمەتكەرلەرى قاراۋسىز جايىلىپ جۇرگەن سيىرلاردى انىقتادى, ناتيجەسىندە 10 سيىر ارنايى ايىپ تۇراعىنا قامالدى.
ءىرى قارانىڭ يەسى بولىپ تابىلاتىن 40 جاستاعى اۋىل تۇرعىنى قر اقبك 408-بابى بويىنشا اكىمشىلىك جاۋاپكەرشىلىككە تارتىلىپ, 3 اەك مولشەرىندە ايىپپۇل وتەدى.
ءدال سونداي دەرەك «لەنين-اقسۋ» اۆتوجولىنىڭ 11 شاقىرىمىندا تىركەلگەن. ءىرى قارا مال قىستا مال ازىعىنا ارنالعان ءشوپتى تاپتاپ, شابىندىقتا باقىلاۋسىز جايىلىپ جۇرگەن.
ۋچاسكەلىك پوليتسيا ينسپەكتورى 34 باس مالدى ايىپپۇل تۇراعىنا قامادى. 55 جاستاعى مال يەسى قر اقبك 408-بابى بويىنشا اكىمشىلىك جاۋاپكەرشىلىككە تارتىلدى.
«جىل باسىنان بەرى پاۆلودارلىق پوليتسەيلەر باقىلاۋسىز جايىلىپ جۇرگەن 4 936 مالدى انىقتادى, ولار ايىپپۇل تۇراعىنا قامالدى. بۇگىنگى كۇنى وبلىس اۋماعىندا مالعا ارنالعان 146 ايىپپۇل تۇراقتارى جۇمىس ىستەيدى», دەدى پاۆلودار وبلىستىق پوليتسيا دەپارتامەنتىنىڭ پاترۋلدىك پوليتسيا روتاسى كومانديرىنىڭ مىندەتىن اتقارۋشى ادىلەت مەرعازين.