اقش-تىڭ چيكاگو شتاتىنىڭ فارماتسەۆتى ۆاكتسيناتسيانىڭ جۇزدەن استام كۋالىگىن ساتقانى ءۇشىن 120 جىلعا باس بوستاندىعىنان ايىرىلۋى مۇمكىن, دەپ حابارلايدى Egemen.kz NBC Chicago پورتالىنا سىلتەمە جاساپ.
چيكاگو تۇرعىنى تانگتانگ چجاوعا 12 ايىپ تاعىلىپ, ارقايسىسى بويىنشا 10 جىلعا دەيىن باس بوستاندىعىنان ايىرۋ جانە 250 مىڭ دوللار (106 ميلليون تەڭگەدەن استام) ايىپپۇل سالىنۋى مۇمكىن.
سوت قۇجاتتارىنا سايكەس, ەر ادام اقش-تىڭ اۋرۋلاردى باقىلاۋ جانە الدىن-الۋ ورتالىقتارى (CDC) بەرەتىن 125 ۆاكتسيناتسيا سەرتيفيكاتىن ساتتى دەپ ايىپتالۋدا. تەرگەۋ مالىمەتتەرى بويىنشا, چجاو سەرتيفيكاتتاردى eBay ينتەرنەت-دۇكەنىندە 2021 جىلدىڭ ناۋرىز-ءساۋىر ارالىعىندا ساتىپ وتىرعان. فارماتسەۆت ءار جاساندى قۇجاتتىڭ قۇنىن ون دوللارعا باعالاعان. ايىپتاۋ قورىتىندىسىنا سايكەس, جالپى العاندا چجاو زاڭسىز ارەكەتتەن 1270 دوللاردان (540 مىڭ تەڭگە) استام تابىس تاپتى.
تەرگەۋشىلەر چجاو ءوزى جۇمىس ىستەگەن ءدارىحانادان CDC ۆاكتسيناتسيا سەرتيفيكاتتارىن ۇرلادى دەپ سانايدى. ەر ادام يللينويس شتاتىنىڭ سولتۇستىك وكرۋگىنىڭ سوتىندا وزىنە تاعىلعان ايىپتاردى مويىندامادى.
«چيكاگو ايماعىندا اتالمىش زاڭ بۇزۋشىلىق ءبىرىنشى رەت ورىن الىپ وتىر. تەرگەۋ جالعاسادى. جاقىن ارادا جالعان قۇجات راسىمدەۋدىڭ باسقا دا فاكتىلەرىنىڭ بەتىن اشاتىن بولامىز دەپ ۇمىتتەنەمىن», دەدى ارنايى اگەنت شيۆون دجونسون.
يللينويس شتاتىنىڭ قارجىلىق جانە كاسىبي رەتتەۋ دەپارتامەنتىنىڭ فارماتسەۆتيكالىق ليتسەنزيالارىن ىزدەۋ چجاو ەشقاشان تارتىپتىك جاۋاپكەرشىلىككە تارتىلماعانىن جانە 2018 جىلى ليتسەنزيا العانىن كورسەتتى.
فبر چيكاگو كەڭسەسىنىڭ ارنايى اگەنتى ەممەرسون بيۋي چجاونىڭ ارەكەتىن «COVID-19-عا قارسى كۇرەسكە ۇلەس قوسقاندار ءۇشىن قورلاۋ» دەپ اتادى.
«ۆاكتسينا سالدىرماعان ادامدارعا جالعان سەرتيفيكاتتاردى سانالى تۇردە ساتۋ ميلليونداعان امەريكالىقتاردى ءولىم قاۋپىنە دۋشار ەتەدى», دەدى بيۋي ادىلەت دەپارتامەنتىنىڭ قاماۋعا الۋ تۋرالى ءباسپاسوز حابارلاماسىندا.
اقش ادىلەت مينيسترلىگى بۇل وقيعانى تەرگەۋدى دەنساۋلىق ساقتاۋ جانە حالىققا قىزمەت كورسەتۋ دەپارتامەنتىنىڭ باس ينسپەكتورىنىڭ باسقارماسى دا جۇرگىزىپ جاتقانىن حابارلادى.