ومارحان وكسىكباەۆ,
پارلامەنت ءماجىلىسىنىڭ دەپۋتاتى:
– ەلباسىمىز ەلىمىزدىڭ بولاشاقتاعى جولىن ناقتىلايتىن, ايقىندايتىن جولداۋىن جاسادى. مەملەكەت باسشىسىنىڭ ءار ءماسەلە, ءار سالاعا بايلانىستى بەرگەن تاپسىرمالارى وتە ورىندى دەپ ەسەپتەيمىن. اسىرەسە, ەكونوميكالىق دامۋدا عىلىمنىڭ الاتىن ورنى, اتقاراتىن قىزمەتى ەرەكشە, سوندىقتان دا يندۋستريانى عىلىمي نەگىزدە دامىتۋ كۇن تارتىبىنە قويىلىپ وتىر.
پرەزيدەنت ۇكىمەت پەن مەملەكەتتىك ورگاندارعا شاعىن جانە ورتا بيزنەستى دامىتىپ, ونىڭ ءىجو-دەگى ۇلەسىن 50 پايىزعا دەيىن جەتكىزۋگە تاپسىرما بەردى. راس, دامىعان ەلدەردە وسى سالانىڭ ءىجو-دەگى ۇلەس سالماعى جوعارى. الداعى كەزەڭدەردە ءبىزدىڭ ەلىمىز دە وسى دەڭگەيگە جەتىپ قالار دەگەن ءۇمىتىمىز بار. سونداي-اق, جولداۋدا مەملەكەت باسشىسى قارجى ينستيتۋتتارىنا دامىتۋ جولدارىن, ونىڭ تۇجىرىمداماسىن دايىنداۋدى دا تاپسىردى. جالپى, بۇل جولداۋ ەلىمىزدىڭ ەكونوميكاسىن دامىتىپ, حالىقتىڭ ءال-اۋقاتىن ءارى قاراي ارتتىرۋعا جاڭاشا سەرپىن بەرەدى دەپ ەسەپتەيمىن.
ومارحان وكسىكباەۆ,
پارلامەنت ءماجىلىسىنىڭ دەپۋتاتى:
– ەلباسىمىز ەلىمىزدىڭ بولاشاقتاعى جولىن ناقتىلايتىن, ايقىندايتىن جولداۋىن جاسادى. مەملەكەت باسشىسىنىڭ ءار ءماسەلە, ءار سالاعا بايلانىستى بەرگەن تاپسىرمالارى وتە ورىندى دەپ ەسەپتەيمىن. اسىرەسە, ەكونوميكالىق دامۋدا عىلىمنىڭ الاتىن ورنى, اتقاراتىن قىزمەتى ەرەكشە, سوندىقتان دا يندۋستريانى عىلىمي نەگىزدە دامىتۋ كۇن تارتىبىنە قويىلىپ وتىر.
پرەزيدەنت ۇكىمەت پەن مەملەكەتتىك ورگاندارعا شاعىن جانە ورتا بيزنەستى دامىتىپ, ونىڭ ءىجو-دەگى ۇلەسىن 50 پايىزعا دەيىن جەتكىزۋگە تاپسىرما بەردى. راس, دامىعان ەلدەردە وسى سالانىڭ ءىجو-دەگى ۇلەس سالماعى جوعارى. الداعى كەزەڭدەردە ءبىزدىڭ ەلىمىز دە وسى دەڭگەيگە جەتىپ قالار دەگەن ءۇمىتىمىز بار. سونداي-اق, جولداۋدا مەملەكەت باسشىسى قارجى ينستيتۋتتارىنا دامىتۋ جولدارىن, ونىڭ تۇجىرىمداماسىن دايىنداۋدى دا تاپسىردى. جالپى, بۇل جولداۋ ەلىمىزدىڭ ەكونوميكاسىن دامىتىپ, حالىقتىڭ ءال-اۋقاتىن ءارى قاراي ارتتىرۋعا جاڭاشا سەرپىن بەرەدى دەپ ەسەپتەيمىن.
ءاسيما بيمەندينا,
پارلامەنت ءماجىلىسىنىڭ دەپۋتاتى:
– ءار جىل سايىن حالىق كۇتەتىن جولداۋدى تىڭدادىق. بۇل – ەل ءومىرىندەگى ەرەكشە ءبىر بەلەس. ويتكەنى, ول – بارشا قازاقستاندىقتاردىڭ ءومىرىنە, بولاشاعىنا قاتىستى ءماندى قۇجات. ەرتەڭىنىڭ باعىتىن, جۇرەتىن جولىن, ءوسۋ جولىنداعى مۇراتىن انىق بىلگەن ەلدەردىڭ قانداي جەڭىستەرگە جەتكەنىن تاريحتان بىلەمىز. ءبىزدىڭ ەلىمىز تاۋەلسىزدىگىنە ەندى قول جەتكىزىپ جاتقاندا الداعى 30 جىلىن ويلاسا, ەندى ءجۇرىسىن دۇرىستاپ, تىنىسىن جوندەپ العاندا ماڭگىلىك ەل دەگەن مۇراتتى العا قويىپ وتىر. ماڭگىلىك ەل دەگەن حالىقتىڭ جاعدايى, ماڭگىلىك ەل دەگەن ەلدىڭ ورلەۋى, ماڭگىلىك ەل دەگەن شەكسىز جارقىن ءومىر.
ارينە, دەپۋتاتتىققا ءبىلىم سالاسىنان كەشە عانا كەلگەندىكتەن, ەلباسى اۋزىنان وسى عىلىم-بىلىمگە قاتىستى ايتقان سوزدەر جانىما جاقىن. بالاباقشادان باستاپ, مەكتەپتەر, جوعارى وقۋ ورىندارىنىڭ بولاشاعى, ستۋدەنتتەر ستيپەندياسى, عىلىمنىڭ دامۋى, كاسىپتىك ءبىلىمدى قالاي بەرۋ كەرەك وسىلاردىڭ بارلىعىن جىلىكتەپ ايتىپ بەردى.
جولداۋ بارلىق قازاقستاندىقتار الدىنا ۇلكەن مىندەت قويىپ وتىر. ۇلكەن جۇمىستار باستالادى. وسى جەردە مەنىڭ ءبىرىنشى نازار اۋدارعىم كەلەتىنى, ول – بۇگىنگى جولداۋدىڭ حالىققا جەتۋى. ونىڭ بايىبىنا جەتىپ ءتۇسىنۋ, سەزىنىپ, تەرەڭىنە بويلاپ, بار بولمىسپەن قابىلداي وتىرىپ, العا قويعان ماقسات ءۇشىن جۇمىلۋ ماڭىزدى. سوندىقتان, ءبىرىنشى كەزەكتە حالىققا بارلىعىن ايتىپ ءتۇسىندىرۋ مىندەت.
ەلباسى 7 بەسجىلدىق تۋرالى ايتتى. ولاردىڭ ارقايسىسىندا اتقارىلاتىن جۇمىستاردى بەلگىلەپ بەردى. ال ولاردى سول جوسپارلانعان جولمەن ورىنداپ شىقساق, ماڭگىلىك ەل ءۇشىن قىزمەت جاساعان بولامىز.
ەرلان سىدىقوۆ,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى:
– ەلباسىنىڭ بيىلعى جولداۋىنىڭ ماڭىزى ەرەكشە. ءماسەلەن, ەكونوميكامىزدى دامىتۋدىڭ, ءال-اۋقاتىمىزدى ارتتىرۋدىڭ, 2050 جىلعا قاراي الەمدەگى 30 وزىق مەملەكەتتىڭ قاتارىنا قوسىلۋدىڭ باستى فاكتورى – عىلىم. پرەزيدەنت مىنە, وسىنى, ياعني عىلىمدى يندۋسترياعا جەتكىزۋ, عىلىمدى وندىرىسكە اپارۋ ماسەلەسىن باسا ايتتى. بۇل سالادا تەك عالىمداردىڭ عانا كۇشى ەمەس, ءوندىرىستىڭ, يندۋستريا وكىلدەرىنىڭ كۇش-قايراتى كەرەك. ولار دا عىلىمعا قاراي قادام جاساۋى ءتيىس. وسى ەكى ورتادا تىعىز بايلانىس بولۋ كەرەكتىگى ايتىلدى.
بۇل سالادا عىلىمي ورتالىقتاردا, بەلدى ۋنيۆەرسيتەتتەردە, ونىڭ ىشىندە ل.ن گۋميلەۆ اتىنداعى ەۋرازيا ۇلتتىق ۋنيۆەرسيتەتىندە دە بەلگىلى ءبىر دەڭگەيدە جۇمىستار جۇرگىزىلىپ جاتىر. ءبىزدىڭ يننوۆاتسيالىق پاركتەرىمىز, ءتۇرلى عىلىمي جوبالارىمىز عىلىمنىڭ قاتىسۋىن قاجەت ەتەتىن ۇلكەن-ۇلكەن ماسەلەلەردىڭ شەشىمىن تابۋعا باعىتتالىپ وتىر. مىنە, وسىعان ونەركاسىپ ورىندارى مەن يندۋستريا وكىلدەرى كەلىپ, وزدەرىنىڭ قاجەتىن الىپ جاتاتىن بولسا, ودان ەكى جاق تا ۇتادى. سەبەبى, عىلىم ارالاسپاعان جەردە ءوسۋ دە, ىلگەرىلەۋشىلىك تە جوق. ونى پرەزيدەنت جاقسىلاپ تۇرىپ, جىلىكتەپ شاعىپ ايتىپ بەردى. دەمەك, عىلىم ارالاساتىن بولسا, كەز كەلگەن ءوندىرىستىڭ شىعاراتىن ءونىمىنىڭ سانى دا ارتادى, ساپاسى دا ارتادى.
پرەزيدەنت اتاپ وتكەن تاعى ءبىر ماسەلە – ستيپەنديانىڭ ءوسۋى. ياعني, 2016 جىلدان باستاپ, ستيپەنديا كوتەرىلۋى كەرەك. ول ءۇردىس ودان ءارى جالعاسىن تابا بەرەتىن بولادى. بۇل ستۋدەنت قاۋىمعا, قازاقستاننىڭ بولاشاعىنا, ينتەللەكتۋالدى بولاشاعىنا قۇيىلعان ينۆەستيتسيا, ۇلكەن قولداۋ دەپ ءتۇسىنۋ كەرەك.
نۇرتاي سابيليانوۆ,
پارلامەنت ءماجىلىسىنىڭ دەپۋتاتى:
– پرەزيدەنتىمىزدىڭ ءار جولداۋى حالىق ءۇشىن دە, مەملەكەت ءۇشىن دە وتە ماڭىزدى. ويتكەنى, وسى جولداۋلار ارقىلى ءبىز ەلىمىزدىڭ الەۋمەتتىك-ەكونوميكالىق جاعدايىن جاقسارتۋعا ءمۇمكىندىك الامىز. بۇگىنگى جولداۋدا كورسەتىلگەن اۋىل شارۋاشىلىعىن دامىتۋ, فەرمەرلەرگە كومەكتەسۋ, ولارعا ءتيىستى قولايلى جاعدايلار جاساۋ اۋىلدارداعى, ەلدى مەكەندەردەگى كاسىپكەرلىكپەن اينالىسامىن دەگەندەرگە ۇلكەن قولداۋ بولادى دەپ ويلايمىن.
ەلباسىمىز, سونداي-اق شاعىن جانە ورتا بيزنەستى دامىتۋ جونىندە وتە جاقسى باستاما كوتەردى, ۇسىنىستار ايتتى. بۇل – ءار ادام ەڭبەكتەنۋى ءۇشىن, كاسىپكەرلىكپەن اينالىسۋى ءۇشىن ولارعا قولايلى جاعداي جاساۋ قاجەت دەگەن ءسوز. ەگەر ءار ادام ەڭبەگىنە قاراي, كاسىبىنە قاراي ەڭبەكاقىسىن الىپ وتىراتىن بولسا, بۇل دا قوعامنىڭ دامۋى دەپ ويلايمىن. ەڭ باستىسى, اۋىلداعى شارۋا قوجالىقتارىنا, كاسىپكەرلەرگە جەڭىلدەتىلگەن نەسيە ماسەلەسى شەشىلگەن جاعدايدا, ەلىمىزدە شاعىن جانە ورتا بيزنەس قاناتىن كەڭ جاياتىن بولادى.
قازىرگى كەزدە نەسيە بەرەتىن دەلدالدار كوبەيىپ كەتتى. ەلباسى نەسيەنى دەلدالدار ارقىلى ەمەس, تىكەلەي الۋ ماسەلەسىن شەشۋ قاجەتتىگىن ايتتى. بۇل وتە دۇرىس. سەبەبى, دەلدالدار ارقىلى العان نەسيەنىڭ جىلدىق ۇستەمەسى بۇگىندە 17-20 پايىزعا دەيىن جەتىپ وتىر. ول 6-7 پايىزدان ارتپاۋى ءتيىس.
گۇلجان قاراقۇسوۆا,
ءماجىلىس دەپۋتاتى, قارجى جانە بيۋدجەت كوميتەتىنىڭ ءتورايىمى:
– قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ قازاقستان حالقىنا ارناعان بيىلعى جولداۋىنداعى مىندەتتەردى ءبىر-بىرىنەن اجىراتىپ الىپ قاراۋعا بولمايدى. ويتكەنى, العا قويىلعان مەجەلەر ءبىر-بىرىمەن تىعىز بايلانىستى. ەڭ باستىسى, وندا بولاشاقتى باعدارلاعان ناقتى ماقساتتار كورىنىس تاپقان.
ارينە, مۇنىڭ بارلىعى جاستاردىڭ بولاشاعى ءۇشىن جاسالىپ وتىرعانى تۇسىنىكتى. ءبىر جاعىنان قاراعاندا, بارلىعى دا قولدا قازىر بولا قالۋى ءتيىس سياقتى, بىراق ەكىنشى جاعىنان قايدا بارا جاتقانىڭدى بىلمەي, ءبىر كۇندىكپەن ءومىر سۇرۋگە بولمايدى. الىس قاشىقتىققا جەتۋ ءۇشىن دە الدىمەن كۇشىمىزدى سىناپ, قاي جەرگە دەيىن جەتەتىن مۇمكىندىگىمىز بارلىعىن ءبىلىپ الۋىمىز كەرەك.
وسى تۇرعىدان كەلگەندە, نۇرسۇلتان ءابىش ۇلى مەملەكەتىمىزدى دامىتۋ ءۇشىن نە ىستەۋ قاجەتتىگىن ايقىنداپ بەرىپ وتىر. تاۋەلسىزدىگىمىزدى ساقتاپ, وزىپ كەتكەن ەلدەردىڭ ارتىنان شاڭ قاۋىپ قالماۋىمىز ءۇشىن سولاردىڭ قاتەلىكتەرىنەن ءتيىستى قورىتىندى شىعارا وتىرىپ, دامۋ جولىنا ءتۇسۋىمىز قاجەتتىگىنە ەرەكشە ەكپىن بەرىلدى. ءاربىر جاس دەموكراتيالىق دامىعان ەلدە ءومىر سۇرۋگە قۇشتار بولسا, سول ورتانى قازاقستاندا ورناتۋعا ءاربىر جاستىڭ مۇمكىندىكتەرى بولۋى ءتيىس.
وڭالباي اياشەۆ,
وڭتۇستىك قازاقستان مەملەكەتتىك پەداگوگيكالىق ينستيتۋتىنىڭ رەكتورى, وبلىستىق ءماسليحات دەپۋتاتى:
– مەملەكەت باسشىسى ن.ءا.نازارباەۆتىڭ بيىلعى جولداۋى «قازاقستان-2050» ستراتەگياسىنان تۋىندايتىن مىندەتتەردى جان-جاقتى ايقىنداپ بەرگەن قۇجات بولدى. اسىرەسە, قوعامدى الاڭداتىپ كەلگەن قازاق ءتىلىنىڭ ماسەلەسىنە ەكپىن بەرۋى وتە ورىندى بولدى دەپ ويلايمىن. ويتكەنى, قازىرگى كەزدە مەملەكەتتىك تىلگە دەگەن سۇرانىس جىل ساناپ ارتىپ كەلەدى. مەنىڭ ويىمشا, مەملەكەتتىك ءتىلدى وقىتاتىن 57 ورتالىق ازدىق ەتۋى دە مۇمكىن. سوندىقتان دا وزدىگىنەن قازاق ءتىلىن مەڭگەرىپ العىسى كەلەتىندەر ءۇشىن دە ادىستەمەلىك قۇرالداردى شىعارا بەرۋىمىز قاجەت. «ەندى ەشكىم وزگەرتە المايتىن ءبىر اقيقات بار! انا ءتىلىمىز ماڭگىلىك ەلىمىزبەن بىرگە ماڭگىلىك ءتىل بولدى. بۇل ماسەلەنى داۋدىڭ تاقىرىبى ەمەس, ۇلتتىڭ ۇيىتقىسى ەتە بىلگەنىمىز ءجون», دەگەن ەلباسى شىنىندا دا سوزدەن ىسكە كوشەتىن كەز كەلگەندىگىن مەڭزەدى. ەستەرىڭىزدە بولسا, پرەزيدەنت بۇعان دەيىنگى سوزدەرىندە «قازاق قازاقپەن قازاقشا سويلەسسىن!», دەپ كەلسە, قازىر ءتىلدىڭ بولاشاعى جارقىن بولارىن نىق سەنىممەن ايتىپ وتىر.
عاني قاسىموۆ,
«قازاقستان پاتريوتتارى
پارتياسىنىڭ» جەتەكشىسى:
– مەنى جولداۋدىڭ اسىرەسە, ەل تۇرعىندارىنىڭ الەۋمەتتىك احۋالى جاقسارۋىنا قاتىستى اقپارات قاتتى تولقىتتى ءارى قۋانتتى دا. ەڭ باستىسى, ارينە, جالاقى دەڭگەيىنىڭ ءوسىمى. مەملەكەت باسشىسى ەكى قولعا جۇمىس تابا الماي جۇرگەندەرگە نازار اۋدارۋدى ۇسىندى. اسىرەسە, مۇگەدەكتەر, جاردەماقىعا ءومىر ءسۇرىپ كەلە جاتقان جانە وزگە دە جاندارعا جۇمىس بەرۋ قاجەتتىگىنە توقتالدى. ال ولاردىڭ سانى 600 مىڭعا جەتىپ وتىر. بۇل وتە ورىندى ۇسىنىس دەپ سانايمىن. سوندا عانا قورعانسىز قالعان جاندارعا لايىقتى جاعداي جاساي الامىز. ءبىراز جىلداردان بەرى جالاقى دەڭگەيى وسپەي كەلەدى, تيىسىنشە, ينفلياتسيا قارقىن الىپ بارادى. ەندىگى جەردە جالاقىنى ءوسىرۋ ينفلياتسيانىڭ ورنىن جاۋىپ قانا قويماي, ازاماتتاردىڭ ەركىن تىنىس الۋىنا مۇمكىندىك بەرمەك. سونداي-اق, عىلىم مەن يننوۆاتسيا سالاسىنا ءمان بەرىلدى. بۇل سالاعا ءبىرازدان بەرى ونشا ءجىتى كوڭىل بولە الماي كەلە جاتىرمىز. نەگىزىنەن, عىلىم ءوندىرىسىمىزدى وركەندەتىپ, وزىندىك قۇنى تومەن تاۋارلاردى وندىرۋگە وڭ ىقپال بەرەتىن بولادى دەپ ويلايمىن.
مايرا ايسينا,
پارلامەنت ءماجىلىسىنىڭ دەپۋتاتى:
– جولداۋدا ايتىلعان ماسەلەلەردىڭ بارلىعى كوڭىلىمىزدەن شىقتى. ماجىلىستە الەۋمەتتىك-مادەني دامۋ كوميتەتىنىڭ مۇشەسى بولعاندىقتان, وتىرىستاردا وسى ماسەلەلەردىڭ كوپشىلىگىن تالقىلاعان ەدىك. مىسالى, كوميتەتتىڭ وتىرىستارىندا مۇعالىمدەر مەن دارىگەرلەردىڭ, مۇمكىندىگى شەكتەۋلى ادامدارمەن, زەينەتكەرلەرمەن جۇمىس ىستەپ جۇرگەندەردىڭ جالاقىسىن كوتەرۋ ماسەلەسىن ايتىپ جۇردىك. سول ماسەلەلەر بىردەن شەشىلە قويادى دەپ مۇلدە ويلاماعان ەدىم. مىنە, بۇل ەلباسىمىزدىڭ حالىق مۇددەسىن ءاردايىم نازارىندا ۇستايتىندىعىن كورسەتىپ وتىر.
قازىر پارلامەنت «جاستار ساياساتى تۋرالى» زاڭ جوباسىن قاراپ جاتىر. دەپۋتاتتار ەل ايماقتارىنا شىعىپ, حالىقپەن كەزدەسۋلەرىندە, سايلاۋشىلار جاستارعا قولداۋ-كومەك كورسەتۋ جايىن ءجيى ايتاتىن. ەندى, مىنە, وعان دا قول جەتكىزىلۋدە. 2016 جىلدان باستاپ ستۋدەنتتەردىڭ ستيپەنديالارى 25 پايىزعا وسىرىلەتىن بولدى. جولداۋدا, سونداي-اق, مەملەكەتتىك ورگاندارداعى قاعازباستىلىقتى جويۋ ماسەلەسى دە ايتىلدى. وتە دۇرىس ماسەلە. ويتكەنى, مەملەكەتتىك ورگانداردىڭ نەندەي جۇمىس ىستەپ جاتقاندارى بىلايعى جۇرتقا جەتپەيدى. كوپشىلىك ودان سىرت قالادى.
بولاتبەك ءابدىراسىلوۆ,
پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى:
– ەلباسىنىڭ قازاقستان حالقىنا ارناعان جولداۋىن ءبىرازدان بەرى كۇتىپ جۇردىك. ەلىمىز ءوزىنىڭ دامۋى جولىندا جاڭا دەڭگەيگە كوتەرىلدى. ارينە, ءبىز ونى «قازاقستان-2050» ستراتەگياسىنىڭ قابىلدانۋىنان كورە الامىز. جولداۋدا ستراتەگيانىڭ قالاي جۇزەگە اسىرىلارىنىڭ باعىتتارى مەن تەتىكتەرىنە بايلانىستى بىرقاتار ماسەلەلەر كوتەرىلدى. پرەزيدەنت جانىنداعى مەملەكەتتىك باسقارۋ اكادەمياسىنىڭ ۇجىمى دا جولداۋدا كورىنىس تاپقان مىندەتتەردى جۇزەگە اسىرۋعا وزدەرىنىڭ ينتەللەكتۋالدىق الەۋەتىن باعىتتايتىن بولادى.
دانا ءابۋتالىپوۆا,
«نۇر وتان» پارتياسى ستراتەگيا جانە مونيتورينگ دەپارتامەنتىنىڭ ديرەكتورى:
– ەلباسىنىڭ قازاقستان حالقىنا ارناعان بيىلعى جولداۋى ەل تۇرعىندارىنىڭ الەۋمەتتىك-تۇرمىستىق جاعدايىن ايتارلىقتاي ارتتىرۋعا ارنالعان ماڭىزدى قۇجات بولىپ تابىلادى. مەملەكەتتىك ورگاندار مەن «نۇر وتان» پارتياسى ەلباسىنىڭ العا قويعان مىندەتتەرى مەن يدەيالارىن ىلگەرى جىلجىتۋدا بىرلەسە جۇمىس اتقارىپ كەلەدى. پرەزيدەنتتىڭ سوزىنەن ەستىگەندەرىڭىزدەي, قازىرگى كەزدە ەل تۇرعىندارىنىڭ 97 پايىزى الەۋمەتتىك احۋالدىڭ تۇراقتىلىعىن جانە ونىڭ جىل وتكەن سايىن جاقسارا تۇسكەندىگىن اتاپ وتكەن. بۇل ماسەلەدە ەل تۇرعىندارىنىڭ كوپتەگەن تۇيتكىلدى ماسەلەلەرىن شەشۋدە بەلسەندى ارەكەت ەتىپ كەلە جاتقان ءبىزدىڭ پارتيامىزدىڭ دا ۇلەسى زور. قابىلداۋ بولمەلەرى ارقىلى نەمەسە كەزدەسۋلەردە قاراپايىم تۇرعىنداردىڭ مۇڭ-مۇقتاجىن جان-جاقتى قاراپ, ءتيىستى مەملەكەتتىك ورگاندارعا ۇسىنىستار ازىرلەۋمەن قاتار, ولاردىڭ ناقتى شەشىمىنىڭ بولۋىن دا ءجىتى قاداعالاپ كەلەمىز. وسى تۇرعىدان كەلگەندە «قازاقستان-2050» ستراتەگياسى بۇل ەلدىگىمىزدىڭ ونجىلدىقتارعا باعىتىن ايقىنداپ بەرگەن ماڭىزدى قۇجات بولۋىمەن قاتار, جاقىن جىلدارعا نە ىستەۋ كەرەك دەگەن مىندەتتەردى موينىمىزعا جۇكتەپ وتىر. ءبىز بۇل ۇدەدەن شىعارىمىزعا سەنىمدىمىز.
تيمۋر بايمۇحانوۆ,
باسەكەلەستىكتى قورعاۋ اگەنتتىگى توراعاسىنىڭ ورىنباسارى:
– ۇكىمەتكە اعىمداعى جىلدىڭ سوڭىندا 2030 جىلعا دەيىنگى كەزەڭدە استانا مەن الماتى قالالارىنىڭ اگلومەراتسياسىن قالىپتاستىرۋ ستراتەگياسىن ازىرلەۋدى تاپسىرعان مەملەكەت باسشىسى ونىڭ ماڭىزدى ەكەنىنە ەرەكشە توقتالدى. ەگەر استانانىڭ ءوزىن الار بولساق, قازىرگى تاڭدا اگەنتتىك مەملەكەتتىك ورگاندارمەن بىرلەسە وتىرىپ ەلورداداعى تۇرعىن ءۇي باعالارىن بارىنشا وڭتايلاندىرۋ جونىندە كەشەندى جوسپار ازىرلەپ جاتقاندىعىنان حاباردار ەتكىم كەلەدى. بۇل جەردە تۇرعىن ءۇي باعاسىنىڭ وسىمىنە اسەر ەتەتىن بىرقاتار تۇيتكىلدى ماسەلەلەر بارشىلىق. اتاپ ايتقاندا, سۇرانىس پەن ۇسىنىس اراسىنداعى تەڭگەرىمسىزدىك, جاڭا تۇرعىن ۇيلەردىڭ قولدانىسقا بەرىلۋىن كەشەۋىلدەتۋ, قۇرىلىستى جۇرگىزۋشى كومپانيا كىرىسى دەڭگەيىنىڭ رەتتەلمەۋى, قۇرىلىسشىلارعا باعانى بارىنشا جوعارىلاتۋعا مۇمكىندىك بەرۋ جانە جەر تەلىمدەرى مەن قۇرىلىستى جۇرگىزۋگە شەشىم الۋدىڭ اشىق بولماۋى, رىنوكقا جاڭا قۇرىلىس كومپانيالارىنىڭ كىرۋىنە كەدەرگى قويىلۋى, ت.ب. بۇدان باسقا جەر تەلىمدەرىن يگەرمەۋ, بانك نەسيەلەرىنىڭ تارتىمسىزدىعى, ەكىنشى رەت قولدانىستا بولعان ۇيلەرگە قاتىستى الىپساتارلىق ارەكەتتەر سياقتى كوپتەگەن كەلەڭسىزدىكتەر كەزدەسەدى. ستاتيستيكا اگەنتتىگىنىڭ مالىمەتتەرىنە قاراعاندا, 2001 جىلدان باستاپ 2013 جىلدىڭ جەلتوقسانى ارالىعىندا جاڭا تۇرعىن ۇيگە دەگەن باعا 600 پايىزعا وسكەن. وسىنىڭ بارلىعىن ەسكەرە كەلگەندە, اگەنتتىككە ارتىلعان مىندەتتەردىڭ قانشالىقتى وڭاي ەمەستىگىن سەزىنۋگە بولادى.
سۋرەتتەردى تۇسىرگەن ەرلان وماروۆ.