قاراعاندىعا سەرىكتەس قالا شاحتينسكىنىڭ جاستارى اينالاداعى سۇرىقسىز سۇر ءتۇستى وزگەرتكىسى كەلەدى, شاھاردىڭ شىرايلانا تۇسكەنىن قالايدى. تاياۋدا ولار قالاداعى ترانسفورماتورلىق قوسالقى ستانسانىڭ قابىرعاسىنا گراففيتي سۋرەتىن سالدى.
شاحتينسك قالالىق جاستار رەسۋرستىق ورتالىعىنىڭ جەتەكشىسى جاسۇلان حاميتوۆ بۇل يگى ءىستىڭ تۋعان قالانىڭ 60 جىلدىق مەرەيتويىنا جاسالعان تارتۋ ەكەنىن ايتادى.
– بيىل ءبىزدىڭ قالامىزدا ءۇش كوپقاباتتى ءۇيدىڭ قابىرعاسىنا مۋرال سالىندى. وسىنى كورگەننەن كەيىن ءبىز سۋرەت اۆتورلارىمەن بايلانىسقا شىعىپ, باستى كوشەمىز اباي قۇنانباەۆ داڭعىلىنداعى ترانسفورماتور بۋدكاسىن بەزەندىرىپ بەرۋلەرىن وتىندىك. جاستار ءبىزدىڭ يدەيامىزدى قولداپ, قوسالقى ستانسانىڭ قابىرعالارىنا سۋرەتتى تەگىن سالىپ بەردى, – دەيدى ول.
قالانىڭ شىرايلانا تۇسۋىنە ۇلەسىن قوسقان سۋرەتشىلەرگە جاستار ورتالىعى اۋماقتى رەتكە كەلتىرىپ, قاجەتتى ماتەريالدارمەن قامتاماسىز ەتىپ, قولدان كەلگەن كومەكتىڭ ءبارىن كورسەتكەن. جاسۇلان حاميتوۆ بۇل يدەيانى جەرگىلىكتى تالانتتى جاستار قولداپ, الداعى ۋاقىتتا شاحتينسك قالاسىنىڭ بارلىق ترانسفورماتورلىق قوسالقى ستانساسى ادەمى كەيىپكە ەنەدى دەپ ۇمىتتەنەدى.
سونىمەن قاتار ول قالاداعى تالانتتى جاستاردى شاحتينسك شاھارىن شىرايلاندىرۋعا بارىنشا اتسالىسۋعا شاقىردى. ء«بىز سىزدەردى جانە سىزدەردىڭ يدەيالارىڭىزدى تالقىلاۋعا, ولاردى قاراستىرۋعا جانە جان-جاقتى قولداۋعا دايىنبىز», – دەيدى كەنشىلەردىڭ شاعىن قالاسىنداعى جاستاردىڭ جەتەكشىسى.
قاراعاندى وبلىسى,
شاحتينسك قالاسى