قاسىم-جومارت توقاەۆ باس پروكۋروردىڭ ەلىمىزدەگى زاڭ نورمالارىنىڭ ساقتالۋى جونىندەگى ەسەبىن تىڭدادى, دەپ جازادى Egemen.kz اقورداعا سىلتەمە جاساپ.
پرەزيدەنتكە ەلدەگى قىلمىستىق احۋال, سونىڭ ىشىندە, الاياقتىق, بالالارعا قاتىستى زورلىق-زومبىلىق, زاڭسىز ەسىرتكى اينالىمى جانە باسقا دا قاۋىپتى قۇقىق بۇزۋشىلىقتارعا قارسى كۇرەستى ۇيلەستىرۋ شارالارى تۋرالى اقپارات بەرىلدى.
عيزات نۇرداۋلەتوۆ قىلمىستىق ءىس جۇرگىزۋدىڭ ءۇش بۋىندى مودەلىنە ءوتۋدىڭ العاشقى كەزەڭىنىڭ ىسكە اسىرىلۋ بارىسى جانە 2022 جىلدان باستاپ ەنگىزىلە باستايتىن ەكىنشى كەزەڭگە دايىندىق جونىندە ەسەپ بەردى.
مەملەكەت باسشىسىنا ەل ىشىندە رەزونانس تۋدىرعان قىلمىستىق ىستەردى تەرگەۋ ناتيجەلەرى جانە قوعامدىق مۇددەلەردى قورعاۋ جونىندەگى جۇمىستاردىڭ قورىتىندىسى تۋرالى باياندالدى. باس پروكۋروردىڭ مالىمەتىنە سايكەس, پروكۋراتۋرا ورگاندارىنىڭ قابىلداعان شارالارىنىڭ ناتيجەسىندە جىل باسىنان بەرى 5 مىڭعا جۋىق ازاماتتىڭ, 92 مىڭ كاسىپكەردىڭ قۇقىقتارى قورعالىپ, بيۋدجەتكە 17 ميلليارد تەڭگە قايتارىلعان. 11 مىڭنان استام تۇلعا ءتۇرلى جاۋاپكەرشىلىككە تارتىلعان.
سونداي-اق قىلمىستىق-قۇقىق سالاسىنداعى حالىقارالىق ىنتىماقتاستىق ماسەلەلەرى تالقىلاندى. اتاپ ايتقاندا, باس پروكۋرور وزگە ەلدەرمەن جاسالاتىن كەلىسىمدەر مەن الدا بولاتىن كوپجاقتى ءىس-شارالارعا قاتىسۋ جوسپارلارىمەن ءبولىستى.
قاسىم-جومارت توقاەۆ قوعامدىق ءومىردىڭ بارلىق سالاسىندا زاڭ ۇستەمدىگىن قامتاماسىز ەتۋدىڭ ماڭىزدىلىعىن اتاپ ءوتىپ, عيزات نۇرداۋلەتوۆكە بىرقاتار تاپسىرما بەردى.