قاراعاندى وبلىسىندا كارانتين كەزىندە مەيرامحانادا توي ۇيىمداستىرعان شەنەۋنىك جۇمىستان بوساتىلدى. بۇل تۋرالى ءوڭىر باسشىسى جەڭىس قاسىمبەك ونلاين رەجيمىندە وتكەن اپپاراتتىق كەڭەستە ايتتى, دەپ حابارلايدى Egemen.kz.
«بۇگىنگى كۇننەن باستاپ جەر قاتىناستارى باسقارماسىنىڭ باسشىسى قالەل مۇقاتاي ۇلى ماقسۇتوۆ كارانتيندى ورەسكەل بۇزۋ, ياعني پاندەميا كەزىندە توي ۇيىمداستىرۋىنا بايلانىستى قىزمەتىنەن بوساتىلدى. تاعى دا ەسكەرتەمىن, مۇنداي زاڭسىزدىقتار ءۇشىن جازا وتە قاتال بولادى. مۇندا مەملەكەتتىك قىزمەتشىنىڭ قىزمەتتىك ەتيكاسىنىڭ بارلىق نورمالارى بۇزىلعان», دەدى وبلىس اكىمى.
جەڭىس قاسىمبەك سونداي-اق مونيتورينگتىك توپ مۇشەلەرىن پرينتسيپتىلىككە شاقىردى.
«سىزدەر بىرەۋدىڭ مۇددەسىنە جۇمىس ىستەۋ ءۇشىن ەمەس, ازاماتتاردىڭ دەنساۋلىعىن قورعاۋ ءۇشىن قۇرىلعان توپسىزدار! وسىنداي ءىس-شارالاردى توقتاتىپ, جاريا ەتىڭىزدەر. سىزدەر وزدەرىڭىز باقىلاۋ كامەرالارىنا قاراي وتىرىپ جۇمىس ىستەيتىندەرىڭىزدى ايتقان بولاتىنسىزدار. سوندىقتان مۇقيات قاراڭىزدار. سالىنعان تىيىم بارلىعىنا بىردەي», دەپ اتاپ ءوتتى وبلىس اكىمى.
اتالعان وقيعا 7 تامىزدا ورىن العان. توي بولىپ جاتقان مەيرامحاناعا قاراعاندى قالاسىنىڭ پوليتسيا, سانەپيدباقىلاۋ جانە اكىمدىك قىزمەتكەرلەرىنەن تۇراتىن ءموبيلدى توپ شىقتى. مەيرامحانانىڭ وزىندە 500-گە جۋىق ادام بولعاندىقتان, اۋماقتى قورشاۋ ءۇشىن پوليتسيانىڭ قوسىمشا ناريادى شاقىرىلدى.