قازاقستاندىق وقۋشىلار حيميا پانىنەن وتكەن حالىقارالىق وليمپيادادا (IChO-2021) ءتورت مەدال جەڭىپ الدى. ۇلتتىق قۇرامانىڭ قورجىنىندا ءۇش كۇمىس جانە ءبىر قولا بار.
وليمپيادا جاپونيانىڭ وساكا قالاسىندا 24 شىلدە مەن 2 تامىز ارالىعىندا ونلاين فورماتتا ءوتتى. زياتكەرلىك جارىسقا الەمنىڭ 79 ەلىنەن 312 وقۋشى قاتىستى. قازاقستاننىڭ اتىنان نۇر-سۇلتان, الماتى, قاراعاندى جانە پاۆلودار قالاسىنان ءتورت وقۋشى, ياعني رەسپۋبليكالىق پاندىك وليمپيادانىڭ جەڭىمپازدارى قاتىستى. ۇلتتىق قۇرامانى جارىسقا تاجىريبەلى پەداگوگتەر مەن جاتتىقتىرۋشىلار دايىندادى.
تەوريالىق تاپسىرمالاردى جوعارى دەڭگەيدە ورىنداعان قازاقستاندىق قاتىسۋشىلاردىڭ بارلىعى جۇلدەگەر اتاندى. حايدار قايىربەك, سانجار بيسەنالي, ماديار قاسىمالي كۇمىس, ايگەرىم تۇرىسپەكوۆا قولا مەدالعا يە بولدى.
ۇلتتىق قۇراما مۇشەلەرى وقۋ-جاتتىعۋ جيىندارى كەزىندە ساپالى جۇمىس جۇرگىزگەن مۇعالىمدەر مەن جاتتىقتىرۋشىلارعا العىس ءبىلدىردى.
«بارلىق قاتىسۋشى حيميا پانىنەن ەڭ ماڭىزدى وليمپياداعا مۇقيات دايىندالدى. ءبىزدىڭ كۇش-جىگەرىمىزدىڭ اقتالعانىنا قۋانىشىمىز شەكسىز. جوعارى دەڭگەيدە ءوتىپ جاتقان اۋقىمدى جارىس بولعاندىقتان, تاپسىرمالار دا قيىن بولدى. بىراق ءبىزدىڭ قۇراما وعان دايىن ەدى. ءۇش كۇمىس جانە ءبىر قولا مەدال جەڭىپ الدىق. ءبىزدى ءاردايىم قولدايتىن جاتتىقتىرۋشىلارىمىزعا, مۇعالىمدەرىمىز بەن اتا-انالارىمىزعا العىسىمىز شەكسىز», دەدى كۇمىس مەدال يەگەرى حايدار قايىربەك.
ءبىلىم جانە عىلىم ءمينيسترى اسحات ايماعامبەتوۆ ءوزىنىڭ Facebook پاراقشاسىندا قاتىسۋشىلاردى جەڭىستەرىمەن قۇتتىقتادى.
«وليمپياداعا قاتىسۋشىلاردى جوعارى جەتىستىكتەرمەن قۇتتىقتايمىن! سىزدەر دايىندىقتارىڭىزدىڭ مىقتى ەكەنىن كورسەتتىڭىزدەر. ءار مەدال – سىزدەردىڭ قاجىرلى ەڭبەكتەرىڭىز بەن جەڭىسكە دەگەن ۇمتىلىستارىڭىزدىڭ ناتيجەسى. سىزدەرگە جاڭا شىڭداردى باعىندىرۋدا ساتتىلىك تىلەيمىن! وليمپيادا جۇلدەگەرلەرىنىڭ ۇستازدارى مەن جاتتىقتىرۋشىلارىنا بەرگەن بىلىمدەرى ءۇشىن, ال اتا-انالارىنا قولداۋ كورسەتكەنى ءۇشىن العىس ايتامىن. ءوز كەزەگىندە, ءبىلىم جانە عىلىم مينيسترلىگى وقۋشىلارىمىزدىڭ زياتكەرلىك جارىستاردا كوشباسشىلىق ورىنعا يە بولۋى ءۇشىن جاعداي جاساۋدى جالعاستىرادى», دەپ جازدى مينيستر.
اسحات ايماعامبەتوۆ مەملەكەت باسشىسى قاسىم-جومارت توقاەۆتىڭ حالىقارالىق وليمپيادالاردىڭ جەڭىمپازدارى مەن جۇلدەگەرلەرىن قولداۋ بويىنشا شارالار ازىرلەۋدى تاپسىرعانىن ايتتى. وسى تاپسىرمانى ىسكە اسىرۋ اياسىندا مينيسترلىك بىرقاتار زاڭنامالىق وزگەرىس دايىندادى.