ءبىلىم جانە عىلىم مينيسترلىگىنىڭ باستاماسىمەن جاسالعان ۇكىمەتارالىق كەلىسىمدەر شەڭبەرىندە قازاقستاندىقتار تەگىن وقي الاتىن ەلدەر سانى ارتتى. ەندى قازاقستاندىقتارعا سلوۆاكيا, ازەربايجان جانە ۆەتنام ەلدەرى دە گرانتتار بولەدى.
وسىلايشا, 2021 جىلى ءبىلىم بەرۋ سالاسىنداعى كەلىسىمدەر اياسىندا مەملەكەتتەر سانى 10-عا دەيىن ارتتى. 2019 جىلى مۇنداي تىزىمدە 7 ەل بولعان ەدى. ءبىزدىڭ تالاپكەرگە گرانت ۇسىناتىن مەملەكەتتەر قاتارىندا ماجارستان, پولشا, قحر, ۋكراينا, بەلارۋس, قىرعىزستان جانە تاجىكستان بار.
وتكەن ەكى جىلدا مىڭعا جۋىق قازاقستاندىق وسى ەلدەردىڭ جەتەكشى جوعارى وقۋ ورىندارىندا تەگىن ءبىلىم الدى. بيىل قازاقستاندىقتارعا 500-گە جۋىق گرانت ءبولىندى. ۇكىمەتارالىق گرانتتار اياسىندا قازاقستاندىقتار باكالاۆريات, ماگيستراتۋرا, دوكتورانتۋرا, رەزيدەنتۋرا باعدارلامالارى بويىنشا وقي الادى.
«جوعارى ءبىلىم بەرۋ سالاسىنداعى حالىقارالىق ىنتىماقتاستىق كادرلىق الەۋەتكە وڭ اسەرىن تيگىزدى. وتاندىق جوعارى وقۋ ورىندارىندا ءبىلىم بەرۋ پروتسەسىنىڭ ساپاسىن كۇشەيتۋمەن قاتار, ازاماتتارىمىزدىڭ الەمنىڭ جەتەكشى جوعارى وقۋ ورىندارىندا ءبىلىم الۋ مۇمكىندىگىنە يە بولۋى ءۇشىن جاعداي جاساۋ قاجەت. ءبىز «بولاشاق» باعدارلاماسى بويىنشا عانا ەمەس, ۇكىمەتارالىق كەلىسىمدەر شەڭبەرىندە دە قازاقستاندىقتاردى تەگىن وقىتۋ ءۇشىن ەلدەر گەوگرافياسىن كەڭەيتىپ جاتىرمىز. قازاقستانعا ورالعاننان كەيىن ماماندار العان بىلىمدەرىن وزدەرى ەڭبەك ەتەتىن سالانى دامىتۋ ءۇشىن قولدانادى دەپ ۇمىتتەنەمىز», دەدى ءبىلىم جانە عىلىم ۆيتسە-ءمينيسترى قۋانىش ەرعاليەۆ.
2019 جىلمەن سالىستىرعاندا كونكۋرستىق ىرىكتەۋگە قاتىسۋعا نيەت بىلدىرۋشىلەر سانى 15%-عا ءوستى. ۇمىتكەرلەردى ىرىكتەۋدى دەپۋتاتتار, ساراپشىلار, ينجەنەرلىك-تەحنيكالىق, مەديتسينالىق, گۋمانيتارلىق جانە جاراتىلىستانۋ عىلىمدارىنىڭ عالىم-دوكتورلارىنان تۇراتىن تاۋەلسىز كوميسسيا جۇرگىزەدى.
ۇكىمەتارالىق كەلىسىمدەردىڭ وپەراتورى – ءبىلىم جانە عىلىم مينيسترلىگىنىڭ حالىقارالىق باعدارلامالار ورتالىعى.
بۇل رەتتە وسىعان دەيىن قازاقستاننىڭ ءبىلىم جانە عىلىم ءمينيسترى مەن ەۋروپالىق وداقتىڭ قازاقستانداعى ەلشىسىنىڭ قاتىسۋىمەن وتكەن فورۋمدا تاراپتار ءبىلىم بەرۋ سالاسىنداعى بىرلەسكەن ىنتىماقتاستىق ماسەلەلەرىن تالقىلاعانىن ايتا كەتكەن ءجون.