الماتى وبلىسىنداعى جان-جانۋارلار الەمى جانە وزەن-كولدەر مەن ەرەكشە قورعالۋى ءتيىس وسىمدىكتەردى قورىقشىلاردىڭ وزدەرى قۇرتىپتى. وڭىردەگى تابيعات قورعاۋ مەكەمەلەرىنىڭ قىزمەتىنە جاپپاي تەكسەرۋ جۇرگىزگەن وبلىستىق پروكۋراتۋرا قىزمەتكەرلەرى وسىنداي قورىتىندى شىعاردى. بۇل تۋرالى «حابار» تەلەارناسى حابارلادى.
پروكۋرورلار جوعارىدا اتالعان قۇرىلىمنىڭ باسشىسىنان باستاپ, ءتىپتى قاراپايىم قورىقشىعا دەيىن تازالاۋ جۇمىسىن جۇرگىزۋدى ۇسىنىپ وتىر. ويتكەنى, وڭىردەگى «التىن ەمەل», «ىلە الاتاۋى» سياقتى ۇلتتىق قورىقتار مەن ورمان شارۋاشىلىعىنداعى قىزىل كىتاپقا ەنگەن اڭداردى قورىقشىلار براكونەرلەرمەن بىرىلەسىپ اۋلايتىنى ءمالىم بولىپ وتىر. ناقتى ايتقاندا, پروكۋراتۋرا قىزمەتكەرلەرى ءبىر كۇندىك رەيد كەزىندە تالاي بىلىقتىڭ بەتىن اشقان. ماسەلەن, ەڭبەكشىقازاق اۋدانىندا زاڭسىز اڭ اۋلاپ جۇرگەن ءبىر ورمانشى ۇستالدى. الايدا, ول پروكۋراتۋرا قىزمەتكەرلەرىنە قارۋ كەزەنىپ, وق اتقان. اقىرى ول قولعا تۇسكەننەن كەيىن قاراقۇيرىقتى اتقانىن مويىندادى.
سونىمەن, تەك جان-جانۋار ەمەس, سەكسەۋىل مەن توراڭعىت سياقتى سيرەك كەزدەسەتىن وسىمدىكتەردىڭ وتالۋىنا ورمانشىلاردىڭ قاتىسى بار ەكەنى دالەلدەنىپ, 8 قىلمىستىق ءىس قوزعالعان. سونداي-اق 7 توننا بالىقتىڭ ەش رۇقساتسىز اۋلانعانى بەلگىلى بولدى. تابيعات پەن جان-جانۋارلار الەمىنە كەلگەن شىعىن بىرنەشە ءجۇز ميلليونداپ سانالادى.
«وبلىستىق تابيعات قورعاۋ مەكەمەلەرىنىڭ 2013 جىلدىڭ 11 ايىنداعى ەسەبىنە جۇگىنەتىن بولساق, ولار 126 اكىمشىلىك قۇقىق بۇزۋشىلىق دەرەكتەردى انىقتاپ, ءۇش قىلمىس اشكەرەلەگەن. دەمەك, 600-دەن استام قىزمەتكەردىڭ 1 ايدا جاسايتىن جۇمىسى تەك 11 قۇقىق بۇزۋشىلىق قاۋلىسىن تولتىرۋمەن شەكتەلەدى. وبلىستىق پروكۋراتۋرا ورگاندارىمەن جۇرگىزگەن ءبىر كۇندىك رەيدتىڭ ناتيجەسىندە 13 قىلمىستىق ءىس قوزعالىپ, 30 تۇلعا اكىمشىلىك جاۋاپكەرشىلىككە تارتىلدى. وسىدان زاڭسىز اڭشىلىققا قورىق قىزمەتكەرلەرىنىڭ قاتىسى بار ەكەنى ءوزىنىڭ دالەلىن تاۋىپ وتىر», - دەيدى وبلىستىق پروكۋراتۋرانىڭ اعا پروكۋرورى نۇربوسىن ماقاشەۆ.
باقىتبەك كەنەش ۇلى.
دەرەككوز: «حابار» تەلەارناسى.
فوتو: Uralinform. ru.