ارگەنتينانىڭ ەكى ستۋدەنتى سۋسىز جۇمىس ىستەيتىن كىر جۋعىش ماشينا ويلاپ شىعاردى. بۇل تۋرالى يتار-تاسس اگەنتتىگى حابارلادى.
كوردوۆا ۇلتتىق ۋنيۆەرسيتەتىنىڭ ستۋدەنتتەرى نيكولاس ارايا مەن نيكولاس ۆۋكسانوۆيك بۇل ونەرتابىستارىن ديپلومدىق جۇمىس رەتىندە تانىستىردى. ارايا مەن ۆۋكسانوۆيك ءوز جاڭالىقتارى ارقىلى قازىرگى كەزدە باستى پروبلەمالاردىڭ بىرىنە اينالعان تۇششى سۋدىڭ تاپشىلىعىمەن كۇرەسۋگە ءوز ۇلەستەرىن قوسپاقشى. وسى ماقساتتا ولار جاڭا كىر جۋعىش ماشينانى قۇراستىرۋعا كىرىسكەن ەكەن.
«نيمبۋس» اتاۋىن العان بۇل ماشينا مۇلدەم سۋ پايدالانبايدى. وعان تەك تابيعي كومىرقىشقىل گازى مەن پاتەنتتەلگەن ەكولوگيالىق تازا كىر جۋ قۇرالى قاجەت. سونىمەن قاتار, ول ەلەكتر قۋاتىن دا كادىمگى كىر جۋعىش ماشينادان گورى اناعۇرلىم از جۇمسايدى. جاڭا قۇرالدىڭ تاعى ءبىر ەرەكشەلىگى, ونىمەن جۋىلعان كيىمدى كەپتىرۋدىڭ دە, ۇتىكتەۋدىڭ دە قاجەتى جوق.
ونەرتابىستارى ءۇشىن ونەركاسىپتىك ديزاين سالاسىنداعى ەكى جاس مامان ەڭ جوعارى دەگەن باعاعا لايىق دەپ تانىلدى. ولار وزدەرىنىڭ جاڭا كىر جۋعىش ماشينالارىن پاتەنتتەپ تە قويعان ەكەن.
ايدار ورىسباەۆ.
دەرەككوز: Itar-tass.com
فوتو: Itar-tass.com