پارلامەنت ماجىلىسىندە وتكەن جيىندا ىشكى ىستەر ءمينيسترى قالمۇحانبەت قاسىموۆ شۋ دالاسىنداعى قاراسورا تۋرالى ماسەلە كوتەردى. بۇل تۋرالى «كتك» تەلەارناسى حابارلادى.
«شۋ القابىنىڭ پروبلەماسىن تەز ارادا شەشۋىمىز كەرەك. ارينە, 140 مىڭ گەكتار جەردى قورشاپ تاستاۋ مۇمكىن ەمەس. الايدا, ودان تارالاتىن ەسىرتكى بارلىق جەرگە كەتىپ جاتىر. مۇنى شەشۋدىڭ ەكى جولى بار: ءبىرى - القاپتىڭ كوزىن قۇرتۋ, ەكىنشىسى – ول جەردى شارۋاشىلىقتا پايدالانۋ», - دەدى جيىندا ىشكى ىستەر ءمينيسترى ق. قاسىموۆ.
شۋ دالاسىمەن كۇرەسە الماي وتىرعان مينيسترگە دەپۋتاتتار اقىل-كەڭەستەرىن اياعان جوق. ماسەلەن, پارلامەنت ءماجىلىسىنىڭ دەپۋتاتى داريعا نازارباەۆا القاپتى فارماتسەۆتيكالىق ۇيىمداردىڭ قاراماعىنا بەرىپ, ول جەرگە زاۋىت سالۋدى ۇسىندى. ويتكەنى, شەتەلدەن ميلليونداعان قارجىعا ساتىپ الىناتىن پسيحوتروپتى ءدارى-دارمەكتەردى وسىندا وسەتىن قاراسورادان-اق دايىنداۋعا بولادى ەكەن. بۇل ەسىرتكى شوبىنەن جاسالاتىن پرەپاراتتار بۇگىندە يزرايلدە, كانادا مەن ەۋروپا ەلدەرىندە قاتەرلى ىسىككە قارسى قولدانىلادى.
«كوكناردى مەديتسينادا پايدالانۋعا بولادى. ودان كەزىندە ماي جاساعان جانە 25 مىڭ ءتۇرلى ءونىم شىعارىلعان. ونىمەن كۇرەسۋدىڭ ورنىنا ونى باسقارۋعا بەرىپ, زاۋىتتاردى سالىپ, وسى كوكناردى ادامداردىڭ پايداسىنا جاساۋعا مۇمكىنشىلىك بار», - دەدى حالىق قالاۋلىسى داريعا نازارباەۆا.
جيىن بارىسىندا ىشكى ىستەر ءمينيسترى ق. قاسىموۆ ناشاقورلاردى دالادان ەمەس, قالادان ىزدەۋ كەرەك دەگەندى ايتىپ سالدى. ول مەملەكەتتىك قىزمەتكەرلەردىڭ ءبارىن جۇمىسقا الاردا جاپپاي تەستتەن وتكىزۋ كەرەك دەپ سانايدى. مۇنداي تەكسەرۋگە وقۋشىلار مەن ستۋدەنتتەر دە ءىلىنۋى مۇمكىن.
ەلىمىزدە 40 مىڭنان استام ادام ەسىرتكىگە تاۋەلدى. ولاردىڭ باسىم بولىگى ايەلدەر ەكەن. دەپۋتاتتار ناشاقورلاردى ەمدەيتىن دارىلەر شۋ دالاسىنداعى شوپتەن جاسالسا, بۇل «ستاتيستيكا الدەقايدا تومەندەيدى» دەگەن سەنىمدە...
باقىتبەك كەنەش ۇلى.
دەرەككوز: «كتك» تەلەارناسى
فوتو: Ras.kz.