ەل تاۋەلسىزدىگىنىڭ 30 جىلى ىشىندە مەملەكەت باسشىسى قاسىم-جومارت توقاەۆتىڭ باستاماسىمەن جۇرگىزىلىپ جاتقان ساياسي رەفورمالار اياسىندا تۇڭعىش رەت وتكىزىلگەن اۋىل اكىمدەرىن سايلاۋ قوعامدا زور قىزىعۋشىلىق تۋعىزدى.
وسىعان وراي, «پارتيالىق ەمەس بايقاۋ ورتالىعى» رەسپۋبليكالىق قوعامدىق بىرلەستىگىنىڭ وبلىستىق فيليالىنىڭ وكىلدەرى 25 شىلدەدە وتكەن ساياسي ءىس-شاراعا تۇڭعىش رەت بايقاۋشى بولىپ, ەرەكشە ىنتا-ىقىلاسپەن قاتىستى. اۋىل اكىمدەرىن تىكەلەي سايلايتىن, قوعامدى دەموكراتيالاندىرۋعا باستايتىن بۇل سايلاۋدىڭ ماڭىزى ۇلكەن ەكەندىگىن ەسكەرە وتىرىپ, ءبىز سايلاۋ باستالاردان ءبىر اي بۇرىن جان-جاقتى دايىندىق جۇمىسىن باستادىق. سايلاۋعا قاتىساتىن بايقاۋشىلاردى ارنايى كۋرستان وتكىزىپ, زاڭ تالاپتارىن تۇسىندىردىك. بۇل سەمينارلارعا بۇرىنعى تاجىريبەلى بايقاۋشىلار دا قاتىسىپ, ءوز ويلارىمەن ءبولىستى. سونىمەن قاتار بايقاۋشى كودەكسى ازىرلەندى, وندا بايقاۋدىڭ نەگىزگى قاعيداتتارى قامتىلدى: اشىق پىكىر ءبىلدىرۋ, ياعني كانديداتتاردىڭ نەمەسە ساياسي پارتيانىڭ ەشقايسىسىنا ارتىقشىلىق بەرمەۋ, بارلىق زاڭ بۇزۋشىلىقتاردى تياناقتاۋ, بۇل رەتتە سايلاۋ كوميسسياسىنا جانە سايلاۋ پروتسەسىنىڭ باسقا دا قاتىسۋشىلارىنا كەدەرگى جاساماۋ ەسكەرتىلدى.
الدىن الا 278 ستاتسيونارلىق بايقاۋشى مەن 100 ءموبيلدى بايقاۋشىنى دايارلادىق. ولارعا «بايقاۋشى كودەكسىنىڭ» قاعيداتتارى ءتۇسىندىرىلدى. ءسويتىپ, بايقاۋشىلار وبلىستىڭ ءار ايماعىنداعى 79 سايلاۋ بولىمشەسىندە ءوز جۇمىسىن ادال اتقاردى.
ايتا كەتەيىك, ءبىز بۇل ساياسي ناۋقانعا تاۋەلسىز باقىلاۋشى رەتىندە قاتىسقان وبلىستىق ازاماتتىق اليانس زاڭدى تۇلعالار قاۋىمداستىعى مۇشەلەرىمەن بىرگە اتسالىستىق. ولار دا اكىمدەر سايلاۋىنىڭ زاڭدىلىعىن باقىلاۋ ءۇشىن 158 ەرىكتىگە جولداما بەرىپ, وقۋ-ادىستەمەلىك ماتەريالدارمەن قامتاماسىز ەتكەن بولاتىن.
سايلاۋ بارلىق اۋىلدا بەلسەندى ءجۇردى. ءار تۇرعىن ءوز كانديداتۋراسى ءۇشىن داۋىس بەرۋگە مۇمكىندىك الدى. سايلاۋشىلاردىڭ 81,3 پايىزى داۋىس بەرۋ قۇقىعىن پايدالاندى, بۇل – جوعارى كورسەتكىش. سايلاۋ زاڭ بۇزۋشىلىقتارى بايقالعان جوق, اشىق, شىنايى, دەموكراتيالى تۇردە ءوتتى. اۋىل بولاشاعى – ەلدىڭ بولاشاعى. سوندىقتان ءبىز باسىنان سوڭىنا دەيىن بۇل ناۋقاندى ءجىتى باقىلادىق. ەڭ سوڭعى ساناۋ جۇمىسىنا دا بەلسەنە قاتىستىق. ءبارى ءادىل ءوتتى. وڭىردەگى, الىس اۋىلدارداعى ءاربىر بايقاۋشىمىزبەن اقپارات الىسىپ, جۇمىس ىستەدىك.
سايلاۋ ءادىل جانە باسەكەلى كۇرەستە ءوتتى جانە جەرگىلىكتى حالىقتىڭ ۇلكەن قىزىعۋشىلىعىن تۋدىردى. ەلىمىز دەموكراتيالىق دامۋ جولىمەن العا تاعى ءبىر نىق قادام جاساعانى انىق.
مۇحتار داۋلەتجانوۆ,
«پارتيالىق ەمەس بايقاۋ ورتالىعى» رەسپۋبليكالىق قوعامدىق بىرلەستىگى وبلىستىق فيليالىنىڭ توراعاسى
باتىس قازاقستان وبلىسى